Xaime Quintanilla Martínez

Para outras páxinas con títulos homónimos véxase: Xaime Quintanilla.

Xaime Quintanilla Martínez

Biografía
Nacemento	13 de xuño de 1898 A Coruña, España
Morte	18 de agosto de 1936 (38 anos) Ferrol, España
Causa da morte	execución extraxudicial, ferida por arma de fogo
Alcalde de Ferrol
1936 – 1936 ← Segundo Cotovad Díaz – Antonio Santamaría López →
Alcalde de Ferrol
1931 – 1934 ← José Lloveres Martínez – Segundo Cotovad Díaz →
Datos persoais
Educación	Universidade de Santiago de Compostela
Actividade
Ocupación	político, médico, escritor
Partido político	Partido Socialista Obrero Español
Familia
Fillos	Xaime Quintanilla Ulla

Xaime Quintanilla Martínez, nado na Coruña o 13 de xuño de 1898 e finado en Ferrol o 18 de agosto de 1936, foi un médico cirurxián, político socialista, xornalista, dramaturgo e escritor galego. Foi o pai do tamén alcalde de Ferrol Xaime Quintanilla Ulla.

Traxectoria

Estudou Medicina en Santiago de Compostela. En 1917 creou en Ferrol unha clínica de cirurxía e fíxose famoso fundamentalmente pola súa calidade humana para cos máis humildes. A súa actividade política céntrase principalmente na defensa do galeguismo e socialismo, participando na I Asemblea das Irmandades da Fala e noutras asembleas políticas.

Canto á súa actividade cultural, participou en varios xornais como Ferrol Deportivo, Diario de Vigo ou El Correo Gallego, do que chegou a ser director e redactor xefe. Tamén dirixiu a Editorial Céltiga. Publicou obras como Saudade (1922), a comedia dramática Alén (El Correo Gallego, 1921), o drama Donosiña, drama en tres actos e un prólogo, en prosa e o traballo O nazonalismo musical galego.

Foi o primeiro alcalde republicano de Ferrol (1931), á fronte dunha corporación municipal composta polo Partido Socialista Obrero Español (o partido máis votado, cuxa lista dirixía Quintanilla, e o Partido Republicano Radical). Xaime Quintanilla seguiu sendo o alcalde ferrolán ata setembro de 1934, cando foi destituído polo goberno, acusado de tomar parte nos sucesos que tiveron lugar na cidade no marco da Folga xeral revolucionaria de 1934. Foi, por outra banda, presidente da Federación de Colectividades Socialistas da provincia da Coruña. En febreiro de 1936, trala vitoria da Fronte Popular, foi restituído como alcalde aínda que presentou a renuncia aos poucos días debido ás súas ocupacións profesionais, sendo elixido alcalde o seu compañeiro Antonio Santamaría López.

Manuscrito de Donosiña, de 1919.

Formou parte tamén da xestora da Deputación da Coruña, presidida por José López Bouza, de Izquierda Republicana e tomou parte na campaña para o referendo de aprobación do Estatuto de autonomía de Galicia de 1936. Tralo Golpe de Estado do 18 de xullo de 1936, foi apresado dúas veces na súa casa, sendo liberado a primeira delas. A segunda, foi detido sine díe, primeiro en Mariña e logo no buque prisión Plus Ultra (correo de Transmediterránea). Foi fusilado o 18 de agosto a mans dos sublevados nas tapias do cemiterio de Canido, xunto con outras catorce persoas, e alí foi enterrado co resto de axustizados, unha placa lembra o nome de todos eles.

Distincións

Foi condecorado en 1934 coa Lexión de Honra do Goberno francés e ten dedicadas rúas nos concellos de Ferrol e Culleredo.

Galería de imaxes

• 
  Casa Pereira, r/ Dolores, Ferrol, de Rodolfo Ucha. No 1º andar viviu Quintanilla.
• 
  Colaboradores de La Zarpa.
• 
  Colaboradores de Terra.
• 
  Na súa época de alcalde.
• 
  En memoria.

Véxase tamén

Bibliografía

• "Quintanilla Martínez, Xaime". Dicionario biográfico de Galicia 3. Ir Indo Edicións. 2010-2011. p. 145. 
• "Quintanilla Martínez, Xaime". Diciopedia do século 21 3. Do Cumio, Galaxia e do Castro. 2006. p. 1733. ISBN 978-84-8288-942-9. 
• Carballo Calero, R. (1975) [1963]. Historia da literatura galega contemporánea. Galaxia. ISBN 84-7154-227-7. 
• Fernández del Riego, F. (1992) [1990]. Diccionario de escritores en lingua galega (2ª ed.). Do Castro. p. 356. ISBN 84-7492-465-0. 
• Llorca, Guillermo; et al. (2005). "Quintanilla Martínez, Xaime". Gran Enciclopedia Galega (DVD). El Progreso. ISBN 84-87804-88-8. 
• Ozámiz, D. (setembro). "Un socialista galego consecuente: Xaime Quintanilla Martínez". Claridade (Fund. Luís Tilve) (Esp. homenaxe): 25–34. 
• Pereira e Romero (2011). Xaime Quintanilla Martínez. Vida e obra dun socialista e galeguista ao servizo da República. Fundación Luís Tilve.
• Suárez Martínez, Xosé Manuel (2002). Guerra Civil e represión en Ferrol e ComarcaArquivado 30 de marzo de 2007 en Wayback Machine. Concello de Ferrol. ISBN 84-88991-19-3.
• Tato Fontaíña, Laura (1996). O teatro galego e os coros populares 1915-1931 (tese). UDC. ISBN 978-84-692-8929-7. 
• —————— (ed) (1997). "Introdución" en Donosiña. A Coruña. Biblioteca-Arquivo teatral Francisco Pillado Mayor.
• Vilavedra, Dolores, ed. (1995). Diccionario da Literatura Galega. Autores I. Vigo: Editorial Galaxia. p. 491. ISBN 84-8288-019-5. 
• ——————, ed. (2000). Diccionario da Literatura Galega. Obras III. Vigo: Editorial Galaxia. pp. 151–153. ISBN 84-8288-365-8. 

Outros artigos

• Teatro das Irmandades da Fala

Ligazóns externas

• Álbum das Irmandades da Fala Consello da Cultura Galega
• "A obra de Quintanilla que escandalizou os puritanos" Real Academia Galega.
• Xaime Quintanilla na Biblioteca Virtual Galega.

Predecesor: José Lloveres Martínez	Alcalde de Ferrol  1931 - 1934	Sucesor: Segundo Cotovad Díaz
Predecesor: Segundo Cotovad Díaz	Alcalde de Ferrol  1936	Sucesor: Antonio Santamaría López