John F. Flanagan
| John F. Flanagan | |
|---|---|
 | |
| Nacemento | 4 de abril de 1865 |
Newark Nova Jersey | |
| Falecemento | 28 de marzo de 1952 (86 anos) |
 Nova York | |
| Área | Escultura, medalla, moeda. |
| Educación | Cooper Union. Art Students League. Escola de Belas Artes de París. |
| Obras | Cuarto de dólar Washington. |
| Nacionalidade |  Estadounidense |
| [ editar datos en Wikidata ] | |
John F. Flanagan, nado en Newark, Nova Jersey, o 4 de abril de 1865 e finado en Manhattan, Nova York, o 28 de marzo de 1952, foi un escultor, medallista e deseñador de moeda estadounidense.
A súa obra máis recoñecida é o cuarto de dólar Washington, aparecido en 1932 e cuxo anverso se mantivo, con algunhas modificacións, ata 2021.
Traxectoria[editar | editar a fonte]
John Flanagan era fillo do escultor de mármore George Flanagan, de quen aprendeu o manexo do cicel.[2] Asistiu á Cooper Union de Nova York entre 1880 e 1882, onde aprendeu a modelar ornamentación arquitectónica, e tamén traballou para a Perth Amboy Terra Cotta Company.[3]
Posteriormente foi axudante de Paul Wayland Bartlett en Boston e de Augustus Saint-Gaudens, en Nova York,[4] entre 1885 e 1888. Alí asistiu a clases nocturnas na Art Students League,[2] onde tomou clases de George de Forest Brush.[3]
Da súa estreita relación artística con Saint-Gaudens, que fora alumno de François Jouffroy, Flanagan herdou o estilo francés e formou parte da xeración de escultores que o promoveron nos Estados Unidos. A amizade con Saint-Gaudens viuse reflectida nun busto seu de bronce creado por Flanagan en 1924, que se expón na Universidade de Nova York.[5][6]
Cara ao ano 1890 marchou unha tempada a París, onde Saint-Gaudens tiña moitos amigos, que lle serviron de axuda. Alí Flanagan estudou con Henri Chapu na Académie Julian. Tamén frecuentou a Académie Colarossi e, posteriormente, asistiu ao obradoiro de Alexandre Falguière na Escola de Belas Artes de París,[2][4][7] na que se matriculou en 1891. Nesa cidade expuxo tamén no Salon des Artistes Français en 1899.[3]
En 1891 axudou a Frederick William MacMonnies coa Columnian Fountain, que adornaría o espello de auga da Exposición Colombina de Chicago de 1893.[3]
Pouco despois, Flanagan recibiu a súa primeira encarga: a Biblioteca do Congreso dos Estados Unidos elixiuno en 1893 para a construción dun reloxo monumental de bronce que terminou en 1896 e que en 1902 se instalou na sala de lectura principal do edificio Thomas Jefferson, en Washington.[2][3][8] Esta obra representa o Pai Tempo sostendo un reloxo de area, con outras figuras, e preto da parte inferior aparecen dous estudantes lendo e escribindo. O conxunto está esculpido en varios tipos de mármore, recuberto de pedras semipreciosas, e as figuras son de bronce.[6]
En 1897 foi elixido membro destacado da comisión de artistas invitados á Exposición Universal de París de 1900. Alí presentou varias medallas que chamaron a atención dos críticos, e recibiu a medalla de prata na súa especialidade.[9]
Logo do seu regreso a Nova York en 1902, Flanagan iniciou unha prolífica carreira artística que durou ata mediados da década de 1930, con obras como Antique Education (1909), un altorrelevo para a Biblioteca Pública de Newark ou unha estatua de Joseph Henry para o Estado de Nova York, sita en Alamy Park, Albany (1927).[3]
