Rudy Fernández

Rudy Fernández

Real Madrid  – No. 5
Información persoal
Nacemento	4 de abril de 1985 (39 anos) Palma, España
Altura	1,96 m (6 ft 5 in)
Peso oficial	84 kg (185 lb)
Posición	Escolta
Información da carreira
Canteira	Joventut Badalona
NBA Draft	2007 / Rolda: 1 / Elección: 24 Por Phoenix Suns
Carreira	2007−presente
Historial de equipos
Joventut Badalona (2001–2008) Portland Trail Blazers (2008−2011) Real Madrid (2011) Denver Nuggets (2011−2012) Real Madrid (2012−presente)
Premios e galardóns
1× 2º quinteto de rookies da NBA (2009)

Rodolfo "Rudy" Fernández Farrés, nado en Palma (Illas Baleares) o 4 de abril de 1985, é un xogador de baloncesto español que milita nas filas do Real Madrid Baloncesto da Liga Endesa e da selección española. Cunha altura de 1,96 metros, xoga habitualmente na posición de escolta, aínda que tamén xoga ás veces como aleiro. É irmán da ex xogadora de baloncesto Marta Fernández.

Traxectoria

Primeiros anos

Rudy Fernández naceu no barrio de Camp Redó, no seo dunha familia de baloncestistas. O seu pai foi xogador profesional e a súa nai vestiu mesmo a camiseta da selección española. Dende pequeno sempre tivo moito interese polo deporte, practicou fútbol sala na canteira do San José Obrero, equipo da barriada do Rafal de Palma, e baloncesto, até que se decidiu polo segundo. "Rudy sempre tivo un talento innato para calquera deporte de pelota, pero o baloncesto lévao no sangue. A súa irmá Marta e el estaban todo o intre xogando partidos", chegou a confesar o seu pai.

O resto da súa carreira foi vertixinoso. Poucos anos despois de empezar a xogar, o Joventut fichouno e foise a Badalona (Cataluña) sen a súa familia. Madurou, xogou nas diferentes categorías da selección e deuse a coñecer entre os seguidores dos xogadores máis novos. No torneo de L'Hospitalet de 2003 encandeou e empezou a adestrar co equipo ACB, co que xa disputara minutos en 2002 con Manel Comas como adestrador.

Etapa ACB

A verdadeira irrupción de Rudy na ACB foi na tempada 2003-2004, con Aíto García Reneses no banco do DKV. Dende ese momento comezou a ser de vital importancia para o equipo. Disputou 28 minutos por partido e foi convocado pola selección española absoluta ese verán, disputando os Xogos Olímpicos de Atenas. Ese ano fora nomeado xogador máis valioso da Copa do Rei, aínda que o seu equipo perdeu a final. Tamén conseguira a súa canastra favorita: un alley-oop de costas nese mesmo partido, a pase do seu bo amigo Josep Maria Guzmán.

Grazas ao adestramento de Aíto García Reneses Rudy foi mellorando na faceta defensiva. Rudy deixara de ser un mozo prometedor para converterse nunha realidade moi fiable, tanto que lideraba a clasificación de recuperacións por cada balón perdido. Converteuse no líder do seu equipo e conduciu á Penya aos playoffs nas seguintes tempadas. Até o verán de 2006 o seu maior éxito colectivo foi clasificarse para a Euroliga coa escuadra verdinegra, un motivo para retirarse do draft do aquel ano. Ao finalizar o Mundial do Xapón Rudy converteuse, con vinte e un anos, no sexto home da mellor selección española de baloncesto até ese momento.

O 28 de xuño de 2007 foi elixido no Draft da NBA de 2007 no posto 24 por Phoenix Suns, equipo que traspasou os seus dereitos inmediatamente a Portland Trail Blazers e co que asina contrato en xuño de 2008. Na tempada 2007-08 logrou o título de máximo anotador da fase regular da liga española, logrando a designación de mellor xogador da devandita fase, galardón que compartiu con Marc Gasol. Despediuse do Joventut o día 6 de xuño de 2008 nunha emotiva rolda de prensa na que non puido conter as bágoas ao deixar a que foi a súa casa durante dez anos. O 24 de agosto de 2008 a selección española disputou a final dos Xogos Olímpicos de Pequín de 2008 fronte ao combinado de Estados Unidos. Neste partido Rudy anotou 22 puntos en 17 minutos, plantándolle cara a todo un Kobe Bryant, e converteuse no máximo anotador español da final, aínda que finalmente perdendo o encontro.

