Laura Gardin Fraser

Para a actriz escocesa, véxase Laura Fraser

Laura Gardin Fraser

Biografía
Nacemento	14 de setembro de 1889 Chicago
Morte	13 de agosto de 1966 (76 anos) Norwalk
Lugar de sepultura	Willowbrook Cemetery (en)
Outros nomes	Gardin-Fraser, Laura
Educación	escola Horace Mann Liga de Estudantes de Arte de Nova York
Actividade
Ocupación	escultora, artista
Membro de	Academia Estadounidense das Artes e as Letras
Participou en
1932	art competitions at the 1932 Summer Olympics (en)
1928	art competitions at the 1928 Summer Olympics (en)
Familia
Cónxuxe	James Earle Fraser (1913–)
Premios
(1926)  Premio Sanford Saltus de Medalla
Descrito pola fonte	American Women Sculptors: a history of women working in three dimensions (en) American Women Artists, Past and Present: A Selected Bibliographic Guide (en)

Laura Gardin Fraser, nada en Chicago o 14 de setembro de 1889 e finada en Norwalk, Connecticut, o 13 de agosto de 1966, foi unha escultora, medallista e deseñadora de moedas estadounidense.

Traxectoria

Primeiros anos e formación

Laura Gardin naceu en setembro de 1889, filla do executivo bancario John Emil e de Alice Tilton Gardin, unha coñecida artista, en Morton Park, un suburbio de Chicago e recibiu a súa educación primaria nas escolas locais. Logo do traslado do seu pai a Nova York en 1904, Laura asitiu á escola na vila de Rye e logo aos institutos Wadleigh e Horace Mann School, na cidade de Nova York; nesta última graduouse en educación secundaria en 1907. Desde a súa infancia amosou aptitudes para modelar figuras e traballar coa arxila, talento que desenvolveu baixo a tutela da súa nai.

Logo do ensino secundario, Fraser estudou durante un curto período na Universidade Columbia e logo ingresou na Art Students League de Nova York (1910-1912). Durante os seus anos nesta institución académica coñeceu e tivo como profesor o escultor James Earle Fraser, con quen casou o 27 de novembro de 1913. A parella adquiriu unha casa en Westport, Connecticut, na que construíu un estudio que foi o centro da súa vida profesional durante toda a súa vida.

Durante a primeira guerra mundial Laura Gardin Fraser foi capitá do Corpo Motorizado do Servizo de Ambulancias.

Carreira profesional

Soa ou facendo equipo co seu esposo, encargouse do deseño de varias moedas estadounidenses conmemorativas, entre elas o medio dólar do Centenario de Alabama (1921), as moedas conmemorativas de Ulysses S. Grant (1922), o medio dólar do Centenario de Fort Vancouver (1925), e o reverso do medio dólar conmemorativo do Oregon Trail (1926).

En 1931 gañou tamén o concurso para deseñar unha moeda circulante, o novo cuarto de dólar Washington, mais o seu deseño gañador non foi finalmente seleccionado polo daquela secretario do Tesouro, Andrew Mellon, que preferiu no canto del un deseño de John F. Flanagan. No entanto, o deseño do anverso de Fraser co busto de Washington foi aproveitado décadas despois para unha moeda conmemorativa de ouro de cinco dólares en 1999, tamén a partir de 2022 para a serie circulante de cuartos de dólar Mulleres Americanas.

Entre as súas medallas máis salientables están as medallas Lindbergh, Benjamin Franklin e George C. Marshall do Congreso; a do bicentenario de Washington e a do centenario da American Numismatic Society en 1958.

A dobre estatua dedicada a Stonewall Jackson e Robert E Lee, na súa localización orixinal en Charles Village, Baltimore.

Malia ser recoñecida principalmente polas súas contribucións á numismática e á medallística, Laura G. Fraser recibiu tamén encargas importantes de escultura de tamaño heroico. A máis salientable neste capítulo foi a acadada logo da súa vitoria no concurso para unha estatua ecuestre dobre dedicada aos xenerais Robert E. Lee e Stonewall Jackson. O concurso tivo lugar en 1936 e nel foron invitados a participar seis eminentes escultores, dos que só ela era unha muller —os outros cinco foron Lee Lawrie, Paul Manship, Edward McCartan, Hans Schuler e Frederick William—. Fraser rematou a dobre escultura en 1948 e foi instalada no Wyman Park, en Charles Village, Baltimore.

