Tanxugueiras

Na Galipedia, a Wikipedia en galego.
Saltar ata a navegación Saltar á procura

Tanxugueiras é un trío de pandereiteiras galegas formado por Aida Tarrío e as irmás xemelgas Olaia e Sabela Maneiro. Comezaron a traballar xuntas baixo o nome de Tanxugueiras no ano 2016.

O nome do grupo ten orixe nun microtopónimo. Trátase do nome dunhas leiras da parroquia de Fumaces, no concello de Riós[1].

O grupo traballa co repertorio da música galega tradicional. Con todo, tratan de darlles ás pezas unha sonoridade máis moderna, que a aproximan ao estilo da world music ou mesmo do pop. Así mesmo, o repertorio que empregan trata de enfatizar temas como o empoderamento da muller[2].

Traxectoria[editar | editar a fonte]

A fama das Tanxugueiras comezou moito antes de sacaren o primeiro disco. A inicios do 2017 volveuse viral nas redes sociais un vídeo no que aparecían cantando unhas panadeiras antes dun concerto coa Banda das Crechas en Glasgow[3].

Na primavera de 2018 editaron o seu primeiro disco co mesmo nome que o grupo, Tanxugueiras.[4] O disco gañou o Premio MIN de disco en galego 2018.[5] O sinxelo de presentación do disco foi "Que non me neguen", en que contaron coa colaboración de Guadi Galego.

Nese mesmo ano de 2018 publicaron un sinxelo de rock chamado "Cultura crítica" no que colaboran con NAO e co grupo de rap SonDaRúa. Así mesmo, colaboraron co grupo de folk escocés Shooglenifty na canción "East West".

A mediados de 2019 foron galardoadas co Premio Martín Códax da Música na categoría de Música tradicional galega e folque.[6] En novembro saíu á luz o segundo disco, Contrapunto. O disco foi producido por Isaac Palacín, quen toca tamén a batería. Xunto de pezas máis próximas á música tradicional, como "Perfidia" ou "Miña Nai", outras músicas, como "Malquerenza" ou "Desposorio" teñen sonoridades que se lembran ao pop ou mesmo a música electrónica. Así mesmo, o disco continúa a reivindicar a figura da muller na música tradicional e na sociedade, un aspecto que se ilustra nos vídeos de presentación do disco, que corresponden ás cancións "Desposorio" e "Perfidia".

Obra[editar | editar a fonte]

O primeiro disco, Tanxugueiras, publicouse en 2018. Conta cos seguintes once temas, por esta orde:[7]

  • "Ai a ribeira"
  • "Non cho sei"
  • "Aldeiña de Moscoso"
  • "Bembibre"
  • "Tanxugueiras"
  • "A de sempre"
  • "En Piornedo"
  • "Hermillans"
  • "Que non mo neguen"
  • "Oleró"
  • "Glasgow"

O segundo disco, Contrapunto, publicouse en 2019. Conta con dez temas, por esta orde:

  • "Autocracia"
  • "Albedrío"
  • "Perfidia"
  • "Irmandade"
  • "Miña Nena"
  • "Miña Nai"
  • "O Querer"
  • "Malquerenza"
  • "Desposorio"
  • "Maltraer"

Notas[editar | editar a fonte]

  1. "tanxugueiras". Portal das Palabras. Consultado o 28/11/2019. 
  2. Dopico, Montse (27/07/2018). "Tanxugueiras: "Somos tres rapazas e somos capaces de levar adiante un proxecto tan ben ou mellor ca os homes"". Consultado o 28/11/2019. 
  3. "Las gallegas Tanxugueiras se vuelven virales desde Escocia". 7 de febreiro de 2017. Consultado o 5 de xuño de 2018. 
  4. "Tanxugueiras comeza a xira de presentación do seu primeiro disco". Cultura Galega. 4 de xuño de 2018. Consultado o 5 de xuño de 2018. 
  5. "Tanxugueiras gaña o Premio MIN de disco en galego do 2018". Cultura Galega. 14 de marzo de 2019. Consultado o 21 de marzo de 2019. 
  6. "Premios Martín Códax 2019". Consultado o 27 de decembro de 2019. 
  7. Inquedanzas (ed.). "Tanxugueiras". Consultado o 5 de xuño de 2018. 

Véxase tamén[editar | editar a fonte]

Ligazóns externas[editar | editar a fonte]