Felipe González

Felipe González
Felipe González no 2015
75.º Presidente do Goberno de España 3.er período da Constitución de 1978
2 de decembro de 1982 – 5 de maio de 1996
Monarca	Xoán Carlos I
Vicepresidente	Alfonso Guerra (1982–1991) Narcís Serra (1991–1995)
Precedido por	Leopoldo Calvo-Sotelo (UCD)
Sucedido por	José María Aznar (PP)
Secretario Xeral do PSOE
13 de outubro de 1974 – 21 de xuño de 1997
Precedido por	Dirección colexiada
Sucedido por	Joaquín Almunia
Deputado por Madrid
15 de xuño de 1977 – 5 de abril do 2000
Deputado por Sevilla
12 de abril do 2000 – 2 de abril do 2004
Datos persoais
Nacemento	5 de marzo de 1942 (81 anos) Sevilla
Partido	Partido Socialista Obreiro Español (PSOE)
Cónxuxe/s	Mar García Vaquero (2012–presente) Carmen Romero (1969–2008)
Fillos	3
Profesión	Avogado, político
Alma máter	Universidade de Sevilla
Na rede
Sinatura

Felipe González Márquez, nado en Sevilla o 5 de marzo de 1942, é un avogado, profesor universitario e político andaluz, secretario xeral do Partido Socialista Obreiro Español (PSOE) dende 1974 até 1997 e terceiro presidente do Goberno de España dende a reinstauración da democracia, entre 1982 e 1996.

Traxectoria

En 1964, afiliouse ó Partido Socialista Obreiro Español, durante a época de clandestinidade deste. O ano seguinte finalizou os seus estudos de Dereito na Universidade de Sevilla. No Congreso de Suresnes de 1974 do PSOE renovado (escisión do PSOE dirixido por Rodolfo Llopis), Felipe González foi elixido secretario xeral do PSOE. Xa en democracia, obtivo a súa primeira acta de deputado en 1977, sendo o candidato do PSOE á Presidencia do Goberno en 1977 e 1979.

Logo de obter o PSOE a maioría absoluta nas eleccións de 1982, foi investido presidente do Goberno. O seu mandato de trece anos e medio foi o período máis longo dun xefe de Goberno da democracia en España. Baixo a súa dirección, o PSOE logrou dúas maiorías absolutas consecutivas: a de 1982, con 202 deputados no Congreso, e en 1986, eleccións nas que obtivo 184 deputados; asemade, en 1989 obtivo 175 deputados, exactamente a metade dos que compoñen o hemiciclo. En 1993 perdeu a maioría absoluta, obtendo 159 deputados. Logo deste resultado, o PSOE pactou con Convergència i Unió para poder formar goberno. En 1996, perdeu as eleccións ó lograr 141 deputados fronte a 156 que conseguiu o Partido Popular. Foi elixido deputado por última vez en 2000, ano no que concorreu ás eleccións na lista do PSOE pola circunscrición electoral de Sevilla.

Véxase tamén

Bibliografía

• Jiménez Díaz, José Francisco (2009). "El liderazgo político de Felipe González en contexto". Sociedad y utopía: Revista de ciencias sociales (Madrid: Universidade Pontificia de Salamanca) (33): 287–312. ISSN 1133-6706. 
• Wilsford, David, ed. Political leaders of contemporary Western Europe: a biographical dictionary (Greenwood, 1995) pp 176–82