Malmö

Na Galipedia, a Wikipedia en galego.

Coordenadas: 55°35′N 13°02′L / 55.583, -13.033

Malmö
Malmö fulla vapen.svg
Malmö collage.PNG
Imaxes da cidade
Situación xeográfica
Malmö en Suecia
Malmö
Malmö
País Flag of Sweden.svg Suecia
Provincia Escania
Condado Escania
Concello Concello de Malmö
Concello de Burlöv
Xeografía
Altitude msnm
Superficie 158,4 km²
Poboación
Poboación 303,873 hab. (2012)
Densidade 3,651 hab/km²
Información
Código postal
Alcalde Ilmar Reepalu
Páxina web Páxina oficial de Malmö

Malmö, situada no Condado de Escania (Skåne, en sueco), é a terceira cidade máis grande de Suecia con 270.000 habitantes. O seu desenvolvemento vai dende a industrialización ata converterse aos poucos nunha cidade universitaria.

Historia[editar | editar a fonte]

Idade Media[editar | editar a fonte]

Cidade fortificada de Malmö, segundo o Civitates orbis terrarum (1588).

Considérase que Malmö foi fundada entre os séculos XII e XIII, cando a rexión de Escania pertencía ao reino de Dinamarca. Nos anos 1200 erixiuse unha pedanía costeira entre a igrexa de Copenhaguen e o arcebispado de Lund. Máis tarde ordenouse construír unha fortaleza no mesmo punto. A partir de 1275 podíase cruzar o estreito de Øresund por barco, o cal impulsou o desenvolvemento comercial de Malmö ao estar dentro da ruta da Liga Hanseática.[1]

En 1319 comezaron as obras da Igrexa de San Pedro, a primeira igrexa gótica de ladrillos dentro das fronteiras actuais de Suecia.

Xa no século XV, Malmö superara en importancia a Lund e era unha das cidades máis poboadas de Dinamarca con aproximadamente 5000 habitantes, un importante mercado e unha puxante industria pesqueira de arenques.[1] Durante o reinado de Erico de Pomerania produciuse a creación da aduana de Øresund (1429), a construción do primeiro castelo de Malmö (1434) e a entrega en 1437 do escudo de armas local: unha cabeza de grifón, máis tarde convertida en símbolo representativo de Escania. Malmö foi tamén un dos primeiros lugares escandinavos que adoptou o luteranismo durante a reforma protestante.

A estrutura orixinal do castelo de Malmö foi derruída a comezos do século XVI, e o rei Cristián III de Dinamarca ordenou a súa reconstrución na década de 1530. Entre 1568 e 1573, a fortaleza foi tamén a prisión de James Hepburn, IV conde de Bothwell, terceiro marido da raíña María I de Escocia.[2]

Idade Moderna[editar | editar a fonte]

Durante todo o século XVII, a rexión histórica de Skåneland no sur da península escandinava foi obxecto de disputa entre Dinamarca e Suecia. Logo da segunda guerra sueco-danesa, o monarca Carlos X Gustavo de Suecia logrou a anexión de Escania mediante o Tratado de Roskilde.[3] A partir do 28 de febreiro de 1658, Malmö quedaría baixo control do reino de Suecia e iniciouse a asimilación cultural de toda a poboación.[3] Tres meses máis tarde estalaría outra guerra entre ambos reinos que concluíu en 1660 coa firma do Tratado de Copenhaguen, certificando a soberanía sueca. En 1677, en plena Guerra Escanesa, máis de 14.000 soldados daneses asediaron o pobo fortificado durante case un mes, pero foron derrotados polos 2000 militares suecos que a defendían.

Os conflitos continuaron a comezos do século XVIII, cando as tropas danesas entraron en Malmö durante a Gran Guerra do Norte (1709). Un ano despois, o batallón sueco a cargo do xeneral Magnus Stenbock logrou expulsar aos daneses e retomar o control. Todos estes episodios, sumados á chegada da peste bubónica, rebaixaron a poboación local a pouco máis de 300 habitantes na década de 1720.

