Congreso dos Deputados de España

Congreso dos Deputados
	XII lexislatura
Datos xerais
Ámbito	España
Creación	1977
Tipo	Cámara Baixa das Cortes Xerais
Inicio de sesións	19 de xullo de 2016
Presidenta	Ana Pastor (PP); desde o 19 de xullo de 2016
Vicepresidente primeiro	Ignacio Prendes (C's); desde o 19 de xullo de 2016
Composición
Membros	350 deputados
Grupos representados	Grupo Popular Grupo Socialista Grupo Confederal de Unidos Podemos-En Comú Podem-En Marea Grupo Ciudadanos Grupo de Esquerra Republicana Grupo Vasco (EAJ-PNV) Grupo Mixto
Salario	39.394,18 €/aNo; Soldo base en 2015 sen incluír indemnizacións nin complementos.
	Título III da Constitución
Eleccións
Sistema electoral	Escrutinio proporcional plurinominal mediante sistema d'Hondt con listas pechadas
Última elección	26 de xuño de 2016
Sede(s)
	Palacio das Cortes; Plaza de las Cortes, Madrid
Sitio web
	www.congreso.es

O Congreso dos Deputados é a cámara baixa das Cortes Xerais, o órgano constitucional que representa ao pobo español. Reúnese para sesións no Palacio das Cortes, situado na praza das Cortes de Madrid.

A Constitución de 1978 establece un Parlamento bicameral. As Cortes Xerais están formadas polo Congreso dos Deputados e o Senado. Ámbalas dúas Cámaras representan o pobo español. As Cortes Xerais:

exercen a potestade lexislativa do Estado.
aproban os seus orzamentos.
controlan a acción do Goberno.
e teñen as demais competencias que lles atribúe a Constitución.

No entanto, este bicameralismo non supón unha equiparación completa entre Congreso e Senado. A Constitución resérvalle ó Congreso unha serie de funcións e facultades que revelan a súa primacía. Deste xeito, o Congreso autoriza a formación do goberno, pode provoca-lo seu cesamento, coñece en primeiro lugar a tramitación dos proxectos lexislativos e dos orzamentos e debe confirmar ou rexeitar as emendas ou vetos que pode aprobar o Senado sobor destes textos lexislativos.

Índice

1 Composición
- 1.1 Órganos
2 Prerrogativas dos deputados
3 Sede
4 Notas
5 Véxase tamén
- 5.1 Outros artigos
- 5.2 Ligazóns externas

Composición[editar | editar a fonte]

A Constitución establece que o Congreso contará cun mínimo de 300 e un máximo de 400 Deputados, debendo a lei electoral concretar este número. A normativa vixente (Lei Orgánica do Réxime Electoral Xeral de 19 de xuño de 1985) fixara en 350 o número de membros da Cámara.

Tódolos Deputados son elixidos por sufraxio universal, libre, igual, directo e secreto. A circunscrición electoral é a provincia. A lei electoral asigna dous escanos a cada unha delas e distribúe os demais en proporción á poboación respectiva. Ceuta e Melilla elixen un representante cada unha.

Eleccións xerais de España de 2016
	Partido	Líder	%	Dif.	Dif.
	Partido Popular (PP)	Mariano Rajoy Brey	33,03	137	+14
	Partido Socialista Obrero Español (PSOE)	Pedro Sánchez	22,66	85	-5
	Unidos Podemos (Podemos-IU-Equo)	Pablo Iglesias	13,37	45	-
	Cidadáns-Partido da Cidadanía (C's)	Albert Rivera	13,05	32	-8
	En Comú Podem-Guanyem el Canvi (EPC)	Xavier Domènech	3,55	12	=
	A la valenciana (Compromís-Podemos-EU)	Joan Baldoví	2,74	9	-
	Esquerra Republicana de Catalunya (ERC)	Joan Tardà	2,63	9	=
	Convergència Democràtica de Catalunya (CDC)	Francesc Homs	2,01	8	=
	Podemos-En Marea-Anova-EU	Alexandra Fernández	1,44	5	-1
	Partido Nacionalista Vasco (EAJ/PNV)	Aitor Esteban	1,20	5	-1
	EH Bildu		0,77	2	=
	Coalición Canaria (CC)	Ana Oramas	0,33	1	=

Órganos[editar | editar a fonte]

Mesa do Congreso dos Deputados^[1]
Cargo	Titular	Lista
Presidenta	Ana Pastor	PP
Vicepresidente primeiro	Ignacio Prendes	C's
Vicepresidenta segunda	Micaela Navarro	PSOE
Vicepresidenta terceira	Rosa Romero	PP
Vicepresidenta cuarta	María Gloria Elizo	Unidos Podemos
Secretaria primeira	Alicia Sánchez-Camacho	PP
Secretario segundo	Juan Luis Gordo	PSOE
Secretario terceiro	Marcelo Expósito	En Comú
Secretaria cuarta	Patricia Reyes	C's

Prerrogativas dos deputados[editar | editar a fonte]

Os deputados, o mesmo que os Senadores, dispoñen de dúas importantes prerrogativas, que a Constitución lles recoñece, non con carácter de privilexio persoal, senón para protexer o exercicio das súas funcións. Inviolabilidade e inmunidade son propiamente garantías institucionais das Cámaras, das que gozan os seus membros en canto participan no desenvolvemento das funcións constitucionais asignadas ó Congreso dos Deputados.

A inviolabilidade afecta ás opinións manifestadas e ós votos emitidos no exercicio do cargo representativo e supón a irresponsabilidade polos mesmos. Así e todo, esta irresponsabilidade non ten carácter absoluto, senón só en relación a terceiros estraños á Cámara. No ámbito interno, o deputado está suxeito ás normas de disciplina parlamentaria que, de acordo co Regulamento, aplican o presidente e a Mesa do Congreso.
A inmunidade cobre os actos realizados polo deputado durante o período do seu mandato e supón a prohibición de ser inculpado ou procesado sen a previa aprobación do Congreso, e que a súa detención tan só sexa posible no caso de flagrante delito.

Os deputados perciben unha asignación económica con cargo ós orzamentos da Cámara, tendo dereito, asemade, a outras axudas (dietas), franquías e indemnizacións por gastos indispensables para o cumprimento das súas funcións.

Sede[editar | editar a fonte]

Artigo principal: Palacio das Cortes.

O Palacio das Cortes é o edificio que alberga o Congreso dos Deputados. Está situado entre a Calle Zorrilla e a Carrera de San Jerónimo, a escasa distancia do Paseo del Prado, en Madrid. É un dos edificios emblemáticos do Madrid do século XIX, de estilo neoclásico.