Museo Numismático Rigoberto Borjas
| Museo Numismático Rigoberto Borjas | |
|---|---|
| Coordenadas | 14°04′17″N 87°12′19″O / 14.071459, -87.20533 |
| Tipo | Museo numismático |
| Na rede | |
| Sitio web oficial | |
| [ editar datos en Wikidata ] | |
O Museo Numismático Rigoberto Borjas é unha institución museística da cidade de Tegucigalpa, pertencente ao Banco Central de Honduras, que alberga unha colección de moedas, billetes e outros obxectos afíns vinculados á historia numismática hondureña.
A sede do museo é o edificio do Banco Central de Honduras.
Historia
[editar | editar a fonte]O museo fundouse e abriu ao público o 3 de xuño de 1993, na antiga sede do Banco Central de Honduras no centro de Tegucigalpa. Cando se inaugurou a nova sede do Banco Central no bulevar Fuerzas Armadas en 2016, o museo trasladouse ao novo edificio.[1][2][3]
O museo leva o nome de Rigoberto Borjas, falecido en 1996, o primeiro xefe do departamento de contabilidade do Banco Central de Honduras, en 1950.[4]
Colección
[editar | editar a fonte]A colección numismática do museo componse de arredor de 4.000 pezas, sinaladamente exemplares de papel moeda, moedas e cuños que estiveron en uso e en circulación durante as diversas épocas históricas de Honduras. Tamén se amosan medios de pagamento da época prehispánica de Honduras, con anterioridade á chegada dos españois en 1502,[1] así como unha mostra representativa da moeda romana, grega e persa.[4]
Dentro da colección xeral, é de destacar unha colección temática de moedas conmemorativas das datas especiais da historia do país. O museo garda tamén a Declaración de Independencia orixinal de 1821, asinada polo primeiro presidente do país, Dionisio de Herrera, así como varias pertenzas do xeneral Francisco Morazán, que gobernou a República Federal de Centroamérica.[4]
Notas
[editar | editar a fonte]- ↑ 1,0 1,1 "Museo Numismático Rigoberto Borjas". Honduras.com
- ↑ "Museo Numismático Rigoberto Borjas del Banco Central Arquivado 11 de agosto de 2023 en Wayback Machine.". Directorio Latinoamericano de Recursos Patrimoniales (Ilamdir.org).
- ↑ "Inauguran nuevo y monumental edificio del Banco Central de Honduras". En El Heraldo. 11 de outubro de 2016.
- ↑ 4,0 4,1 4,2 Carranza, S. (2018). "Tesoros del Banco Central de Honduras, disponibles al público". En El Heraldo. 21 de abril .