Susan Sontag

Na Galipedia, a Wikipedia en galego.
Antigo edificio editorial dun diario de Saraxevo. Sontag viviu varios meses alí durante o asedio, nos que dirixiu a representación da obra Esperando a Godot nun teatro.

Susan Sontag, nada en Nova York o 16 de xaneiro de 1933 e finada na mesma cidade o 28 de decembro de 2004, foi unha novelista e ensaísta norteamericana. Aínda que se dedicou principalmente á súa carreira literaria e ensaística, exerceu a docencia e dirixiu filmes e obras teatrais.

Traxectoria[editar | editar a fonte]

Sontag, que recibiu ó nacer o nome de Susan Rosenblatt, naceu en Nova York. Era filla de dous xudeus americanos, Mildred Jacobsen e Jack Rosenblatt, o cal se dedicaba ó comercio de peles en China, onde faleceu a causa dunha tuberculose cando Susan contaba con cinco anos de idade. Sete anos despois, súa nai contraeu matrimonio con Nathan Sontag e desde ese momento Susan e a súa irmá Judith adoptaron o apelido do seu padrasto.

Sontag creceu en Tucson, Arizona e, posteriormente, nos Ánxeles, onde se graduou na North Hollywood High School, á idade de 15 anos. Proseguiu os estudos nas universidades de Berkeley, Chicago,París e Harvard.

Durante a súa estancia en Chicago, con 17 anos, Sontag contrae matrimonio con Philip Rieff, tras un noivado de tan só dez días. A parella tivo un fillo, David Rieff, quen se convertería posteriormente no editor de súa nai na editorial Farrar Straus and Giroux. O matrimonio entre Sontag e Riff tivo unha duración de oito anos, tras os cales se divorciaron en 1958.

Os últimos anos da súa vida mantivo unha relación de parella coa famosa fotógrafa Annie Leibowitz.

Sontag faleceu o 28 de decembro de 2004, no hospital Memorial Sloan Kettering de Nova York, á idade de 71 anos, debido a complicacións dunha Síndrome mielodisplásica que desembocou nunha leucemia mielóxena aguda. A orixe da leucemia foi probablemente a radioterapia recibida case tres décadas antes, empregada para a curación dun avanzado cancro de mama que sufriu cando tiña 43 anos.

Está enterrada no cemiterio parisiense de Montparnasse.

Obra[editar | editar a fonte]

Deuse a coñecer cunha recompilación de ensaios e artigos, Contra a interpretación (1964), á que seguiron os ensaios Estilos radicais (1969), Sobre a fotografía (1975), A enfermidade e as súas metáforas (1978), Baixo o signo de Saturno (1980) e A sida e as súas metáforas (1989).

É autora tamén de varias obras narrativas (O benefactor, 1963; Eu, etcétera, 1978; The way we live now, 1991; O amante do volcán, 1995; En América, 2000; Terra prometida, 1974; e Xiro turístico sen guía, 1984.).

Foi directora das obras teatrais Jacques e o seu señor, (Milan Kundera), 1985); e Esperando a Godot (Samuel Beckett, 1949). En 2003 tamén escribiu Ante a dor dos demais.

Premios[editar | editar a fonte]

Véxase tamén[editar | editar a fonte]

Ligazóns externas[editar | editar a fonte]

Wikiquote
A Galicitas posúe citas sobre: Susan Sontag