Ruxe Ruxe

Na Galipedia, a Wikipedia en galego.
Saltar ata a navegación Saltar á procura
Ruxe Ruxe
R20I-WEB.jpg
OrixeAríns (Santiago de Compostela), Galicia Galiza
Período1996 - actualidade
Xénero(s)Rock
Punk
Folk
Bravú
Selo(s) discográfico(s)Lobicán Records
MembrosVituco Neira
Iago Jorge
Xaco Barona
Xulia Neira
David Barbas
Xan Pericán
Páxina webPáxina oficial

Ruxe Ruxe é un grupo de música galego formado en Aríns (Santiago de Compostela) en 1996. A súa música é rock combinada con sons tradicionais galegos, empregando ás veces instrumentos como a gaita e o saxofón, e sempre con actitude punk. As súas letras son en galego e de temática moi variada nas que predominan os textos costumistas, os de carácter social e o realismo máxico.

Até o momento sacaron á venda doce discos e teñen feito concertos por toda España, Portugal e Italia. As súas cancións téñense utilizado nalgúns programas de televisión e mesmo filmes.

Historia[editar | editar a fonte]

Foi formado en Aríns en 1996 por catro amigos do instituto: Vituco Neira (voz e guitarra), Xan Carlos Pérez "Jimmy" (guitarra), Xaco Barona (gaita e pandeireta) e Xan Rico, coñecido como "Xan Pericán" (frauta, saxofón e harmónica).[1][2] Tras realizar unha maqueta,[3] en 1999 sacaron o seu primeiro disco, de título Ruxe-Ruxe, composto por oito cancións,[4] e ao ano seguinte saíu á co selo Clave Records, Non temos medo, un traballo que constou de 14 temas e que foi gravado e mesturado en Madrid. Neste punto a banda estaba formada por nove membros;[5] ademais dos fundadores integraban o grupo Marcos Colomar (guitarra), Xulio Sé (violín), Cándido Rodríguez (baixo), Miguel Pérez (batería), Sebastián Méndez (acordeón). Ademais Guillermo Meizoso tocou a harmónica en "Land Rover", canción que pechaba o disco.[6]

En 2002 sacaron ao mercado o seu terceiro LP, titulado A terra dos comentos, con 17 temas gravados na Casa de Tolos, en Mañufe, o estudio de Segundo Grandío, baixista de Siniestro Total.[1] Contou coas colaboracións do Maestro Reverendo, de Antón Díaz dos Papaqueixos, de Liñaceira e de Pinto d'Herbón.[7] Ademais realizaron unha curtametraxe titulada Carne pendurada, na que de xeito humorístico contaban a súa busca dun novo guitarrista para o grupo. Dirixiuno D.F. Vieites e protagonizárono os propios membros do grupo e o actor Manuel Cortés.[8][1]

No 2004 publicaron Fervendo, un disco autoeditado con 13 novos temas, que foi presentado na Sala Capitol de Santiago.[9] Para este disco entraron Alberte no acordeón e Tonecho na batería, e contou con varias colaboracións, entre elas as de Xosé Bocixa, Julián Hernández, Maestro Reverendo, Alonso Caxade e Mario César Vila (Túzaros).[10] O tema "Ás escuras", foi a cuarta canción máis votada ese ano na Polskie Radio (Radio Estatal de Polonia) polos seus oíntes.[11]

Dous anos despois, en 2006, saíu á luz o seu quinto disco, titulado Comercial.[12] Foi editado polo selo Pai Música e contiña 11 cancións. Para este traballo houbo cambios na formación entrando Martín Zapata (guitarra e coros), Óscar Nanuk (baixo) e Álex Sevilla (batería), e saíndo Alberte, Tonecho, Cándido e Marcos Colomar.[1] Ademais Miguel Costas colaborou cantando no tema "Ié-Ié". Na xira de presentación deste disco chegaron a dar máis de cincuenta concertos ao redor de toda a península. En maio de 2007 deron un concerto xunto a Zënzar no barrio de Monte Alto en memoria do anarquismo coruñés e a represión franquista sufrida nas Atochas en 1937.[13] Tamén ese ano participaron cunha versión de "A tropa da tralla" na gravación do disco 120 capadores, homenaxe a Os Diplomáticos de Monte-Alto, xunto a NAO, Zënzar, Pulpiño Viascón, Dixebra ou Lamatumbá entre outros.[14]

Vituco Neira, vocalista e guitarrista de Ruxe Ruxe.

