Usuario:Iria.cestmoi

Na Galipedia, a Wikipedia en galego.
Saltar ata a navegación Saltar á procura
Mouchos coma este, por exemplo

Alma auriense, o meu nome real á esquerda do punto. Milenial e Virgo, seica, e privilexiada por ser parte da xeración Xabarín.

Un segredo confesábel? Colecciono mouchos, curuxas e similares. Outro? O amor pola lingua, a literatura e todo o que teña que ver con eses eidos. O amor pola miña Galiza. O amor en todas as súas modalidades.

Estudei a ESO e o Bacharelato de Humanidades no IES Eduardo Blanco Amor da miña cidade natal. Marchei a Vigo estudar Tradución e Interpretación na universidade, combinación de linguas galego-inglés e alemán como lingua C. Estudei o MILA (Mestrado Interuniversitario en Lingüística Aplicada), especializada en adquisición e ensino de linguas, na USC. A seguinte parada foi o Mestrado Universitario en Profesorado, coa mención de linguas e literaturas oficiais (galego e castelán), de volta na Cidade Olívica.

Adoro a lectura. Estou saíndo da miña área de comodidade e botándome a ler cousiñas en ámbitos novos. Fiquei gratamente sorprendida coa filosofía despois de ler pola miña conta Pandemia, de Slavoj Žižek. Obvio seguirei afondando nese eido, aínda que xa me adentrara nel con Viktor Emil Frankl no instituto. Disto tamén tivo parte de culpa Xosé Manuel Domínguez Prieto, o meu profesor de Filosofía de segundo de Bac, e a serie Merlí. Dende hai un par de anos (aprox) estou afondando tamén nos feminismos e mais no LGTBI. Teño a casa (o cuarto) ateigado de libros e unha lista de agarda interminábel para ler. Flípame facer peregrinaxe a librarías e pescudar o que agochan. Amo incondicionalmente acudir a bibliotecas, arquivos e similares, embriagarme do cheiro a libro novo, a libro vello, embriagarme de autorxs por descubrir e de puntos de vista diferentes. E se corto un dedo cunha folla (que pode pasar), que? Pas de problème!

Gosto de sagas literarias como Harry Potter ou O Señor dos Aneis, universos de fantasía nos que me mergullei dende a infancia/adolescencia. Leo practicamente todo o que cae nas miñas mans ou que aparece na miña pantalla, dende libros ata artigos de revistas ou o prospecto dos medicamentos. Non son seguidora de xéneros ou autorxs en particular, pode haber libros agradábeis ou desagradábeis para min no mesmo xénero ou da mesma autoría. Tamén estou comezando a ler poesía contemporánea. Mais sen dúbida a miña obra (galega) favorita é A esmorga, tanto en contido como nos aspectos que compoñen a novela. A adaptación ao cinema de Xosé Ignacio Vilar Díaz paréceme brillante, unha obra de arte do cinema galego. A maxistral interpretación de Karra Elejalde Garai dignifica dunha maneira excepcional a idiosincrasia do personaxe, dende o meu punto de vista.

E bon, xa que falamos de cinema, ADORO Star Wars. OLLO! Dende 1977 até 2005, é dicir, as seis obras (maxistrais) de George Lucas. Gosto especialmente da princesa Leia. Non se trata da típica princesa frívola que agarda ser rescatada, senón dunha verdadeira líder que loita polo seu pobo e a súa independencia persoal, algo pouco común no cinema da época. Nesa liña, outra saga de cinema da que tamén gosto é Piratas do Caribe.

Gosto moito dos idiomas. Estudei inglés dende ben cedo, antes de que fose materia obrigatoria no ensino primario. Xa en Vigo entrei en contacto co alemán e co francés. Coa música, a lectura e o Youtube (principalmente) levo algúns anos adquirindo nocións básicas de català/valencià. A miña última aventura lingüística (no ensino formal) é a lingua portuguesa, coa que xa tomara contacto na adolescencia nos campamentos Portugaliza da Xunta, en Entrimo.

Estar en contacto coa natureza éncheme de paz. Ademais da paradisíaca Serra do Xurés, que adoro, gocei no bloque oriental da Serra do Courel e dos Ancares, e tamén nos Montes do Invernadeiro e en Manzaneda. Encántame a montaña e fica moita por explorar na Galiza, certamente. Mais non todo é montaña no país, obvio, a costa ten moito que visitar! Estiven en Fisterra, na Mariña de Lugo e no Cadoiro. Teño pendente afondar máis na Costa da Morte e no norte da provincia da Coruña. Encántame e reláxame mirar o ceo estrelado sobre todo nas noites de verán, con ou sen lúa.

Dende primaria, principalmente cos apoios da miña mestra Ignacia e da miña nai, déixome levar pola creación literaria. Teño escritos algúns relatos curtos baixo pseudónimo, que me valeron premios nalgúns certames en galego, entre outros nos concellos de Ourense, Barbadás, Lalín e Compostela. Tamén escribín algúns relatos en castelán, igualmente baixo pseudónimo, que me deron algunha alegría durante o meu paso polo instituto. Con todo, resúltame moito máis cómodo e natural escribir en galego. A imaxinación, os pensamentos, as palabras, todo flúe con moita máis naturalidade. Na actualidade, o meu criterio literario baséase esencialmente en tres palabras: curto, mais intenso.

Gosto moito do debate. Coido que é unha ferramenta esencial na vida, permite enriquecer o pensamento e descubrir e compartir novos puntos de vista. Ligada ao debate, fascíname a política. Milito no nacionalismo comunista e defendo a autodeterminación dos pobos. Acredito firmemente na vocación de servizo público como guía para a mellora da sociedade, tanto dende a propia política como, por exemplo, dende o asociacionismo, a autoxestión, o voluntariado ou os movementos veciñais.

Seguirei editando isto con máis calma, que hoxe esgotóuseme a inspiración.

"O imposíbel custa un poco máis e derrotadxs... derrotadxs son só quen baixan os brazos e se entregan. A vida pode darche mil tropezóns en todas as ordes: no amor, no traballo, na aventura do que estás a pensar, nos soños que pensas concretar. Mais unha, e mil veces, estás feitx con forza para volverte erguer e volver comezar. Porque o importante é o camiño. [...] Porque a vida non é só recibir, é, antes que nada, dar algo do que temos e por fodidx que esteas, sempre tes algo para dar".
Pepe Mujica, expresidente do Uruguai

Wiki-aventura[editar | editar a fonte]

Punto de inicio? A Segunda Wikimaratona do Día Internacional da Muller, o 9 de marzo de 2019, cando me rexistrei como usuaria. Porén, levo editando de maneira máis activa dende abril de 2021. Sempre disposta e interesada en aprender e intercambiar opinións, impresións, puntos de vista. Cal será a vindeira Wikiparada?