Alejandro Viana Esperón

Alejandro Viana Esperón, nado en Ponteareas o 16 de maio de 1877 e finado en Cidade de México en 1952, foi un industrial e político galego.

Traxectoria

Nas eleccións xerais de 1933 foi candidato pola provincia de Pontevedra por Acción Republicana, pero non foi elixido. En 1935 foi nomeado xefe provincial de Izquierda Republicana de Pontevedra e foi elixido deputado nas eleccións xerais de 1936. A sublevación do 18 de xullo de 1936 sorprendeuno en Madrid, onde permaneceu ata 1938, cando se trasladou a Valencia e de alí a Barcelona. En 1939 marchou a París, onde traballou para o Servicio de Evacuación de Refugiados Españoles (SERE). Viana presentou a súa dimisión en agosto de 1939, por incompatibilidades co secretario xeral do organismo. Cando o Terceiro Reich ocupou Francia marchou a Bordeos, e cara 1941, avisado de que a Gestapo quería capturalo, marchou a Suíza e de alí a Toulon, onde embarca para Arxentina no mesmo barco que Niceto Alcalá Zamora. Pero o barco foi bombardeado en Dacar, onde tivo que desembarcar porque lle caducaba o visado. De alí foi enviado a Casablanca e internado un mes nun campo de concentración. Despois de numerosas xestións, conseguiu chegar a México. En Cidade de México rexentou unha farmacia e conseguiu a distribución de penicilina para todo México.

Véxase tamén

Bibliografía

• "Alejandro Viana Esperón, un achegamento á súa biografía". Pregón. Revista da Festa do Corpus Christi de Ponteareas (12). 2002. 

Ligazóns externas

• Ficha no Congreso dos Deputados