En 2008 publicaron Xigantes, un disco con doce temas, para o que entrou no grupo o baixista Antón Fernández "Torroncho", substituíndo a Óscar Nanuk[1]. Con este disco na rúa realizaron unha xira de trinta concertos por Galicia e tamén por fóra, actuando en sitios como Euskadi ou as illas Azores.[15] En marzo de 2010 saíu á luz o seu sétimo disco, Na fura de diante, da man do seu propio selo, Lobicán Records. Foi gravado nos Océano Estudios de Javier Abreu en Patos e masterizado nos Ánxeles por Tom Baker.[16] Un mes antes da saída do disco publicaron un videoclip do tema "Buratos", dirixido por Jairo Iglesias e protagonizado polos membros do grupo así como por Markinhos Drinkin, de Medomedá.[17] Pouco despois houbo un cambio na batería, deixando o grupo Martín Zapata e entrando Miguel Duarte no seu lugar.[18][19]

En 2012 publicouse Máis cancións sobre toxos, cardos e silveiras, oitavo disco da banda, gravado de novo no estudio de Nigrán e co selo Lobicán. Estaba formado por 17 cancións e colaboraron nel Xabier Díaz, Dios ke te crew, Xosé Bocixa, Roi Maceda de Quempallou e Esteban de Skacha.[20] O seu seguinte disco saíu dous anos despois e levou por título Némesis, con Carlos Freire no baixo e contando de novo coas colaboracións de Bocixa e de Esteban de Skacha, así como de Isidro Cea e das Pandereteiras Bouba.[21] Foi presentado na Sala Capitol de Santiago de Compostela, con Josito Porto e Biribirloque como abreconcertos.[22][3]

Ruxe Ruxe no Arde o Pazo (Mos), en 2010

En 2015 saíu o décimo disco do grupo, Un mundo perfecto, con 14 novos temas gravados por Iago Pico no Estudios Pousada Son de Ames.[23] Foi presentado o 18 de abril na Capitol.[24] En xuño dese ano estreouse no Teatro Principal de Santiago Sempre Adiante, un documental sobre o grupo, dirixido por Jairo Iglesias.[25][26] O 25 de xullo dese ano, durante as festas do Apóstolo, celebraron os seus 20 anos cun concerto na praza da Quintana en Santiago, e a finais de ano publicaron 20 segundos, undécimo disco da banda.[27]

En xuño de 2019, publicaron unha nova canción e videoclip, "Alfaia punk", con cambios na formación: saíron Miguel Duarte e Carlos Freire e entraron Xulia Neira ao baixo e David Barbas á guitarra, ademais do batería Iago Jorge que entrara no grupo un par de anos antes.[28][29][30] En 2020, tras catro anos sen sacar disco, publicaron O estraño falar dun monstro da aldea, un disco con 13 novas cancións gravado en Andoain, nos estudos de Kaki Arkarazo (Negu Gorriak, Nación Reixa).[2]

Membros[editar | editar a fonte]

Antigos membros[editar | editar a fonte]

Discografía[editar | editar a fonte]

Notas[editar | editar a fonte]

