Changui

Na Galipedia, a Wikipedia en galego.
Saltar ata a navegación Saltar á procura
Changui
Información persoal
Nome Marcos Yáñez Fernández
Nacido 10 de abril de 1977 (43 anos)
Lugar Boiro
Altura 1,82 m.
Posición Dianteiro
Información de club
Club actual Boiro
Carreira sénior
Anos Equipos Aprs (Gls)
1996–1997 Vista Alegre 34 (27)
1997–2000 Compostela 48 (20)
1998–1999Pontevedra (cedido) 28 (21)
2000–2006 Deportivo da Coruña 2 (0)
2000–2001Elche (cedido) 28 (6)
2001–2002Poli Ejido (cedido) 11 (1)
2003–2004Las Palmas (cedido) 34 (3)
2005Pontevedra (cedido) 15 (3)
2005–2006Skoda Xanthi (cedido)
2006–2007 Extremadura 30 (8)
2007–2009 Ciudad de Santiago 20 (4)
2009–2010 Santiago
2010–2011 Boiro
2011–2012 Estradense 31 (12)
2012-2013 Atlético de Riveira
2012–2017 Ribadumia 127 (97)
2017-2018 Puebla 35 (19)
2018-act Boiro 53 (16)
Partidos e goles só en liga doméstica.

Marcos Yáñez Fernández, máis coñecido como Changui, nado en Boiro o 10 de abril de 1977, é un futbolista galego. Xoga de dianteiro no CD Boiro, club do que é ademais o presidente.[1]

Traxectoria[editar | editar a fonte]

Comezou a destacar no equipo do seu pobo natal, ata que foi captado pola SD Compostela. Pronto se destapou como un dianteiro con gol, e no seu primeiro ano no filial, o Vista Alegre, foi máximo goleador de Terceira División. Na 97/98, último ano do Compostela na máxima categoría, debuta no primeiro equipo. Xoga seis partidos e marca un gol. Na tempada 98/99 non acepta volver ao filial, polo que é cedido ao Pontevedra CF, con quen se proclama como un dos máximos goleadores da Segunda B. En maio de 1999 volveu ao Compostela, marcando 4 goles en 4 xornadas. Na 99/00 consolidouse na SD Compostela con David Vidal como adestrador, e conseguiu 15 goles en 38 partidos. As súas actuacións no club santiagués chamaron a atención do Deportivo da Coruña, que o fichou por 500 millóns de pesetas. Con todo, disputou só dous partidos co equipo coruñés entre o 2000 e o 2006, sendo descartado en cada tempada e cedido a un club diferente: Elche CF (00/01), Polideportivo Ejido (01/02), sen ficha nin equipo na 02/03, UD Las Palmas (03/04), Pontevedra CF (04/05) e o Skoda Xanthi grego (05/06). Nestes equipos non conseguiu volver ás marcas goleadoras dos tempos do Compostela, sendo a tempada no Elche a máis prolífica en goles con 6 tantos anotados en 28 partidos.

Na tempada 2006–07 desvinculouse do Deportivo da Coruña e fichou polo CF Extremadura, equipo co que descendería a Terceira División. No verán de 2007 retornou a Santiago de Compostela e fichou polo SD Ciudad de Santiago, o primeiro equipo da capital galega despois da liquidación da antiga SD Compostela.[2] Permaneceu no club santiagués dúas tempadas, logrando o ascenso á Segunda B na primeira delas, e pasou logo a outro equipo da cidade, o Santiago de Compostela CF, da Preferente Norte, co que anotou 17 goles en 16 partidos. Na tempada 2010–11 fichou polo CD Boiro, tamén de Preferente, onde actuou tamén como director deportivo.[3] Deixou o equipo por desacordos coa directiva e na tempada 2012-2013 estivo no Atlético de Riveira (1ª autonómica).

Ao ano seguinte fichou polo Ribadumia C.F., de Preferente Sur. Estivo cinco tempadas no equipo pontevedrés, tres delas en Terceira, e marcou 97 goles. En 2017 fichou polo Puebla CF, da Primeira Autonómica,[4] e na tempada 2018-2019 volveu ao CD Boiro, en Terceira División, converténdose ademais no presidente do club.[5] Tomou as rendas do equipo boirense nunha situación límite, con máis de 400.000 euros de débeda e tendo que confeccionar un equipo a marchas forzadas para comezar a tempada. Anotou 13 goles pero o equipo acabou descendendo a Preferente.[3] Con todo, conseguiu pagar gran parte da débeda e na tempada seguinte ocupaba a terceira posición da táboa cando a pandemia por coronavirus obrigou á suspensión das competicións.[6][3]

Notas[editar | editar a fonte]

  1. ""Se puede", Changui ya lo hizo". La Opinión A Coruña (en castelán). 25 de novembro de 2019. Consultado o 29 de xullo de 2020. 
  2. "Changui, nuevo jugador del Cidade de Santiago tras dejar el Extremadura" (en castelán). 27 de xullo de 2007. Consultado o 29 de xullo de 2020. 
  3. 3,0 3,1 3,2 Sevilla, Álvaro (3 de maio de 2019). "Ascenso y caída del Boiro" (en castelán). Consultado o 29 de xullo de 2020. 
  4. "El delantero coruñés Changui ficha por un club de Barbanza". La Voz de Galicia (en castelán). 27 de agosto de 2017. Consultado o 29 de xullo de 2020. 
  5. Sevilla, Álvaro (18 de xullo de 2018). "Changui asume la presidencia del Boiro en el tiempo de descuento". La Voz de Galicia (en castelán). Consultado o 29 de xullo de 2020. 
  6. Pais, Antonio (9 de xuño de 2020). "No espera hasta agosto el Boiro la decisión oficial sobre su ascenso". El Correo Gallego (en castelán). Consultado o 29 de xullo de 2020. 

Véxase tamén[editar | editar a fonte]

Ligazóns externas[editar | editar a fonte]