Bandeira de Alemaña

Na Galipedia, a Wikipedia en galego.
Bandeira de Alemaña
Bandeira de Alemaña
Uso
FIAV 110100.svgFIAV normal.png
Proporción 3:5
Adopción 23 de maio de 1949
Cores      Negro     Vermello     Amarelo

A actual bandeira de Alemaña (en alemán: Bundesflagge) foi adoptada o 23 de maio de 1949 pola República Federal de Alemaña. A bandeira de Alemaña consta de tres franxas horizontais de igual tamaño en cores negro, vermello e amarelo (Schwarz-Rot-Gold en alemán).

Previamente esta bandeira fora utilizada pola Confederación Alemá (1848-1866) e a República de Weimar (1918-1933). A República Democrática Alemá empregouna entre 1949-1959. Logo e ata a súa reunificación en 1990 engadiu o escudo do devandito estado á bandeira orixinal.

Historia[editar | editar a fonte]

A orixe desta bandeira e causa de disputa. Unha das versións máis probables provén do uso destas cores por parte dos «Freikorps», as tropas alemás que combateron contra Napoleón Bonaparte durante as Guerras Napoleónicas, nos seus uniformes (de cor negra con terminacións en vermello e botóns dourados). Outra teoría apunta a unha reprodución dos estandartes do Sacro Imperio Romano Xermánico, consistentes dun campo dourado sobre o que había un aguia negra. O vermello proviría do usado no pico e as garras da ave e aparecería case circunstancialmente, tendo unha orixe similar á bandeira de Bélxica.

De calquera xeito, a insignia foi adoptada como símbolo nacional pola Confederación Alemá, o 9 de marzo de 1848. A Schwarz-Rot-Gold, con todo, sería substituída en 1866 cando se formase a Confederación Alemá do Norte (CAN), liderada por Prusia ao derrotar a Austria, na Guerra das Sete Semanas.

Ao crearse esta nova confederación, deseñouse unha nova bandeira mesturando as cores tradicionais de Prusia (negro e branco) e os dos pequenos estados da Liga Hanseática (branco e vermello). Así, o 25 de xuño de 1867 foi creada unha nova bandeira que posteriormente seguiría sendo empregada polo Imperio alemán, entre 1871 e 1919.

Trala derrota na Primeira Guerra Mundial, o Imperio foi disolto e formouse a República de Weimar, que retomou a antiga Schwarz-Rot-Gold a partir do 11 de agosto de 1919. Con todo, a loita entre monárquicos e republicanos polo establecemento das súas respectivas bandeiras, persistiu durante varios anos, ata que se permitiu en 1926 o uso da bandeira imperial nas delegacións estranxeiras. En 1933, ao asumir o poder do país o Partido Nacional Socialista xunto ao seu líder, Adolf Hitler, a bandeira da República foi suprimida e mantívose a bandeira imperial, que foi substituída dende o 15 de setembro de 1935 pola Bandeira Nazi, que incluía unha esvástica negra sobre un disco branco nun fondo vermello. A bandeira do Segundo Reich foi abolida logo dun incidente nos EUA, no que uns americanos ultraxaron a bandeira da esvástica nun barco alemán (en territorio alemán). O Reich protestou formalmente ante os EUA, pero as autoridades norteamericanas responderon que a bandeira da esvástica non era a bandeira oficial de Alemaña, senón a negra-branca-vermella, e que polo tanto non podían atender a queixa. En resposta, Adolph Hitler declarou a bandeira da esvástica "única bandeira oficial do Reich Alemán".

En 1945, o réxime nazi foi derrotado polos aliados durante a Segunda Guerra Mundial e a Alemaña nazi foi desmantelada. Trala vitoria dos aliados, o emprego de bandeiras nacionais foi vetado, especialmente o símbolo da esvástica. Con todo, as embarcacións alemás debían levar algún símbolo para ser identificadas en alta mar, polo que se deseñou un modelo baseado no Código Internacional de Sinais. A bandeira de sinais que representaba á letra C (de "capitulación") foi utilizada, pero cun sacado á beira dereito en forma triangular. Esta bandeira foi empregada ata 1949, cando os Estados federados da República Federal de Alemaña e da República Democrática Alemá retomaron a insignia negro-vermello-dourado. Con todo, en 1959, a Alemaña Oriental deseñou a súa propia bandeira para diferenciarse da súa contraparte occidental, a cal foi utilizada ata 1990, ano no que ambos os dous estados reunificáronse baixo a insignia orixinal.

Outras bandeiras[editar | editar a fonte]

Bandeira estatal[editar | editar a fonte]

FIAV 011010.svg Bandeira estatal de Alemaña

A diferencia da bandeira civil, a bandeira estatal ou federal (Bundesdienstflagge en alemán) leva no centro unha águia negra sobre campo dourado, semellante á do Sacro Imperio Romano Xermánico e ao escudo de Alemaña, sen ser idéntica. Este escudo atópase levemente desfasado do centro cara o asta, e á sñua altura, malia non estar definida oficialmente, é aproximadamente 7/15 do tamaño da altura da bandeira, polo que superponse levemente ás franxas negra e amarela e totalmente á vermella.

Bandeira de guerra[editar | editar a fonte]

FIAV 000001.svg Kriegsflagge

Na actualidade, a bandeira de guerra (Kriegsflagge, en alemán) corresponde a unha versión modificada da bandeira empregada polas autoridades federais, posto que a primeira posúe un sacado triangular no lado exterior da bandeira. Con todo, ao longo da historia, Alemaña tivo diversos emblemas para os seus corpos militares e que, en xeral, corresponden a versións modificadas das súas bandeiras nacionais.

A primeira bandeira, empregada pola Confederación Alemá, constaba da bandeira nacional á que se agregaba unha aguia bicéfala negra no cantón sobre un campo amarelo. Esta bandeira foi utilizada entre 1848 e 1867, cando foi substituída por unha bandeira branca cunha cruz negra e que tiña no cantón a bandeira negra-branca-vermella xunto a unha medalla de aceiro. Sobre a cruz estaba a aguia da bandeira de Prusia nun disco branco. Esta bandeira sufriu cambios menores na aguia en 1892 e 1903.

En 1919, a bandeira de guerra foi modificada incorporando a bandeira da República de Weimar no cantón da versión anterior. Con todo, esta bandeira nunca foi utilizada e foi substituída en 1922 pola antiga bandeira do Segundo Reich, coa medalla de aceiro sobre ela e no cantón a bandeira Schwarz-Rot-Gold. Coa chegada ao poder dos nazis, a bandeira do cantón foi eliminada e mantívose o deseño da Reichskriegsflagge ata 1935, ano en que foi deseñada unha nova bandeira que incorporaba os símbolos do nazismo. Tras a derrota na guerra, a bandeira de guerra soamente foi reincorporada co seu actual deseño en 1956.

Bandeiras estatais dos estados alemáns[editar | editar a fonte]

Cada estado de Alemaña posúe unha bandeira de seu.

Véxase tamén[editar | editar a fonte]

Commons
Commons ten máis contidos multimedia sobre: Bandeiras de Alemaña

Outros artigos[editar | editar a fonte]

Ligazóns externas[editar | editar a fonte]