Ácido

Ácido - É unha especie química (molécula ou ión) que pode ceder protóns (H⁺). Un exemplo é o ácido clorhídrico, de fórmula HCl:

HCl → H⁺ + Cl^- (en calquera medio, acuoso ou non)

O concepto de ácido é o contraposto ao de base. Para medir a acidez dun medio utilízase o concepto de pH.

Distintas definicións de "ácido":

A definición anterior corresponde a formulada por Brönsted e Lowry en 1923, e xeneraliza a teoría anterior de ácidos de Arrhenius, de 1887. Na definición de Arrhenius un ácido é unha substancia que ao ionizarse produce ións H⁺ (en solución acuosa). A teoría de Brönsted e Lowry de ácidos tamén serve para disolucións non acuosas; as dúas teorías son moi parecidas na definición de ácido, mais a de Bronsted-Lowry é moito máis xeral.

Lewis en 1923 ampliou aínda máis a definición de ácidos, teoría que non obtivo repercusión ata algúns anos máis tarde. Segundo a teoría de Lewis un ácido é aquela especie química que, en calquera medio, pode aceptar un par de electróns. Desta forma inclúense substancias que se comportan como ácidos, mais non cumpren a definición de Brönsted e Lowry, sendo denominadas ácidos de Lewis. Visto que o protón, segundo esta definición, é un ácido de Lewis (ten baleiro o orbital 1s, onde pode aloxarse o par de electróns), pódese afirmar que todos os ácidos de Brönsted-Lowry son ácidos de Lewis, e todos os ácidos de Arrhenius son de Bronsted-Lowry.

• Exemplos de ácidos de Brönsted e Lowry: HCl, HNO₃, H₃PO₄.

Se estiveren en solución acuosa tamén son ácidos de Arrhenius.

• Exemplos de ácidos de Lewis: Ag⁺, AlCl₃, CO₂, SO₃.

Forza dos ácidos

• Un ácido forte é aquel que se ioniza completamente na auga, isto é, libera ións H⁺, así a todo non os recibe. O exemplo anterior (ácido clorhídrico) é un ácido forte. Outros son o ácido sulfúrico e o ácido nítrico.
• Un ácido feble tamén libera ións H⁺ , non obstante parcialmente, establecendo un equilibrio químico. A maioría dos ácidos orgánicos son deste tipo, e tamén algúns sales como o cloruro de aluminio.

HAc <=> H⁺ + Ac^- (en solución acuosa)

Neste caso (HAc equivale ao ácido acético), e a frecha dupla indica o equilibrio.

Algúns ácidos

• Ácido acético.
• Ácido acetilsalicílico.
• Ácido acrílico.
• Ácido bórico.
• Ácido clorhídrico.
• Ácidos graxos.
• Ácido nítrico.
• Ácido nitroso.
• Ácido ribonucleico.
• Ácido sulfúrico.
• Ácido tartárico.
• Ácido úrico.
• Aminoácido.
• EDTA.

Véxase tamén

Outros artigos

• Éter.
• Choiva ácida.
• ácidos orgánicos.
• Anfótero.
• Osíxeno.