Cigala

Na Galipedia, a Wikipedia en galego.
Cigala / Lagostino
Nephrops norvegicus
Nephrops norvegicus.jpg
Clasificación científica
Reino: Animalia
Filo: Arthropoda
Subfilo: Crustacea
Clase: Malacostraca
Orde: Decapoda
Infraorde: Astacidea
Familia: Nephropidae
Xénero: Nephrops
Especie: N. norvegicus
Nome binomial
Nephrops norvegicus
(Linnaeus, 1758)

A cigala ou lagostino (Nephrops norvegicus), é un crustáceo decápodo da familia Nephropidae. Trátase dunha especie comestible moi apreciada polo seu sabor.

A Real Academia Galega rexeita o uso do termo cigala para denominar esta especie e dálle o nome de lagostino, nome que tamén designa outro crustáceo semellante pero de cacho máis brando e sen as pinzas que caracterizan á cigala. Así, teriamos lagostino para designar o Nephrops norvegicus que é o que aquí describimos como cigala e o Melicertus kerathurus, que describimos como lagostino. En castelán serían cigala e o langostino, respectivamente.

Outras fontes consultadas [1], utilizan cigala para o primeiro e lagostino para o segundo. Tamén o portal Pesca de Galicia.com, dependente da Consellería do Mar recolle estes dous nomes. Pero tamén hai autores [2] que utilizan lagostino para o primeiro e gamba para o segundo.

Descrición[editar | editar a fonte]

Posúe un corpo e abdome alongados, estreitos e de menor robustez que o resto de especies da familia.

O primeiro par de patas torácicas é longo, con longas pinzas lixeiramente desiguais. Segundo e terceiro par tamén con pinzas. Segmento abdominal terminado nunha punta a cada lado. Ollos de córnea negra e moi inchada. Rostro con dúas cristas lonxitudinales; outras cristas no caparazón e as pinzas. Cor rosácea. Talla: 30 cm como máximo.

Bioloxía[editar | editar a fonte]

Pasan o inverno en augas pouco profundas buscando algo de calor, aínda que é difícil de observar pois durante o día escóndese escavando no fondo fangoso e só sae á noitiña e ao amencer para alimentarse. O resto do ano buscan augas máis frías e profundas duns 100 m ou mesmo moito máis, até 800 m. Viven preferentemente sobre fondos brandos de area fina onde esconderse en galerías perforadas por eles mesmos, ás veces longas e con máis dunha saída para escapar.

No Mediterráneo occidental a época da desova vai desde xullo a febreiro. Os ovos son de cor verde ao principio e vólvense de cor vermella, que adoitan verse colgando da parte inferior do corpo da femia, osixenándoas con movementos das súas patas. Tras nacer tardan uns dous anos en alcanzar a idade adulta.

A cigala é un depredador que vive en solitario, cazando para alimentarse fundamentalmente de vermes poliquetos e de peixes.

Galería de imaxes[editar | editar a fonte]

Notas[editar | editar a fonte]

  1. DIRECCIÓN XERAL DE FORMACIÓN PESQUEIRA: Guía do consumidor de peixe fresco, Xunta de Galicia 1999; ou Rosa RAMONELL: Guía dos mariscos de Galicia, Galaxia, Vigo 1985.
  2. Fernando LAHUERTA MOURIÑO e outros: Vocabulario multilingüe de organismos acuáticos, Centro Ramón Piñeiro para a Investigación en Humanidades, 2000.

Véxase tamén[editar | editar a fonte]

Commons
Commons ten máis contidos multimedia na categoría: Cigala
Wikispecies-logo.svg
Wikispecies posúe unha páxina sobre: Cigala

Ligazóns externas[editar | editar a fonte]