Copa de Europa da EHCA 2022
Este artigo ou sección refírese a un tema de actualidade. A información fornecida aquí pode cambiar en calquera momento segundo avanza o evento, e os informes iniciais poden ser pouco fiables. Por favor, non achegues datos especulativos e lembra incluír referencias e citar as fontes. |
A Copa de Europa da EHCA 2022, denominada oficialmente Golden Cup, será a primeira edición da Copa de Europa de hóckey a patíns organizada pola Asociación Europea de Clubs de Hóckey a Patíns (coñecida polas súas siglas en inglés "EHCA") de xeito paralelo á Liga Europea de hóckey a patíns 2021/22, organizada pola World Skate Europe, logo de que ambas organizacións non chegaran a un acordo sobre o formato da máxima competición continental de hóckey a patíns.
A competición celebrarase na cidade da Coruña do 11 e o 17 de abril de 2002, coincidindo co 50º aniversario do equipo local, o Liceo.
Organización da sede[editar | editar a fonte]
Antecedentes[editar | editar a fonte]
Aproveitando a disputa en Luso (Portugal) da final a catro da Liga Europea masculina 2020/21 durante os días 15 e 16 de maio, os representantes da Asociación Europea de Clubs de Hóckey a Patíns (coñecida polas súas siglas en inglés "EHCA") e dos comité de hóckey a patíns da World Skate mantiveron unha reunión para comezar a traballar conxuntamente na nova edición da máxima competición continental de hóckey a patíns, co obxectivo de mellorala e profesionalizala, así como darlle unha maior visibilidade á modalidade.[1]
Segundo os clubs da EHCA, a necesidade de modificar a Liga Europea obedecía á difícil situación económica do hóckey a patíns europeo, en palabras do portavoz da Asociación, Toni Miró:[2]
“ | A nós cústanos cartos xogar en Europa. Gastamos nos desprazamentos mais non temos ningún ingreso. | ” |
— Toni Miró |
Dous meses despois desta primeira reunión, durante a Asemblea Xeral da EHCA celebrada o 16 de xullo, os clubs membros da EHCA acordaron por unanimidade non inscribirse na Liga Europea 2021/22. Nun comunicado emitido o 26 de xullo sinalábase que logo de celebrarse varias reunións entre a asociación, o WSE-RH e o WSRH, o comité europeo de hóckey a patíns non se pronunciara sobre o recoñecemento da EHCA como coorganizador, como solicitara na derradeira reunión o 21 de xullo, nin dera a coñecer as características da nova edición da máxima competición do hóckey a patíns europeo. Neste punto semellaba que a EHCA organizaría a súa propia competición en setembro integrada polos clubs membros, así como aqueles que gañaran a súa participación por méritos deportivos.[3]
Con todo, as conversas continuaron e logo dunha reunión telemática celebrada o 29 de xullo, e na que participaron o Director de Sport Departmente de WS Francesco Zangarini, o Director de WS-RHTC e presidente de RFEP Carmelo Paniagua, o Director de WSE-RHTC Agostinho da Silva, o presidente da FPP, e o Presidente da EHCA Joao Nuno Araujo, a situación mudou. Todas as partes chegaron a un acordo sobre o modelo de competición para a Liga Europea 2021/22, na que participarían un máximo de 16 equipos en dous grupos de oito equipos cun formato de liga todos contra todos a dobre volta con partidos disputados os xoves, finalizando cunha final a oito na que participarían os catro mellores equipos de cada grupo. A inscrición de máis equipos na competición obrigaría a programar unha fase previa. A EHCA confiaba que o diálogo permitira chegar a un acordo definitivo para traballar conxuntamente na organización da máxima competición do hóckey a patíns continental.[4][5]
Lonxe de chegarse a unha solución, 48 horas despois de chegar a un acordo sobre o modelo de competición, WS Europe retractouse e mantivo o formato de catro grupos de catro equipos cada un a unha única volta. A EHCA anunciou o 9 de setembro que os seus integrantes, doce equipos en total,[a] só xogarían a Liga Europea baixo o sistema que acordaran as partes. A máxima competición do hóckey a patíns europeo encontrábase nunha situación similar á que viviu o baloncesto europeo cando a Euroleague organizou o seu propio torneo á marxe da FIBA.[5]