En xaneiro de 2016, un grupo de traballo encargado do estudo dos monumentos confederados en Baltimore recomendou que se retirase o monumento a Jackson e Lee, e os comisionados ditaminaron que a esta escultura de Fraser se lle debería ofrecer ao Servizo de Parques dos EEUU para a súa instalación en Chancellorsville, en Virxinia, o lugar onde os dous xenerais confederados se viron por derradeira vez pouco antes da batalla de Chancellorsville en 1863. A escultura foi retirada no abrente do 16 de agosto de 2017 pola cidade de Baltimore, como reacción aos disturbios ocorridos en Charlottesville uns días antes, e a súa localización futura quedou pendente de decidir. A escultura permaneceu almacenada e xerouse un debate sobre a conveniencia da destrución dos monumentos dedicados aos confederados.

A Fraser débeselle tamén tres paneis de bronce para a Biblioteca da Academia Militar dos Estados Unidos en West Point, e outras obras relevantes, como un Pegaso en granito branco para os xardíns Brookgreen de Carolina do Sur.

A súa obra tamén formou parte dos concursos de arte dos Xogos Olímpicos de Verán de 1928 e de 1932.

En 1924 foi elixida membro asociado da Academia Nacional de Deseño, da que pasou a ser académica de pleno dereito en 1931. Tamén foi membro da Sociedade Nacional de Escultura e do Instituto Nacional das Artes e das Letras.

Laura Gardin Fraser finou por mor dunha apoplexía no hospital de Norwalk, Connecticut, o 13 de agosto de 1966, á idade de 76 anos, e foi soterrada xunto ao su marido, James Earle Fraser —finado en 1953—, no cemiterio Willowbrook de Westport, Connecticut.

Recoñecementos

• 1915: Medalla de Honra do National Arts Club.
• 1916: Premio Helen Foster Marnett.
• 1919: Premio Julia L. Shaw, na Exposición da Academia Nacional de Deseño.
• 1926: Premio Sanford Saltus de Medalla, da American Numismatic Society.
• 1929: Premio Ager.
• 1931: Medalla de ouro Waltrous, da Academia Nacional de Deseño.

Galería de obras

Esculturas

• 
  Escultura do Hall of Great Americans (Bronx Community College).
• 
  Pegasus (1954), escultura en Brookgreen Gardens.
• 
  Baixorrelevo de Eduardo I (1950). Cámara de Representantes dos EEUU.
• 
  O pedestal do monumento a Jackson e Lee logo de ser retirada a estatua en 2017.

Moedas

• 
  ½ dólar Centenario de Alabama (1921). A/.
• 
  1 dólar de ouro Grant Memorial (1922). A/.
• 
  ½ dólar Centenario de Fort Vancouver (1925). A/.
• 
  ½ dólar Oregon Trail (1926). R/.
• 
  5 dólares (1999). A/

Véxase tamén

Bibliografía

• F. P. M. (1920). "Laura Gardin Fraser, Artist, Sculptor". En The Numismatist. Vol 33. Nº 7. Xullo . Páxina 315.
• Gilbert, D. B. (1959). "Fraser, Laura Gardin". En Who’s Who in American Art 1959. R.R. Bowker Company, New York. Páxina 192.
• Panhorst, M. W. (2000). "Fraser, Laura Gardin". En American National Biography. Oxford University Press. ISBN 978-0-19-860669-7
• Rubenstein, C. S. (1982). "Laura Gardin Fraser (1889-1966)". En American Women Artists: from Early Indian Times to the Present. Avon Publishers. Páxina 209. ISBN 0-380-61101-5
• Smith, P. (2012). "Fraser, Laura Gardin". En American Numismatic Biographies. Páxina 154.

Ligazóns externas

• Obras de Laura Gardin Fraser (Medalartists.com)
• The Coins and Medals of Laura Gardin Fraser (NGC Collectors Society)