Airbus A380

A380
Tipo	pasaxeiros
Fabricante	Airbus
Primeiro voo	27 de abril de 2005
Introducido	25 de outubro do 2007
Estado	En produción
Construídos	85 (en febreiro de 2012)

O Airbus A380, fabricado polo consorcio europeo Airbus, é un avión para o transporte de viaxeiros (entre 555 e 850 viaxeiros), o que o converte no maior avión comercial da historia. Trátase dun catrimotor de dous pisos e fuselaxe ancha e debido ao seu tamaño moitos aeroportos tiveron que modificar e mellorar as súas instalacións para acomodalo. O 27 de abril do ano 2005 realizou o seu primeiro voo experimental, e o 25 de outubro do 2007 realizou o seu primeiro voo comercial coa aeroliña Singapore Airlines.

Ata o de agora só existen dúas variantes do Airbus A380. O A380-800, a versión de pasaxe, con máis capacidade que o Boeing 747; e o A380-800F, a versión de carga, que será un dos maiores cargueiros do mundo, só superado en capacidade de carga polo Antonov An-225.

O A380-800 ten un máximo alcance de 15.000 quilometros (suficiente para voar dende Chicago a Sydney sen escalas), e unha velocidade de cruceiro de Mach 0,85 (sobre 900 km/h a altura de cruceiro), semellante á do Boeing 747.