  1. 1,0 1,1 1,2 1,3 1,4 "Biografía de Ruxe Ruxe". lafonoteca.net (en castelán). Consultado o 18 de febreiro de 2020. 
  2. 2,0 2,1 "Ruxe Ruxe e o orgullo rock da aldea". Nós Diario. 13 de febreiro de 2020. Consultado o 18 de febreiro de 2020. 
  3. 3,0 3,1 "Ruxe ruxe, radical Némesis". Faro de Vigo. 2 de maio de 2014. Consultado o 20 de febreiro de 2020. 
  4. "Ruxe-Ruxe (1999)". rx.ruxeruxe.com. Consultado o 19 de febreiro de 2020. 
  5. "Os afoutados Ruxe-Ruxe". 10 de outubro de 2000. Consultado o 18 de febreiro de 2020. 
  6. "Non temos medo / Ruxe Ruxe". Xunta de Galicia. Consultado o 18 de febreiro de 2020. 
  7. "A terra dos comentos / Ruxe Ruxe". Xunta de Galicia. Consultado o 18 de febreiro de 2020. 
  8. "Ruxe-Ruxe - Carne Pendurada". Youtube. Consultado o 18 de febreiro de 2020. 
  9. "Ruxe-Ruxe leva os sons do seu novo disco, «Fervendo», á Capitol". La Voz de Galicia. 10 de xuño de 2004. Consultado o 19 de febreiro de 2020. 
  10. "Ruxe Ruxe ‎– Fervendo". Discogs. Consultado o 19 de febreiro de 2020. 
  11. "Ruxe Ruxe en Komunikando.net". Arquivado dende o orixinal o 25 de xuño de 2009. Consultado o 22 de maio de 2009. 
  12. "Ruxe-Ruxe: nuevo disco (Comercial) y nueva web" (en castelán). 16 de outubro de 2006. Consultado o 19 de febreiro de 2020. 
  13. "En memoria del anarquismo coruñés". El País (en castelán). 13 de maio de 2007. Consultado o 19 de febreiro de 2020. 
  14. "O bravú regresa coa forza de '120 capadores'". Vieiros). 6 de decembro de 2007. Consultado o 19 de febreiro de 2020. 
  15. "Como follas de almanaque". Galicia Hoxe. 27 de abril de 2008. Consultado o 19 de febreiro de 2020. 
  16. "Ruxe Ruxe leva a Radio Obradoiro o seu novo paso: 'A fura de adiante'". El Correo Gallego. 6 de marzo de 2010. Consultado o 20 de febreiro de 2020. 
  17. "Os Ruxe-Ruxe adiantan o seu disco na web e presentan vídeo". Vieiros. 3 de febreiro de 2010. Consultado o 20 de febreiro de 2020. 
  18. "Martín Zapata, no es lo que creéis" (en castelán). 16 de outubro de 2012. Consultado o 20 de febreiro de 2020. 
  19. "E o elixido é.....MIGUEL DUARTE!!!". Facebook. Consultado o 20 de febreiro de 2020. 
  20. "Ruxe-Ruxe volve con forza renovada en Máis cancións sobre toxos, cardos e silveiras" (en castelán). 15 de marzo de 2012. Consultado o 20 de febreiro de 2020. 
  21. "Némesis". Bandcamp. Consultado o 20 de febreiro de 2020. 
  22. "Ruxe Ruxe presentou Némesis na Capitol". Consultado o 20 de febreiro de 2020. 
  23. "Ruxe-Ruxe presenta su 'mundo perfecto' en la Capitol". Diario de Pontevedra (en castelán). 16 de abril de 2015. Consultado o 20 de febreiro de 2020. 
  24. "Ruxe Ruxe presentou en Santiago "Un mundo perfecto"". El Correo Gallego. 16 de abril de 2015. Consultado o 20 de febreiro de 2020. 
  25. "SEMPRE ADIANTE de Jairo Iglesias". Ruxeruxe.com. Consultado o 20 de febreiro de 2020. 
  26. "«Somos vella escola, os anos pasan»". La Voz de Galicia. 20 de xuño de 2015. Consultado o 20 de febreiro de 2020. 
  27. "Ruxe Ruxe celebra o seu 20 aniversario cun novo disco". Consultado o 20 de febreiro de 2020. 
  28. Ramos, Rocío (11 de febreiro de 2020). "Ruxe Ruxe estrena disco y lo presenta en la sala Capitol". La Voz de Galicia (en castelán). Consultado o 20 de febreiro de 2020. 
  29. "Ruxe Ruxe". gzmusica. Consultado o 20 de febreiro de 2020. 
  30. "Ruxe Ruxe inxecta melodía ao punk no seu novo clip". Nós Diario. 13 de xuño de 2019. Consultado o 20 de febreiro de 2020. 

Véxase tamén[editar | editar a fonte]

Ligazóns externas[editar | editar a fonte]