ARN nuclear pequeno

Na Galipedia, a Wikipedia en galego.

O ácido ribonucleico nuclear pequeno ou snRNA (small nuclear RNA) é un tipo de molécula pequena de ARN que se encontra no núcleo da célula eucariota. Son transcritos pola ARN polimerase II ou pola ARN polimerase III e están implicados en moitos procesos importantes como o splicing do ARN (eliminación de intróns dos pre-ARN), regulación de factores de transcrición (caso do snRNA 7SK) ou da ARN polimerase II (caso do snRNA B2), e no mantemento dos telómeros e regulación da expresión xénica. Están sempre asociados con proteínas específicas, e forman con elas complexos denominados ribonucleoproteínas nucleares pequenas (snRNP) xeralmente pronunciadas "snurps". Teñen xeralmente uns 150 nucleótidos de lonxitude.

Un exemplo é o snRNA 7SK (ás veces chamado RN7SK), cuxa función se descubriu recentemente, e está relacionada coa regulación da transcrición.[1][2] O 7SK RNA únese ao complexo CDK9/ciclina T (coñecido como factor de elongación P-TEFb). O P-TEFb activa a transcrición fosforilando o dominio C-terminal da ARN polimerase II. Este proceso está regulado negativamente pola ribonucleoproteína 7SK da que este ARN forma parte.[3][4]

Outrro exemplo é o snRNA B2, que se une directamente á ARN polimerase II con grande afinidade e inhibe a transcrición en células de rato sometidas a un choque térmico [5].

Os snRNA máis coñecidos son os que forman parte das ribonucleoproteínas do espliceosoma. Son os snRNA U1, U2, U4, U5 e U6, aos que hai que engadir outros menos frecuentes como os snRNA U11, U12, U4atac e U6atac.

Moitos ARN nucleares pequenos poden atoparse no citoplasma, onde se asocian a proteínas, e despois volven ao núcleo, como ocorre cos ARN do espliceosoma.


Outros ARN pequenos[editar | editar a fonte]

No núcleo existen outros ARN de pequeno tamaño, que se clasifican en grupos á parte. Son:

ARN nucleolar pequeno[editar | editar a fonte]

No núcleo da célula existe un grupo de ARNs pequenos, que están asociados co funcionamento do nucléolo e que forman unha familia á parte. Reciben o nome de ARN nucleolares pequenos ou snoRNA (Small nucleolar RNA). Estes pequenas moléculas de ARN exercen unha importante función na bioxénese dos ribosomas e dirixen a modificación química do ARNr e outros ARN (ARNt e snRNA). Están localizados fundamentalmente no nucléolo e nos corpos de Cajal das células eucarióticas.

Artigo principal: ARN nucleolar pequeno.

ARN interferente[editar | editar a fonte]

Son ARN de moi pequeno tamaño (poucas decenas de nucleótidos), que interveñen na regulación xénica, mediante o fenómeno da interferencia de ARN ou ribointerferencia. Son: microARN (ou miRNA), siRNA e piRNA[6] [7].

Notas[editar | editar a fonte]

  1. Blencowe, BJ (2002). "Transcription: surprising role for an elusive small nuclear RNA". Curr Biol 12 (4): R147–149. DOI:10.1016/S0960-9822(02)00711-X. PMID 11864590.
  2. "Entrez Gene: RN7SK RNA, 7SK, nuclear". http://www.ncbi.nlm.nih.gov/sites/entrez?Db=gene&Cmd=ShowDetailView&TermToSearch=125050.
  3. Nguyen VT, Kiss T, Michels AA, Bensaude O (2001). "7SK small nuclear RNA binds to and inhibits the activity of CDK9/cyclin T complexes.". Nature 414 (6861): 322–5. DOI:10.1038/35104581. PMID 11713533.
  4. Yang Z, Zhu Q, Luo K, Zhou Q (2001). "The 7SK small nuclear RNA inhibits the CDK9/cyclin T1 kinase to control transcription.". Nature 414 (6861): 317–22. DOI:10.1038/35104575. PMID 11713532.
  5. Espinoza C. et al. (2004). "B2 RNA binds directly to RNA polymerase II to repress transcript synthesis". Nature publishing group.[[1]]
  6. Kim V. N. (2006). "Small RNAs just got bigger: Piwi interactin RNAs in mammalian testes.". CSH. [[2]]
  7. Kim V. N. (2005). "Small RNAs: Classification, biogenesis, and function.". Cell. Mol 19: 1-15.