Este é un dos 1000 artigos que toda Wikipedia debería ter

Marco Polo

Na Galipedia, a Wikipedia en galego.
Saltar ata a navegación Saltar á procura

Marco Polo
Marco Polo portrait.jpg
Nacementoc. 1254
 probabelmente en Venecia, Italia
Falecemento9 de xaneiro de 1324
 Venecia, República de Venecia
SoterradoIgreja de San Lorenzo
NacionalidadeRepública de Venecia
EtniaPobo italiano
Ocupaciónmercador, explorador
PaiNiccolò Polo
CónxuxeDonata Badoer
FillosFantina Polo
Coñecido/a porLe Divisament dou monde
editar datos en Wikidata ]

Marco Polo, nado en Venecia c. 15 de setembro de 1254 e finado tamén en Venecia o 9 de xaneiro de 1324[1], foi un viaxante veneciano do final da Idade Media. Xuntamente co seu pai, Nicolau Polo, e o seu tío, Maffeo, foi dos primeiros occidentais en percorrer a Ruta da Seda. O seu relato detallado das súas viaxes polo oriente, incluíndo a China, foron durante moito tempo unhas das poucas fontes de información sobre a Asia no occidente.

Traxectoria[editar | editar a fonte]

A primeira viaxe[editar | editar a fonte]

Os mercadores de Venecia, coñecidos comerciantes e viaxeiros, viaxaron moito en busca de mercadorías e clientes, mais poucos chegaron tan lonxe coma os Polo. Na familia Polo houbo outros exploradores ademais de Marco. O seu pai Nicolau (ou Nicolò, en veneciano) e o seu tío Mateo (ou Maffio) eran prósperos mercadores dedicados ao comercio con Oriente. Ambos partiron cara a Asia en 1255 e alcanzaron a China en 1266, chegando a Khanbaliq cerca de Pequín. Volveron da China como enviados do Kublai Khan cunha carta para o Papa na que pedía que enviase a xente ilustrada que ensinase no seu imperio, para informar os mongois sobre a súa forma de vida.

Existe unha tradición que di que a familia Polo procedía da illa de Curzola no Mar Adriático (actualmente Korcˇula, parte de Croacia). Non é seguro, pois existen probas reais a favor e en contra desta afirmación, sen rexistros definitivos que permitan discernir a verdade. A cidade de Korcˇula segue conservando unha vella casa da que se di que é onde naceu Marco. Sexa ou non verdade, os Polo gañaron preeminencia en Venecia e son historicamente considerados venecianos.

A segunda viaxe[editar | editar a fonte]

Mateo e Nicolau Polo partiron nunha segunda viaxe, coa resposta do Papa a Khublai Khan, en 1271. Esta vez Nicolau levou a Marco, quen axiña gañou a confianza de Khublai Khan, quen o fixo o seu conselleiro. Pouco despois Marco pasou a ser emisario do Khan. Nos seus dezasete anos de servizo ao Khan, Marco Polo chegou a coñecer as vastas rexións da China e os numerosos logros da civilización chinesa, moitos dos cales eran máis avanzados cós contemporáneos europeos.

Il Milione[editar | editar a fonte]

Miniatura da obra

Ao seu regreso da China en 1295, a familia estableceuse en Venecia, onde se converteu nunha sensación e atraeu multitudes de oíntes, que a duras penas crían as súas historias sobre a afastada China.

O seu impaciente carácter levou a Marco Polo a tomar parte na batalla naval de Curzola/Korčula entre Xénova e Venecia en 1298. Foi capturado e pasou os poucos meses do seu cativerio ditando un detallado relato das súas viaxes polas descoñecidas rexións orientais. O seu libro, Il Milione ("O millón", coñecido en galego como As viaxes de Marco Polo) foi escrito en provenzal e traducido axiña a moitas linguas europeas. O orixinal perdeuse e consérvanse varias versións, con frecuencia contraditorias, das traducións. O libro converteuse de inmediato nun éxito. As historias do libro foron consideradas fantasiosas polos seus contemporáneos.

A veracidade da viaxe[editar | editar a fonte]

Casa de Curzola na que naceu Marco Polo

No seu leito de morte, a súa familia pediulle a Marco que confesase o que había de mentiras nas súas historias. Marco negouse, insistindo, «Só contei a metade do que vin!».

Mentres a maioría dos historiadores cren que Marco Polo efectivamente chegou á China, recentemente algúns propoñen que non chegou tan lonxe, e que simplemente contou a información que lles ouvía a outros. Estes escépticos sinalan que, entre outras omisións, o seu relato falla ao non mencionar a escritura chinesa, os palillos, o , a vendaxe de pés nin a Gran Muralla. Ademais, os arquivos chineses da época non o mencionan, a pesar de que afirmaba ter servido como emisario especial de Kublai Khan, o que resulta insólito, dado o coidado co que se levaban os arquivos na China naquel tempo.

Por outra parte, Marco describe outros aspectos da vida no Afastado Oriente con moito detalle: o papel moeda, o Gran Canal, a estrutura do exército mongol, os tigres e o sistema postal imperial. Tamén se refire a Xapón polo seu nome chinés, Zipang ou Cipango. Isto está considerado normalmente a primeira mención do Xapón na literatura occidental.

Impacto histórico[editar | editar a fonte]

Aínda que os Polo non foron os primeiros europeos en chegar a China por terra, grazas ao libro de Marco a súa viaxe foi a primeira en ser coñecida amplamente e a mellor documentada ata entón.

A lenda conta que Marco Polo introduciu en Italia algúns produtos de China, entre eles os xeados, a piñata e a pasta, especialmente os espaguetes. Porén, esta lenda está moi cuestionada. Por exemplo, hai probas de que a pasta xa se coñecía en Grecia e Italia dende a antigüidade.

O libro escrito por Marco Polo, a pesar de que moitas das súas aseveracións se puxeron en dúbida naquela época, inspirou a moitos viaxeiros e exploradores.

Notas[editar | editar a fonte]

  1. Bergreen, Laurence (2007), Marco Polo: From Venice to Xanadu, Londres: Quercus

Véxase tamén[editar | editar a fonte]

Bibliografía[editar | editar a fonte]

Ligazóns externas[editar | editar a fonte]