Banco de Galicia (oceanografía)

Na Galipedia, a Wikipedia en galego.

Coordenadas: 43°07′N 11°14′O / 43.117, -11.233

Esquema batimétrico dun monte submarino (neste caso, o Davidson Seamount).
Os puntos indican importantes colonias de corais.

O banco de Galicia é un monte submarino situado no océano Atlántico, que se encontra a uns 200 km ao oeste da costa galega de Fisterra[1][2]

Características físicas[editar | editar a fonte]

A zona menos profunda ten unha extensión duns 6 200 km², e un canal duns 2 500 m de profundidade separa o banco da plataforma continental. De forma irregular, na zona leste elévase un pico duns 600 m e ao norte-noroeste descende en suave pendente desde os 1 000 m até a zona abisal, a 5 000 m de profundidade.[1]

O monte está formado por lava basáltica da codia oceánica, recuberta por sedimentos formados sobre todo pola acumulación de caparazóns de foraminíferos.[2]

Características biolóxicas[editar | editar a fonte]

Debuxo de Epigonus telescopus (antes Pomatomus telescopus) de 1835.

Como demostran os datos dos que se dispón na actualidade, o banco de Galicia conforma un ecosistema de alta riqueza en especies. A estrutura das comunidades ecolóxicas son significativamente distintas das da plataforma continental e dos fondos abisais.

Alí habitan 86 especies de peixes, entre elas 11 de elasmobranquios (tiburóns e raias), entre eles Dalatias licha e Dipturus batis (=Raja batis Linnaeus), esta última proposta como especie ameazada polo convenio OSPAR para o Atlántico noroeste. Entre os teleósteos destacan, entre outros, o tomás (Epigonus telescopus), Lepidion eques, Malacocephalus laevis e Trachyscorpia cristulata.

A macrofauna do bentos caracterízase pola presenza de filtradores de numerosas especies de esponxas e estrelas de mar (nas zonas máis profundas acháronse un gran número de asteroideos) e de varias especies carnívoras, sobre todo crustáceos, entre os que destaca, polo seu interese pesqueiro, o cangrexo real (Chaceon affinis).

Outra das especies máis relevantes do banco é o coral Lophelia pertusa, característico das augas frías e que, por si mesmo, conleva unha altísima diversidade de especies nas "cristas" deste monte submarino.[2]

Galería[editar | editar a fonte]

Impactos ambientais e medidas protección[editar | editar a fonte]

Impactos antrópicos[editar | editar a fonte]

A información sobre o banco de Galicia e os seus ecosistemas é aínda escasa, e só se realizaron unhas poucas investigacións biolóxicas in situ. O impacto ambiental antrópico (o causado polo ser humano) no banco, por exemplo por explotación pesqueira non foi aínda avaliado con detalle. En xeral, estaría relacionado coa pesca de crustáceos e de tiburóns en augas profundas con palangre. Porén, esta carencia de información non debe levarnos a asumir de que non sexa necesaria ningunha medida de protección.[2]

Propostas de protección[editar | editar a fonte]

Actualmente non hai ningunha regulación específica ou limitación para ningún tipo de uso do banco. Aínda máis, as prioridades do goberno de España en termos de pescarías e de conservación dos recursos naturais en alta mar non están claras debido á repartición de competencias entre os gobernos autonómicos e o Estado.[2]

Polas súas características de barreira, o banco de Galicia está cualificado para ser unha Área de Especial Conservación pola Directiva Europea de Hábitats, polo que o Fondo Mundial para a Natureza (WWF) instou ao goberno español a que asuma as súas competen cias en canto á conservación, e para que inicie os trámites oportunos para cumprir coa citada directiva, e cumprir ao establecemento definitivo da rede europea de espazos natutais coñecida como Rede Natura 2000.[3]

Nun seguinte paso, o WWF propón que o banco de Galicia sexa designado como Área Mariña Protexida protexida baixo o Convenio de OSPAR.[4]

Notas[editar | editar a fonte]

  1. 1,0 1,1 INDEMARES. "Banco de Galicia". Consultado o 21 de agosto de 2014. 
  2. 2,0 2,1 2,2 2,3 2,4 {{cita web|url = http://docs.google.com/viewer?a=v&q=cache:VU4aP-R7_JwJ:www.ceida.org/prestige/Documentacion/BancodeGalicia.pdf+%22banco+de+Galicia%22+oceano&hl=es&gl=es&pid=bl&srcid=ADGEESjhtEh2G6swHWMXHL1MfwmX6s8M_dt_82Y1onLEhiXR22MW5h5TamUnK-wsFWBXRV8lA-4rmXiBYw1o5gXoWek5F-QIVHOULSFDg6tA26mmB67usfXoli_SSF3LHlh1GQSYZl3r&sig=AHIEtbQoWpF58mRiXcWnTxpBJQTMm9Ptzg%7Ctítulo = El Banco de Galicia - Una potencial área marina protegida|dataacceso = 21 de agosto de 2014|autor = [[Fondo Mundial para a Natureza|WWF/Adena}}
  3. WWF (2001).
  4. OSPAR Commision (2000).

Véxase tamén[editar | editar a fonte]

Bibliografía[editar | editar a fonte]

Outros artigos[editar | editar a fonte]

Ligazóns externas[editar | editar a fonte]