Finalmente ningún dos clubs membros da EHCA participou no sorteo da Liga Europea 2021/22.[6]
Elección da sede[editar | editar a fonte]
Logo da decisión de non participar na competición organizada pola WS Europe, os membros da EHCA comezaron a traballar para, en palabras de Toni Miró:
“ | ... procurar unha solución para os equipos ne quedamos fora de Europa esta tempada e para comezar a organizar a nova competición a partir do ano que vén. | ” |
— Toni Miró |
O 14 de febreiro de 2022 anunciábase que a competición organzada pola EHCA tería lugar entre os días 11 e 17 de abril na cidade da Coruña, coincidindo co 50º aniversario do equipo local e membro da asociación, o HC Liceo. En palabras da alcaldesa da cidade herculina, Inés Rey, A Coruña convertirase nese momento na "referencia do hóckey europeo".[7][8]
Logo de facer público o formato, os equipos e a sede da competición, a EHCA apresurouse a sinalar que a Golden Cup era un torneo "oficioso" que non entraba en conflito coa Federación Europea, ao mesmo tempo que sinalaba que os clubs membros estaban "totalmente abertos ao diálogo" e que "seguen comprometidos coa creación de competicións europeas inclusivas que fortalezan o hóckey a patíns".[9]
Na mesma semana da designación da Coruña como sede, o Liceo iniciou a venda de abonos para a competición. Os primeiros 500 abonos estiveron dispoñibles só para os 2 000 socios e os aproximadamente 5 000 abonados do club verde ata o 25 de febreiro, e posteriormente comezará a venda de abonos para o público xeral.[10]
Sede[editar | editar a fonte]
- Artigo principal: Pazo dos Deportes de Riazor.
Todos os partidos da fase de grupos e da fase final celebraranse no Pazo dos Deportes de Riazor, pavillón con capacidade para 4 425 espectadores e unha pista de xogo de parquet cunhas dimensións de 20 × 40 metros, e que é o fogar do principal equipo de hóckey a patíns da cidade herculina e de Galiza, o Hockey Club Liceo.[11][12] Por mor da pandemia de coronavirus a capacidade do pavillón viuse reducida inicialmente ao 75%, o que supón unhas 3 300 persoas, se ben dende o club herculino sinalábase que a capacidade podería aumentar dependendo a evolución da pandemia.[10]
A construción do pavillón comezou en novembro de 1968, precisamente cun partido de hóckey a patíns entre a selección española e un combinado de xogadores do resto do mundo, sobre unha superficie de 5.840 m², baixo a dirección do arquitecto municipal Santiago Rey Pedreira[13][14] e foi remodelado en 2011 cun investimento de 2,4 millóns de euros.[15]
O recinto ten acollido en catro ocasións a Copa do Rei de hóckey a patíns,[16] e en tres ocasións competicións internacionais de seleccións absolutas de hóckey a patíns, logo de ter acollido dúas veces o Campionato do Mundo, en 1972 e 1988,[17] e unha vez o Campionato de Europa en 2018.[11]
Participantes e sistema de competición[editar | editar a fonte]
O torneo iniciarase cunha fase de grupos na que os 12 equipos serán encadrados en catro grupos de tres equipos cada un. Os dous mellores equipos de cada grupo clasificaranse para a segunda rolda, que se disputará en formato de final a oito, con cuartos de final, semifinais e final.[18][8]
A competición estará formada polos 12 equipos que conformaban no momento a EHCA:[7]
Notas[editar | editar a fonte]
- ↑ Nese momento a EHCA estaba integrada por cinco equipos da OK Liga (FC Barcelona, CH Caldes, HC Liceo, CE Noia e Reus Deportiu), cinco equipos portugueses (OC Barcelos, SL Benfica, UD Oliveirense, FC Porto e Sporting de Lisboa), o HC Forte dei Marmi italiano, e o SCRA Saint-Omer francés.[5]
- Referencias
- ↑ "La EHCA y la WS empiezan a trabajar juntos en la nueva competición europea 2021-2022". Mundo Deportivo (en castelán). 16 de maio de 2021. Consultado o 5 de novembro de 2021.
