Klymentii Sheptytskyi
| Климентій Шептицький (Klymentii Sheptytskyi) | |
|---|---|
 | |
| Arquimandrita da Igrexa católica bizantina rusa | |
| Biografía | |
| Nacemento | 17 de novembro de 1869 en Prylbychi, distrito de Yavoriv, Reino de Galicia e Lodomeria |
| Pasamento | 1 de maio de 1951 en prisión de Vladimir, Vladimir, RSFS de Rusia |
| Ordes | |
| Ordenación sacerdotal | 28 de agosto de 1915, por Dionizije Njaradi |
| Exarca apostólico de Rusia | |
| 1939 - 1951 | |
| Predecesor | Leonid Fedorov |
| Outros | |
| Ficha en catholic-hierarchy.org | |
O beato Klymentii Sheptytskyi[1] (en ucraíno: Климентій Шептицький; en ruso: Климентий Шептицкий), nado o 17 de novembro de 1869 en Prylbychi (Reino de Galicia e Lodomeria) e finado o 1 de maio de 1951 na prisión de Vladimir (RSFS de Rusia) foi un eclesiástico grecocatólico ucraíno, exarca apostólico de Rusia dende 1939 até o seu pasamento, e hieromártir beatificado por Xoán Paulo II.
Traxectoria[editar | editar a fonte]
Primeiros anos[editar | editar a fonte]
Kazymyr Mariia Sheptytskyi naceu o 17 de novembro de 1869 en Prylbychi,[2] unha vila do distrito de Yavoriv, entón parte do Reino de Galicia e Lodomeria, no Imperio Austríaco. A súa familia era da nobreza católica polaca, aínda que tamén con ascendencia ortodoxa ucraína.[2] Era o sexto fillo de Jan Kanty e Zofia Szeptycka de Fredro, e irmán máis novo de Andrei Sheptytskyi. Foi bautizado na igrexa local, e recibiu a súa primeira educación no seu domicilio.
Cursou os estudos de secundaria en Cracovia até 1887. Posteriormente comezou a estudar Leis na Universidade de Cracovia, continuándoos a partir de 1888 nas universidades de París e Múnic até 1890. En 1892 doutorouse en dereito pola Universidade de Cracovia, e dedicouse nos primeiros anos de vida profesional á xestión do patrimonio familiar xunto ao seu pai, e ao coidado da súa nai enferma.
Vida relixiosa[editar | editar a fonte]
Sentiu a chamada á vida relixiosa, e logo de consultalo co bispo Józef Bilczewski e coa súa aprobación, pasou ao rito bizantino. En 1912 comezou como novizo no mosteiro dos estuditas en Kamenica (preto de Prnjavor, Bosnia); en 1913 tomou o nome de Klymentii e continuou os seus estudos no Canisianium de Innsbruck. O 28 de agosto de 1915 foi ordenado sacerdote polo bispo de Križevci Dionizije Njaradi. En 1918 foi nomeado reitor do mosteiro estudita de Sknyliv, que logo da súa destrución foi trasladado á laura de Univ, onde continuou os traballos do seu irmán para restaurar o monasticismo tradicional ucraíno. En 1926 foi nomeado hegúmeno do mosteiro e responsable de todas as casas estuditas. En 1937 obtivo do papa Pío XI a aprobación definitiva dos estuditas, e a partir dese ano colaborou co seu irmán no goberno da Igrexa ucraína. En 1939 os soviéticos anexáronse Galicia, e asasinaron o seu irmán Leon e á súa dona na vivenda familiar en Prylbychi.
Segunda guerra mundial[editar | editar a fonte]
Durante a segunda guerra mundial deu refuxio a moitos xudeus, polo que en 1995 recibiu o título de Xusto entre as Nacións polo Yad Vashem.[3]
Arresto e martirio[editar | editar a fonte]
O 5 de xuño de 1947 foi arrestado polo NKVD. Finou mártir na prisión de Vladimir o 1 de maio de 1951.
Culto[editar | editar a fonte]
O papa Xoán Paulo II beatificouno o 27 de xuño de 2001 na súa visita pastoral a Ucraína, xunto a Mykolai Charnetskyi e compañeiros mártires.[4]
Notas[editar | editar a fonte]
- ↑ Tamén Klymentiy Sheptytskyi, Clement Sheptytsky, Kliment Sheptytskyi, Klymentij Šeptyckyj, Clemente Šeptyc'kyj, Klemens Szeptycki.
- ↑ 2,0 2,1 Bartrop, Paul R. (2016). Resisting the Holocaust: Upstanders, Partisans, and Survivors (en inglés). ABC-CLIO. pp. 259–261. ISBN 9781610698795.
- ↑ "Righteous Among the Nations Honored by Yad Vashem by 1 January 2017 UKRAINE" (PDF). Consultado o 29 de maio de 2017.
- ↑ O outro mártir da Igrexa católica rusa beatificado canda el foi o bispo Leonid Fedorov. Tamén foi beatificado o bispo ruteno Teodor Romzha, e varios fieis da Igrexa católica ucraína: os bispos Yosafat Kotsylovskyi, Symeon Lukach, Vasyl Velychkovskyi, Ivan Sleziuk, Nykyta Budka, Hryhorii Khomyshyn e Hryhorii Lakota; os presbíteros Mykola Konrad, Andrii Ishchak, Roman Lysko, Mykola Tsehelskyi, Petro Verhun e Oleksii Zarytskyi; os relixiosos Yakym Senkivskyi, Severiian Baranyk, Zenon Kovalyk, Vitalii Bairak e Ivan Ziatyk; as relixiosas Tarsykiia Matskiv, Olimpiia Bida e Lavrentiia Harasymiv; e o laico Volodymyr Pryima.
Véxase tamén[editar | editar a fonte]
Bibliografía[editar | editar a fonte]
Ligazóns externas[editar | editar a fonte]
- Blessed Klymentii Sheptytskyi en CatholicSaints.info (en inglés)
- Perfil en Catholic-Hierarchy.org (en inglés)
| Dignidades da Igrexa católica | ||
|---|---|---|
| Predecesor: Leonid Fedorov |
Exarca apostólico de Rusia 1939 - 1951 |
Sucesor: (Sé vacante) Joseph Werth como ordinario dos greco-católicos |
- Nados en 1869
- Finados en 1951
- Nados no distrito de Yavoriv, rexión de Lviv
- Sacerdotes da Igrexa católica bizantina ucraína
- Sacerdotes da Igrexa católica bizantina rusa
- Sacerdotes católicos do século XX
- Sacerdotes católicos de Ucraína
- Sacerdotes católicos de Rusia
- Beatos do catolicismo
- Asasinados polo réxime soviético
- Estuditas ucraínos
- Relixiosos católicos de Ucraína
- Xustos entre as Nacións
- Alumnos da Universidade Iaguelónica de Cracovia
- Alumnos da Universidade de París
- Alumnos da Universidade de Múnic