Wolfgang Steguweit

Wolfgang Steguweit

Biografía
Nacemento	30 de xaneiro de 1944. Königsberg, Prusia
Datos persoais
País de nacionalidade	Alemán.
Educación	Universidade de Dresden. Universidade de Halle-Wittenberg.
Coñecido por	Director do Gabinete Numismático de Berlín.
Actividade
Campo de traballo	Numismática.
Ocupación	historiador da arte , autor , numismático
Lingua	Lingua alemá
Premios
1994: Premio da GIG. 2015: Eligiuspreis (DNG).

Wolfgang Steguweit, nado en Königsberg, Prusia, o 30 de xaneiro de 1944, é un numismático alemán vinculado ao Gabinete Numismático de Berlín.

Traxectoria

Orixe e formación

Wolfgang Steguiweit naceu na cidade de Königsberg, daquela pertencente ao Estado de Prusia e hoxe integrada na Federación Rusa.

Cursou estudos de Historia da Arte, Educación Artística, Lingua e Literatura Alemás e Pedagoxía na Universidade de Dresden, e a continuación pasou catro anos realizando prácticas como bolseiro.

Non foi ata 1980 cando acadou o seu doutoramento, na Universidade de Halle-Wittemberg, cunha tese titulada "Historia da Casa da Moeda de Gotha na segunda metade do século XVII".

Carreira profesional e académica

Steguweit dirixiu o gabinete de moedas dos museos da cidade de Gotha desde 1971 ata 1988, ano en que se trasladou ao Gabinete Numismático de Berlín, sito nos Museos Nacionais desta cidade, inicialmente como director e, desde 1992 ata a súa xubilación en 2009, como subdirector e conservador xefe.

Paralelamente, en 1991 Steguweit fundou a Sociedade Alemá de Arte Medieval, que presidiu ata 2001, e logo novamente de 2010 a 2013, e da que foi elixido presidente honorario en 2013.

Entre 1992 e 1998 foi delegado por Alemaña na Federación Internacional da Medalla de Arte (FIDEM) e coorganizador do seu XXVII congreso en Weimar en 2000.

De 1991 a 2008 foi o representante do Estado de Berlín na Comisión Numismática dos Estados da República Federal de Alemaña e, no seo desta, entre 1994 e 2004 presidiu a Fundación Gitta Kastner, centrada na investigación medallística.

Desde 2015, é membro da Comisión Histórica de Turinxia e do Padroado da Fundación Cultural de Gotha.

Focos de interese

Ademais dos traballos sobre a historia das moedas e do diñeiro na Idade Media e na época moderna, publicou tamén numerosos traballos acerca das medallas de arte alemás e europeas en xeral, así como estudos sobre a historia das coleccións.

En 1992 Steguweit creou a serie Die Kunstmedaille der Gegenwart in Deutschland ("A medalla de arte contemporánea en Alemaña"), que pasou a chamarse Die Kunstmedaille in Deutschland ("A medalla de arte en Alemaña") en 1996. Dos máis de 30 volumes publicados desde entón, Steguweit é autor, editor ou coeditor de 23.

Recoñecementos

• (1994): Premio da Sociedade de Historia Monetaria Internacional.
• (2015): Eligiuspreis, da Sociedade Numismática Alemá.

Publicacións

A obra de Wolfgang Steguweit é moi ampla; esta é unha escolma dos traballos monográficos máis representativos da súa traxectoria:

Numismática e historia do diñeiro

• (1980). Die römischen Münzen des Münzkabinetts Gotha (con U. Werneburg). Museen der Stadt Gotha.
• (1981). Thüringische Brakteaten des Münzkabinetts Gotha. Museen der Stadt Gotha.
• (1983). Alte Taler des Münzkabinetts Gotha (con H. Hennrich). Museen der Stadt Gotha.
• (1987). Geschichte der Münzstätte Gotha vom 12. bis zum 19. Jahrhundert. H. Böhlaus, Weimar. ISBN 978-3740000509
• (2005). GeldKunst KunstGeld. Deutsche Gedenkmünzen seit 1949. Gestaltung und Gestalter (con G. Dethlefs et al.). Deutsche Numismatische Gesellschaft. ISBN 3-9801644-7-0

Medallística

• (1974). Vom Modell zum Guss. Medaillenkunst in der DDR (con E. Wipplinger). Museen der Stadt Gotha.
• (1990). Die Sprache der Medaille. Wegleitung zur Ausstellung des Münzkabinetts (con Lore Börner). Staatliche Museen zu Berlin.
• (1990). Aufbruch, Durchbruch. Zeitzeichen in der deutschen Medaillenkunst (con Ingrid S. Weber). Staatliche Münzsammlung München & Münzkabinett Berlin. ISBN 9783922840008
• (1995). Europäische Medaillenkunst von der Renaissance bis zur Gegenwart. Münzkabinett Berlin. ISBN 9783886093793
• (1998). Das Münzkabinett der Königlichen Museen zu Berlin und die Förderung der Medaillenkunst. Münzkabinett Berlin. ISBN 3-88609-434-0
• (1998). Das Münzkabinett der Königlichen Museen zu Berlin und die Förderung der Medaillenkunst. Münzkabinett Berlin. ISBN 3-88609-435-9
• (2004). Hilde Broër. Bildhauerin und Medailleurin. Leben und Werk. Mann, Berlín. ISBN 9783786124900
• (2004). Raimund Faltz. Medailleur des Barock. Mann, Berlín. ISBN 3-7861-2507-4
• (2006). Münzen und Medaillen. 100 Themen. Die Ausstellung des Münzkabinetts im Bode-Museum (con B. Kluge, B. Weisser et al.). Prestel, Múnic. ISBN 9783791337463
• (2007). Medaillenkunst in Köln im 20. Jahrhundert: von Ludwig Gies bis Karl Burgeff (con H. W. Müller e G. Steguweit). Mann, Berlín. ISBN 9783786125686
• (2008). Suum Cuique. Medaillenkunst und Münzprägung in Brandenburg-Preußen (con B. Kluge). Münzkabinett Berlin. ISBN 978-3-88609-644-2
• (2009). Ars juventuti. Berliner Schülermedaillen von der Unterrichtsanstalt des Kunstgewerbemuseums zur Hochschule für bildende Künste. Münzkabinett Berlin. ISBN 978-3-88609-644-2

Véxase tamén

Bibliografía

• Weisser, B. (2014). "Wolfgang Steguweit. Initiator, Macher, Mentor, Visionär". En Geldgeschichtliche Nachrichten, 49. Páxinas 214-225.