Etapa NBA

O día 28 de outubro debuta oficialmente na NBA, xogando contra o seu compatriota Pau Gasol, conseguindo Rudy 16 puntos e 4 asistencias. Ademais, no seu primeiro ano, converteuse no primeiro xogador da NBA que conseguiu encestar polo menos unha tripla nos seus primeiros vinte partidos da carreira.

A mediados de xaneiro de 2009, Rudy converteuse no primeiro xogador europeo da historia en ser designado para participar nun concurso de mates da NBA tras ser elixido polos seareiros na páxina web oficial da liga. Fernández conseguiu que 251.868 internautas lle votasen, impóndose na elección a Russell Westbrook de Oklahoma City Thunder (147.279 votos) e a Joe Alexander de Milwaukee Bucks (114.963) que eran os outros dous aspirantes a participar no concurso. Días despois, os adestradores asistentes dos equipos NBA elixiron a Rudy para que que formase parte do equipo dos rookies que habería de enfrontarse aos xogadores de segundo ano no All Star 2009 de Phoenix (Arizona). Xa no concurso de mates, queda en última posición, sendo eliminado en primeira rolda cun total de 84 puntos (42 por mate). O xurado foi apupado polo público ao entender que as puntuacións outorgadas a Rudy eran demasiado baixas. No seu primeiro mate homenaxeou ao falecido Fernando Martín, primeiro español en xogar na NBA, póndose a súa camiseta. Para o segundo mate contou coa axuda de Pau Gasol.

O día 16 de abril de 2009 logrou ser o Rookie que máis triplas anotaba nunha tempada na NBA ao conseguir 159, anotando polo menos unha tripla en 72 de 78 partidos, perdéndose catro deles por lesión.

Estatísticas

Lenda
PX	Partidos xogados	PT	Partidos titular	MPP	Minutos por partido	%TC	Porcentaxe de tiros de campo
%3P	Porcentaxe de tiros de 3	%TL	Porcentaxe de tiros libres	RPP	Rebotes por partido	APP	Asistencias por partido
ROU	Roubos de balón por partido	TPP	Tapóns por partido	PPP	Puntos por partido	Negra	Máximo de carreira

Tempada regular

Ano	Equipo	PX	PT	MPP	%TC	%3P	%TL	RPP	APP	ROU	TPP	PPP
2008–09	Portland	78	4	25.6	.425	.399	.839	2.7	2.0	.9	.2	10.4
Total		78	4	25.6	.425	.399	.839	2.7	2.0	.9	.2	10.4

Playoffs

Ano	Equipo	PX	PT	MPP	%TC	%3P	%TL	RPP	APP	ROU	TPP	PPP
2009	Portland	6	1	27.0	.429	.421	1.000	2.8	1.0	1.3	.5	7.5
Total		6	1	27.0	.429	.421	1.000	2.8	1.0	1.3	.5	7.5

Palmarés

Fernández coa camiseta do DKV Jouventut.

Títulos internacionais de selección

• Medalla de prata no Torneo júnior de Mannheim.
• Medalla de bronce no Campionato de Europa (Categoría Cadete) en Riga.
• Medalla de ouro no Campionato mundial de baloncesto de 2006 no Xapón.
• Medalla de prata no Eurobasket 2007 de España.
• Medalla de prata nos Xogos Olímpicos de 2008 en Pequín.
• Medalla de ouro no Eurobasket 2009 de Polonia.
• Medalla de prata nos Xogos Olímpicos de 2012 en Londres.

Títulos internacionais de club

• Eurocopa FIBA (2006)
• Copa ULEB (2008)
  • MVP (2006)
  • MVP (2008)

Títulos nacionais de club

• Liga Catalá 2005 e 2007.
• Copa do Rei 2008.

Nomeamentos individuais

• Quinteto ideal Eurobasket 2009
• MVP Copa do Rei 2004
• MVP Final da Fiba Cup 2006
• Xogador máis espectacular tempada 05/06 pola revista "Gigantes do Basket".
• Mellor xogador novo de Europa en 2006
• Mellor xogador novo de Europa en 2007
• MVP Liga catalá en 2007
• Quinteto ideal Liga ACB tempada 06/07
• MVP Copa do Rei 2008
• MVP Copa ULEB 2008
• Máximo anotador Liga ACB tempada 07/08
• Líder en recuperacións Liga ACB tempada 07/08
• Quinteto ideal Liga ACB tempada 07/08
• Primeiro xogador non estadounidense en participar no concurso de mates da NBA no ano 2009.
• Rookie que máis triplas conseguiu nunha tempada na historia da NBA, conseguindo un total de 159 triplos anotados.

Véxase tamén

Ligazóns externas

• Páxina web oficial de Rudy Fernández