Australasia

Na Galipedia, a Wikipedia en galego.
Australasia
Rexións de Oceanía. Nova Zelanda inclúese ben en Australasia, ou ben en Polinesia. Tradicionalmente se inclúe Melanesia, ou algunhas zonas dela, en Australasia.

Australasia é unha rexión de Oceanía que comprende Australia, Nova Zelanda, a illa de Nova Guinea, e as illas próximas do Océano Pacífico. O termo foi ideado por Charles de Brosses na súa obra Histoire des navigations aux terres australes (1756). Deriva da palabra latina que indica o sur, austral, para identificar esta rexión ao "sur de Asia", diferenciándoa de Polinesia (ao leste) e de Micronesia (ao nordeste). Australasia, ao igual que India, descansa na Placa Indo-Australiana.

Xeografía Humana[editar | editar a fonte]

Xeopoliticamente, o termo Australasia sen ningún outro calificativo, úsase ás veces para nomear a Australia e Nova Zelanda xuntas. Ás veces se inclúe no termo a illa de Nova Guinea (Papúa Nova Guinea e a parte indonesia da illa). Hai moitas organizacións que preceden o seu nome de "(Real) Sociedade Australasiana" para indicar xustamente que se limita a Australia e Nova Zelanda.

Bandeira do equipo olímpico de Autralasia (1908-1912)

No pasado, o termo Australasia foi usado para nomear aos equipos deportivos conxuntos de Australia e Nova Zelanda. Exemplos disto son o equipo de tenis entre 1905 e 1915, cando Nova Zelanda e Australia competiron xuntas na Copa Davis; ou o equipo olímpico de ambos países que competiu nas olimpíadas de verán de 1908 e 1912.

Xeografía Ecolóxica[editar | editar a fonte]

A liña de Wallace separa a fauna de Australasia da do sudeste asiático.

Desde un punto de vista ecolóxico, a zona ecolóxica australasiana é unha rexión diferenciada cunha xeoloxía e historia evolutiva propias e unha gran cantidade de flora e fauna única. Neste contexto, Australasia limítase a Australia, Nova Guinea, Nova Zelanda, Nova Caledonia, e illas adxacentes, incluíndo as illas orientais indonesias de Lombok e Sulawesi. A liña imaxinaria que marca a división biolóxica entre Australasia e a ecozona Indomalaia na Asia tropical, coñécese como Liña de Wallace - Borneo e Bali están do lado asiático.

Australia, Nova Zelanda e Nova Caledonia son fragmentos do antigo supercontinente Gondwana. Durante millóns de anos, estas tres masas de terra foron separándose dos outros continentes, e entre si. Toda Australasia comparte a flora Antártica, se ben as illas tropicais do norte tamén teñen en común moitas plantas co sudeste asiático.

Australia, Nova Guinea, e Tasmania están separadas entre si por plataformas continentais pouco profundas que estiveron unidas cando o nivel do mar era inferior durante a Idade do Xeo. Comparten unha fauna similar que inclúe marsupiais, mamíferos monotremas e aves ratites. O eucalipto é a árbore predominante na maior parte de Australia e Nova Guinea. Nova Zelanda non ten mamíferos terrestres autóctonos, pero si tiña tamén aves ratites, incluíndo o kiwi e o extinto moa. A ecozona australasiana inclúe algúns grupos de illas próximos como Wallacea, o Arquipélago Bismarck, as Illas Salomón, e Vanuatu, as cales non formaban parte anteriormente de Gondwana, pero comparten con Australasia moitas plantas e animais característicos.

Véxase tamén[editar | editar a fonte]

Ligazóns externas[editar | editar a fonte]