- ↑ "Crisis en el hockey patines: ha empezado la Champions sin Barça ni los otros grandes". Mundo Deportivo (en castelán). 25 de outubro de 2021. Consultado o 27 de xaneiro de 2022.
- ↑ "Los clubes de la EHCA acuerdan no inscribirse en la Liga Europea 21/22" (en castelán). HC Liceo. 26 de xullo de 2021. Consultado o 5 de novembro de 2021.
- ↑ "Los clubes de EHCA deciden inscribirse a la Liga Europea". Mundo Deportivo (en castelán). 18 de agosto de 2021. Consultado o 6 de novembro de 2021.
- ↑ 5,0 5,1 5,2 "El Barça y los mejores clubs se desmarcan de la Liga Europea". Mundo Deportivo (en castelán). 10 de setembro de 2021. Consultado o 6 de novembro de 2021.
- ↑ "El sorteo de la Liga Europea consuma la división del hockey continental". Mundo Deportivo (en castelán). 11 de setembro de 2021. Consultado o 27 de xaneiro de 2022.
- ↑ 7,0 7,1 "A Coruña acogerá la Copa de Europa de hockey patines con clubes EHCA". Mundo Deportivo (en castelán). 14 de febreiro de 2022. Consultado o 23 de febreiro de 2022.
- ↑ 8,0 8,1 "A Coruña acollerá a Golden Cup 50 aniversario Deportivo Liceo". HC Liceo. 14 de febreiro de 2022. Consultado o 23 de febreiro de 2022.
- ↑ "La EHCA dice que el Golden Cup es un torneo "oficioso" y que no entra en conflicto con la Federación Europea". dxt (en castelán). 15 de febreiro de 2022. Consultado o 23 de febreiro de 2022.
- ↑ 10,0 10,1 "A la venta a 50 euros los pases para la Golden Cup, primero para socios y abonados del Deportivo Liceo". La Voz de Galicia (en castelán). 17 de febreiro de 2022. Consultado o 23 de febreiro de 2022.
- ↑ 11,0 11,1 "A Coruña, sede del Campeonato de Europa" (en castelán). Real Federación Española de Patinaxe. 27 de febreiro de 2018. Consultado o 20 de xullo de 2018.
- ↑ "#okcoruna: Informations, Meetings and Media" (en inglés). World Skate Europe. 11 de xullo de 2018. Arquivado dende o orixinal o 22 de xullo de 2018. Consultado o 21 de xullo de 2018.
- ↑ "Corunha confirmada para o Europeu". hoqueipt.com (en portugués). 27 de febreiro de 2018. Consultado o 11 de agosto de 2018.
- ↑ "Franco inauguró un Palacio de los Deportes en La Coruña". ABC (en castelán). 2 de agosto de 1970. p. 66.
- ↑ "El Ayuntamiento ultima las obras del Palacio de Deportes de Riazor". La Opinión de A Coruña (en castelán). 16 de marzo de 2011. Consultado o 27 de xullo de 2018.
- ↑ "A Coruña, sede de la próxima edición de la Copa del Rey y de la Reina" (en castelán). Real Federación Española de Patinaxe. 13 de novembro de 2019. Consultado o 23 de febreiro de 2022.
- ↑ Varela, María (7 de febreiro de 2018). "A Coruña opta al Europeo". La Opinión (en castelán). Consultado o 15 de xullo de 2018.
- ↑ "El Liceo competirá en casa frente a los otros once clubes de la EHCA". dxt (en castelán). 15 de febreiro de 2022. Consultado o 23 de febreiro de 2022.