Distribución de GNU/Linux

Na Galipedia, a Wikipedia en galego.
Mapa da evolución das distribucións de GNU/Linux ao longo do tempo.

Unha distribución de GNU/Linux, tamén chamada distro, é unha variante dese sistema operativo que incorpora determinados paquetes de software e configuracións para satisfacer as necesidades dun grupo específico de usuarios. Unha distribución é o modo habitual de instalar GNU/Linux.

A base de cada distribución inclúe o kernel Linux e software do proxecto GNU e de moitos outros proxectos e grupos de software, como BSD, Xorg, Apache, MySQL, PostgreSQL, Perl, Python, PHP, Gnome e KDE.

Actualmente existen centos de distribucións, e o seu uso está cada vez máis extendido. Algunhas das distribucións de GNU/Linux máis populares a día de hoxe son: Ubuntu, Fedora, Linux Mint, openSUSE, Mandriva, Debian, Sabayon, Puppy Linux, Arch Linux e PCLinuxOS. En Galicia, a Universidade de Vigo está desenvolvendo Trisquel GNU/Linux, unha das poucas distribucións aprobadas pola Free Software Foundation por conter unicamente software libre.

Orixe[editar | editar a fonte]

En 1991, Linus Torvalds publicou o kernel Linux. Nese momento, soamente se podía interactuar co kernel a través dunha serie de ordes básicas. A pesar de que o software para usar xa existía, grazas ao proxecto GNU e a outros, era o propio usuario o que debía compilar os programas e configuralos para poder empregalos. Incluso para un hacker, non era un sistema cómodo, e xurdiu a necesidade de facer dispoñible unha recompilación de programas precompilados que puidese ser instalado e empregado de xeito doado. E así xurdiron as distribucións de GNU/Linux.

As distros comezaron a ter unha certa popularidade a mediados dos anos 90, como unha alternativa libre para os sistemas operativos Microsoft Windows e Mac OS, principalmente por parte de persoas acostumadas a usar sistemas UNIX na escola e no traballo. O sistema fíxose popular máis adiante tamén no escritorio, pero sobre todo no campo dos servidores.

Diferenzas[editar | editar a fonte]

As diferenzas entre unhas distribucións e outras poden ser moi diversas. Dunha a outra distribución poden variar factores tales como a estabilidade, o ambiente de escritorio no que se especializan, o sistema de instalación e configuración, a cantidade de paquetes de software dispoñibles, a estrutura do sistema de ficheiros, etc.

Un aspecto de discrepancia entre unhas distros e outras é a frecuencia coa que sacan novas versións. Dende este punto de vista, podemos atoparnos con distribucións que planifican o lanzamento de novas versións seguindo patróns de tempo regulares (coma Ubuntu), outras que sacan novas versións cando consideran que todo está listo (coma Debian), e mesmo distros que non sacan versións, senón que van actualizando o software a medida que se publican novas versións de cada aplicacións (rolling release, coma Arch Linux).

Ademais, unha distribución pode estar dirixida cara un grupo de usuarios moi específico. Existen distribucións especializadas en servidores, outras para seguridade informática, hainas específicas para oficina, para o ambiente das PEMEs, etc.

Estandarización[editar | editar a fonte]

Existen algúns proxectos para poñer en común algúns aspectos en todas as distribucións de GNU/Linux por motivos de pragmatismo.

Linux Standard Base é un proxecto da Linux Foundation coa finalidade de desenvolver unha cooperación estreita entre as diferentes distribucións de cara ás versións das aplicacións que sacan para facilitar o desenvolvemento de aplicacións para todas as distribucións.

O Filesystem Hierarchy Standard é unha importante ferramenta da organización para lograr unha certa normalización na xerarquía do sistema de ficheiros.

Alien é unha aplicación para poder converter paquetes entre múltiples formatos de distribución como deb, rpm ou tgz.

Galería de imaxes[editar | editar a fonte]

Véxase tamén[editar | editar a fonte]

Ligazóns externas[editar | editar a fonte]