Comisión Numismática dos Estados da República Federal de Alemaña
| Comisión Numismática dos Estados da República Federal de Alemaña | |||||||||
|---|---|---|---|---|---|---|---|---|---|
| |||||||||
| |||||||||
| |||||||||
| |||||||||
| |||||||||
| |||||||||
| |||||||||
| |||||||||
| Wikidata | |||||||||
A Comisión Numismática dos Estados da República Federal de Alemaña (en alemán: Numismatische Kommission der Länder in der Bundesrepublik Deutschland) é unha organización científica do ámbito da numismática dos estados federais alemáns, dedicada á promoción dos estudos sobre a moeda, a historia monetaria e a medalla.[1]
Historia
[editar | editar a fonte]A Comisión Numismática fundouse en 1950 por iniciativa da Administración cultural de Hamburgo, seguindo o modelo da Conferencia Permanente de Ministros de Cultura dos Estados da República Federal de Alemaña. Outro modelo organizativo foi o das comisións históricas que xurdiron como primeiros órganos de autoxestión científica no século XX. Procurábase, con esta comisión interestatal, a reconstrución das coleccións de moedas e a volta á operatividade das institucións de investigación numismática, que quedaran danadas e inaccesibles despois da segunda guerra mundial. O obxectivo a longo prazo era a coordinación de cuestións tan fundamentais como os rexistros de achados monetarios e o restablecemento das relacións internacionais.[2]
Durante os primeiros anos seguíronse as pautas marcadas polo profesor Walter Hävernick, director do Museo de Historia de Hamburgo e primeiro presidente da Comisión (1950-1974). O seu alumno Gert Hatz foi o continuador do seu labor como presidente da institución (1974-1993), sucedido logo por Bernd Kluge (1993-1999). Ao longo da década de 1990 asumiuse a integración dos novos estados na Comisión, como resultado da reunificación alemá, e esta foi a principal preocupación de Niklot Klüßendorf como vicepresidente. Superada esta etapa, ocuparon a presidencia Reiner Cunz (1999-2011) e finalmente Dietrich Klose, a partir dese último ano.[2]
Desde 1990, a proporción de membros da Comisión que debían ter formación numismática e con dedicación funcional nesa área foi diminuíndo en favor dos representantes vinculados á preservación de monumentos históricos.[2]
Nunha prinmeira etapa, a partir de 1952, a Comisión editou a revista mensual Numismatisches Nachrichtenblatt, que posteriormente pasou a estar editada pola Sociedade Numismática Alemá.[3]
Organización
[editar | editar a fonte]A Comisión é unha organización de carácter federal e está constituída por representantes de cada un dos Estados, especializados en diferentes áreas da numismática e nomeados polos respectivos ministros de Cultura. O perfil dos expertos varía conforme as posibilidades e as prioridades de cada Estado, e adoitan ser directores de gabinetes numismáticos, expertos vinculados a museos, arqueólogos estatais etc. Ten unha importancia destacada o persoal vinculado aos catro gabinetes numismáticos principais de Alemaña: o Münzkabinett de Berlín, o Münzkabinett de Dresden, o Museo do Diñeiro do Deutsche Bundesbank en Frankfurt e a Colección de Moedas Estatal de Múnic.[4]
As sociedades numismáticas (Sociedade Numismática Alemá e Sociedade de Historia Monetaria Internacional) e a asociacións dos distribuidores de moedas están tamén representadas, do mesmo xeito que outros grupos de interese, con carácter consultivo.[4]
Proxectos estables
[editar | editar a fonte]- Achados e historia monetaria. A Comisión comezou xa na década de 1950 a confeccionar o catálogo central de achados de moedas alemás medievais e de época moderna (Münzfundkatalog Mittelalter/Neuzeit), inicialmente con arquivos escritos á máquina sobre papel e máis adiante con medios informáticos, particularmente a partir do ano 2000. A base de datos contén arredor de 200.000 rexistros, desde o ano 750 ata o século XIX.[5]
- Fluxos de metais e de diñeiro. En conxunto con diversas institucións suecas, como a Universidade de Estocolmo, a Comisión desenvolve un proxecto de investigación comezado xa en 1950 sobre os achados de moedas alemás dos séculos X e XI na rexión do Báltico onde houbo asentamentos viquingos e eslavos, e prevé proxectos similares en países veciños do leste, sinaladamente con Polonia e con Estonia.