A comisión encargada das conmemoracións do bicentenario do nacemento do primeiro presidente dos Estados Unidos, George Washingnton, en 1932, escolleu uns deseños propostos por John Flanagan para a creación dunha moeda de prata dun cuarto de dólar, cuñada en 1932.[7] Inicialmente a moeda tiña carácter unicamente conmemorativo e prevíase a súa emisión só ese ano, mais finalmente o coñecido como cuarto de dólar Washington converteuse en moeda de curso legal, emitida anualmente co mesmo deseño, en prata ata 1964 e en metal común ata 1998. Posteriormente, o anverso creado por Flanagan mantívose, con algunhas alteracións, ata 2021.[2][6][10]
Aínda que Flanagan só tivo esta experiencia como deseñador de moedas, a súa produción de medallas foi máis abundante. Unha das súas medallas máis coñecidas (1916) conmemora a batalla de Verdún na primeira guerra mundial, coa inscrición Ils ne passeront pas ("Non pasarán"),[6][11] que foi un regalo dos Estados Unidos a Francia.[2][12]
Outros dos seus traballos salientables no ámbito da medallística son a medalla da Hudson-Fulton Celebration (1909), a Medalla Aphrodite-Swift Runners (1932),[2][12] a medalla conmemorativa da visita do Príncipe de Gales e a dos Cabaleiros de Colón (1920), a medalla Roston do Congreso (1913) e a medalla Pan-Pacific Award (1915), entre outras.[7]
Tamén realizou un bo número de plaquetas metálicas con retratos de personaxes relevantes da sociedade e da arte dos Estados Unidos, como Theodore Roosevelt, Walt Whitman, Paul Wayland Bartlett, Daniel Chester French ou J. Alden Weir.[3]
En 1911, Flanagan ingresou na Academia Nacional de Deseño como membro asociado,[2] e foi nomeado académico en 1928.[3]
John F. Flanagan finou en Nova York o 28 de marzo de 1952.[7] Foi soterrado no cemiterio Ferncliff de Hartsdale, condado de Westchester, Nova York.[2]
Recoñecementos[editar | editar a fonte]
- 1900: Medalla de prata da Exposición Universal de París.[9]
- 1921: Premio Sanford Saltus de Medalla, da American Numismatic Society, de Nova York.[7]
Notas[editar | editar a fonte]
- ↑ "John Flanagan, 1865-1952". Biblioteca do Congreso dos EEUU
- ↑ 2,0 2,1 2,2 2,3 2,4 2,5 2,6 2,7 2,8 Bjornstad, W. "John Flanagan". En Findagrave.com
- ↑ 3,0 3,1 3,2 3,3 3,4 3,5 3,6 3,7 Tolles, T. (2001). "John Flanagan (1865-1952)". En American Sculpture in the Metropolitan Museum of Art: A catalogue (II). The Metropolitan Museum of Art, Nova York. Páxina 467. ISBN 0-87099-923-0
- ↑ 4,0 4,1 Bénézit, E. (1939). Dictionaire des peintres, sculpteurs, dessinateurs et graveurs. II. Gründ, París. 1939. Páxina 293.
- ↑ "Augustus Saint-Gaudens, by John Flanagan". The Metropolitan Museum of Art (Metmuseum.org).
- ↑ 6,0 6,1 6,2 6,3 "John Flanagan, US Coin Designer and Engraver". USA Coin Book (www.usacoinbook.com)
- ↑ 7,0 7,1 7,2 7,3 7,4 Smith, P. (2012).
- ↑ "Clocking In". Library of Congress Blog. ISSN 2691-3631
- ↑ 9,0 9,1 Tolles, T. (2001).
- ↑ "George Washington Quarter". United States Mint.
- ↑ 11,0 11,1 Paine, F. O. (1922). Páxina 16.
- ↑ 12,0 12,1 Hassler, D. J. (1988).
- ↑ Paine, F. O. (1922). Páxina 14.
Véxase tamén[editar | editar a fonte]
Bibliografía[editar | editar a fonte]
- Hassler, D. J. (1988). "The Medals of John Flanagan". En Stahl, A. M. The Medal in America. American Numismatic Society. Nova York. Páxinas 119-133. ISBN 978-0897222266.
- Hassler, D. J. (1990). "John Flanagan: an American Beaux-Arts Sculptor and Medallist". En Public Art in New Jersey during the Period of the American Renaisance. Museums Council of New Jersey. Páxinas 76-83.
- Paine, F. O. (1922). "John Flanagan - Sculptor and Medallist". En The International Studio, 75 Abril. Páxinas 14-16.
- Smith, P. (2012). "Flanagan, John F.". En American Numismatic Biographies. Páxina 146.
- Tolles, T. (ed.) (2001). "John Flanagan (1865-1952)". En American Sculpture in the Metropolitan Museum of Art: A catalogue (II). The Metropolitan Museum of Art, Nova York. Páxina 467. ISBN 0-87099-923-0