As autoridades suecas asumiron a reconstrución de Malmö cando a situación xa se había estabilizado. Ademais da inauguración dun novo porto en 1775, desenvolvéronse servizos básicos como escolas, hospitais, a central eléctrica e unha planta de tratamento de augas residuais.[1]

Idade Contemporánea[editar | editar a fonte]

A cidade viviu unha época de esplendor grazas ao novo porto e ao comezo da Revolución Industrial. Houbo dous feitos que contribuíron a iso. Por unha banda, o empresario Frans Suell dedicouse a importar tabaco de América do Norte ao resto de Europa durante a Revolución das Trece Colonias, e máis tarde o porto explotaríase como ruta de contrabando durante as Guerras Napoleónicas.[4] E doutra banda, o navieiro Frans Henrik Kockum fundou o astillero Kockums Naval en 1840, o que levou a especialización de Malmö no sector industrial.[5][6] Finalmente, o negocio local viuse impulsado en 1856 coa inauguración do ferrocarril entre Malmö e Lund, ampliado en 1874 ata Katrineholm.

En 1870, Malmö superara a Norrköping como a terceira cidade sueca máis habitada, e en 1900 a súa poboación pasaría os 60.000 habitantes. Ao longo do século XX, a chegada de inmigrantes (suecos e estranxeiros) motivou a construción de novas zonas residenciais e vivendas de protección oficial repartidas polo municipio de Malmö. Todas esas casas construíronse baixo o proxecto polo millón de vivendas.[7]

Porén, na década de 1970 produciuse unha grave crise económica que afectou aos astilleros suecos. Kockums tivo que ser rescatada polo estado, e en 1986 cesou toda a produción de barcos civís para especializarse en buques militares, coa consiguiente destrución de empregos. Ademais, moitas familias de clase media mudáronse a cidades dormitorio como Vellinge, Lomma e Staffanstorp.

Ante esa situación, o municipio apostou pola reconversión industrial a través de dotacións culturais, da remodelación do barrio portuario (Västra Hamnen) e de importantes obras arquitectónicas para reducir o desemprego.[8] Parte dos edificios do antigo estaleiro foron rehabilitados para albergar outras instalacións, tales como o campus da Escola Superior de Malmö (1998).[9] No 2000 inaugurouse o ponte de Øresund que conecta a Malmö con Dinamarca a través do mar Báltico,[10] e en 2005 completáronse as obras do Turning Torso, un rañaceos residencial de 190 metros deseñado por Santiago Calatrava.[11] O xesto que confirmou a transformación de Malmö foi o desmantelamento da guindastre Kockums en 2002. Por outra banda, o centro urbano viviu un proceso de gentrificación.[7]

Malmö foi sede do Festival de Eurovisión en dúas ocasións: 1992 (no Malmö isstadion) e 2013 (no Malmö Arena).[12]

Notas[editar | editar a fonte]

  1. 1,0 1,1 1,2 "Malmö history". malmo.com (en inglés). Consultado o 3 de xuño de 2016. 
  2. "Les Affaires du Conte de Boduel - A translation of Bothwell's Memoirs". www.marie-stuart.co.uk (en inglés). Consultado o 3 de xuño de 2016. 
  3. 3,0 3,1 "Freden i Roskilde - Roskildefreden (1658)". www.sydsverige.dk (en danés). Consultado o 3 de xuño de 2016. 
  4. Bylund, Jesper. "Tobaksindustri". Malmö Stad (en sueco). Consultado o 3 de xuño de 2016. 
  5. "The Stirling Engine: an engine for the future". Saab Solutions (en inglés). Consultado o 3 de xuño de 2016. 
  6. Bylund, Jesper. "Kockums". Malmö Stad (en sueco). Consultado o 3 de xuño de 2016. 
  7. 7,0 7,1 "Malmö: una pequeña gran ciudad". geoface.es. Consultado o 3 de xuño de 2016. 
  8. "Eurovision 2013: Discover the transformation of Malmö". ESCToday (en inglés). 8 de maio de 2013. Consultado o 3 de xuño de 2016. 
  9. "Malmö University". Study in Sweden (en inglés). Consultado o 3 de xuño de 2016. 
  10. "Así es el puente escandinavo que asombra en las redes". El País. 10 de febreiro de 2016. Consultado o 3 de xuño de 2016. 
  11. "Calatrava, premio '10 year Award' por su edificio Turning Torso". El Mundo. 7 de agosto de 2015. Consultado o 3 de xuño de 2016. 
  12. "La ciudad sueca de Malmö acogerá Eurovisión 2013". El País. 9 de xuño de 2012. Consultado o 10 de xuño de 2016. 

Véxase tamén[editar | editar a fonte]

Ligazóns externas[editar | editar a fonte]