- Medallística. A Comisión patrocina a Fundación de Investigación Gitta Kastner, centrada na nova medalla de arte alemá.[6]
Premio Walter-Hävernick
[editar | editar a fonte]Un interese clave da Comisión é a promoción do talento xuvenil. Con tal fin, creou un fondo e unha fundación específica dedicados á edición de teses, memorias académicas e proxectos de investigación levados a cabo por novos talentos da numismática, e outorga tamén bolsas de viaxes para acudir ao Congreso Internacional de Numismática que se celebra cada seis anos en diferentes países do mundo.[7]
Nese contexto, a Comisión creou en 2012 o Premio Walter-Hävernick, dotado con 2.000 euros e destinado a científicos menores de 35 anos autores de teses exemplares ou outros traballos monográficos sobre calquera área da numismática, escritos en alemán, en inglés ou en francés. Á parte da dotación económica, os gañadores tamén reciben unha medalla creada en 2015 polo medallista Carsten Theumer.[8]
Notas
[editar | editar a fonte]- ↑ "Startseite". Sitio web da NKLBD.
- 1 2 3 Kunz, R. (2000).
- ↑ "NNB Numismatisches NachrichtenBlatt". Sitio web da DNG.
- 1 2 "Landesvertreter und Fachgebietsvertreter". Sitio web da NKLBD.
- ↑ "Fundmünzen". Sitio web da NKLBD.
- ↑ "Die Gitta-Kastner-Forschungsstiftung". Sitio web da NKLBD.
- ↑ "Nachwuchsstiftung". Sitio web da NKLBD.
- 1 2 "Walter-Hävernick-Preis". Sitio web da NKLBD.
- ↑ "Bernhard Weisser: Laudatio für Angela Berthold, Walter-Hävernick-Preis 2012". Sitio web da NKLBD.
- ↑ "Die Verleihung des Walter-Hävernick-Preises für Numismatik an Angela Berthold". En MünzenWoche. 10 de xaneiro de 2013.
- ↑ "Wienand, Johannes". En Coins Weekly. 5 de decembro de 2019.
- ↑ "Verleihung des Walter-Hävernick-Preises 2013". En NNB 9/13. Páxinas 1-2.
- ↑ "Alexa Küter erhält den Walter-Hävernick-Preises 2014". En MünzenWoche. 31 de xullo de 2014.
- ↑ "Walter-Hävernick-Preis 2015 an Stefan Roth verliehen". Sitio web da NKLBD.
- ↑ "Johannes Nollé: Laudatio zum Walter Hävernick-Preis 2016 für Simone Killen". Sitio web da NKLBD.
- ↑ "Johannes Hartner wird Nachfolger von Michel Alram". En MünzenWoche. 30 de xullo de 2020.
- ↑ "Steinbach, Sebastian". In Coins Weekly. 2 de novembro de 2016.
- ↑ "Walter-Hävernick-Preis 2018". Muenzen-online.com
- ↑ "Ein alter Münz-Schatz in der Michaelskirche: Johannes Peter untersucht Fuldaer Brakteaten". En Fuldaer Zeitung. 26 de xullo de 2020.
Véxase tamén
[editar | editar a fonte]Outros artigos
[editar | editar a fonte]Bibliografía
[editar | editar a fonte]- Kunz, R. (2000). Concordia ditat. 50 Jahre Numismatische Kommission der Länder in der Bundesrepublik Deutschland. Gietl. ISBN 978-3924861377
