Convento de San Francisco de Pontevedra

O convento de San Francisco é un mosteiro franciscano de Pontevedra, situado no centro da vila. Na actualidade está ocupado por catro monxes.

Historia

Segundo a tradición, o convento foi fundado por Francisco de Asís, que parou en Pontevedra mentres facía a ruta Portuguesa do camiño de Santiago. A chegada da orde franciscana á cidade tivo lugar posiblemente no último terzo do século XIII, sendo a edificación construída entre 1310 e 1360, contando coa axuda económica dos herdeiros de Pai Gómez Chariño nun solar da casa de Soutomaior, naquela época aínda fóra do perímetro da muralla da cidade.

A opulencia desta construción provocou envexa nos membros da orde dominica instalados na cidade, que remataran a súa igrexa dez anos antes, e que decidiron iniciar en 1380 a construción doutra igrexa maior que a franciscana, con cinco ábsidas. En 1362 iniciouse a construción da cabeceira da igrexa das monxas clarisas na cidade, similar á de San Francisco, pero de menor tamaño. Ademais destas tres construcións, a igrexa parroquial de San Bartolomé fora ampliada entre 1337 e 1339. Este gran apoxeo na construción debeuse ó gran número de doazóns económicas procedentes de familias pudentes, temorosas da morte procedente da peste bubónica que asolagou Europa nesa época.

A igrexa é de estilo gótico tardío ou oxival, e foi declarada monumento histórico-artístico en 1896. Ten planta de cruz latina, con nave única, cruceiro, cuberta de madeira e cabeceira con tres ábsidas poligonais, cubertas con bóvedas de crucería.

O edificio que ocupa a Delegación de Facenda foi construído en 1800, e inclúe a porta de Santo Domingo da antiga muralla da cidade, do século XIII.

Sartego de Pai Gómez Chariño

No seu interior están os sartegos de Pai Gómez Chariño, Xoán Feijoo de Soutomaior, e Paio de Montenegro.

Logo da desamortización de Mendizábal o recinto quedou deshabitado, sendo propiedade do concello. O 15 de xaneiro de 1909, o pai Luis María Fernández Espinosa e 5 relixiosos máis volveron habitar o recinto, cun contrato de aluguer de 25 anos, a 250 pesetas por ano. En 1930 o templo foi cedido por Real Orde.

Nunha noite de verán de 1995 o templo sufriu un incendio, sendo restaurado pouco tempo despois.

Neste convento está o comedor de San Francisco, que de luns a sábado dá de comer a un bo número de necesitados.

Galería de imaxes

Artigo principal: Galería de imaxes do Convento de San Francisco de Pontevedra.

• 
• 
• 
• 

  Ánimas do Purgatorio

Véxase tamén

Bibliografía

• Juan Juega Puig: As orixes medievais de Pontevedra, en: vv.aa.: Historia de Pontevedra (Lérez Ediciones, 2002).
• "Nunca reprimí la angustia y la vergüenza al subir al púlpito", Artigo de Manuel Jabois no Diario de Pontevedra, 15 de xaneiro de 2009.