Eurocopter EC130

Eurocopter EC130
EC130 B4
Tipo	helicóptero utilitario lixeiro
Fabricante	Eurocopter, Airbus Helicopters
Primeiro voo	24 de xuño de 1999
Introducido	2001
Produción	1999-presente
Unidades construídas	Máis de 700

O Eurocopter EC130 (no presente Airbus Helicopters H130) é un helicóptero utilitario lixeiro dun motor desenvolvido a partir do Eurocopter AS350 Écureuil. Un dos principais cambios foi a adopción dun dispositivo Fenestron no lugar dun rotor de cola convencional. Foi lanzado e fabricado polo grupo Eurocopter, que posteriormente pasaría a chamarse Airbus Helicopters.

Desenvolvemento

Durante os anos 80 houbo un considerable interese dentro do fabricante francés Aérospatiale de desenvolver aínda máis o seu exitoso helicóptero AS350 B3 Écureuil, que fora desenvolvido orixinalmente a principios dos 70. O 6 de febreiro de 1987 un prototipo AS350 Z (un AS350 B2 modificado) realizou o seu primeiro voo cun rotor de cola de tipo Fenestron no lugar dun convencional. O programa de probas do AS350 Z prolongouse durante varios anos, recibindo o aparello modificacións adicionais como unha nova toma de aire baseada na do Eurocopter EC120. O AS350 Z contribuíu ao desenvolvemento global do rotor de cola tipo Fenestron.

A principios dos 90 o desenvolvemento do novo helicóptero continuou baixo o mando de Eurocopter (Aerospatiale fusionárase dentro da multinacional Eurocopter). O 24 de xuño de 1999 o primeiro prototipo do EC130 realizou o seu voo de estrea, co piloto de probas australiano Steven Page aos mandos. Entre os principais cambios con respecto o AS350 estaban a adopción dun sistema hidráulico dual, o dispositivo Fenestron pechado, e unha fuselaxe máis ancha para conseguir unha cabina con máis espazo interior.

H130 en Suíza

O EC130 deseñouse en estreita cooperación con operadores turísticos, sendo un deles, Blue Hawaiian Helicopters, o cliente de lanzamento do modelo. O novo helicóptero tiña unha cabina espazosa que podía acomodar ata 7 turistas e poporcionar unha excelente visibilidade exterior. En 2001 o EC130 entrou en servizo con Blue Hawaiian Helicopters, sendo usado para visitas aéreas a áreas escénicas como Hawai e o Gran Canón. O EC130 está dirixido principalmente a operadores comerciais de transporte de pasaxeiros, como empresas de tours aéreos, mentres que o anterior AS350 continuou sendo fabricado e comercializado como un helicóptero utilitario. Vertical Magazine describiu ao EC130 como "un dos helicópteros dun motor máis exitosos para servizo médico aéreo".

En febreiro de 2012 Eurocopter desvelou formalmente o EC130 T2, unha variante actualizada do EC130 cun máis potente motor turboeixo Turbomeca Arriel 2D. O T2 melloraba o rendemento do modelo base; máis do 70% da célula do EC130 T2 era distinta da do modelo EC130 inicial con tiña cambios para mellorar as condicións dos pasaxeiros como un sistema de control de vibración activo e un mellor sistema de aire acondicionado, mentres que o consumo de combustible é un 14% menor. En 2012 Eurocopter recibiu un pedido de 50 EC130 T2 por parte de Maverick Helicopters, e outros clientes como Papillon e Blue Hawaiian aumentaron os pedidos da nova variante á 105 unidades.

O EC130 T2 entrou en servizo no ano 2012. En 2013 Airbus Helicopters informou que ese ano produciría uns 50 EC130 T2s, e que agardaba subir ata 65 unidades por ano en 2014. En agosto de 2013 a subsidiaria brasileira de Airbus Helicopter, Helibras, montou o seu primeiro EC130 T2; o primeiro EC130 T2 montado en Australia chegou en decembro de 2013.

En 2021 Airbus probou unha asistencia eléctrica híbrida nun H130 para estender o tempo de reacción ata 30 segundos durante a transición á autorrotación despois dunha avaría do motor.