Coin World
| Coin World | |
|---|---|
| País | Estados Unidos de América |
| Lugar | Sidney, Ohio. |
| Lingua | Inglés. |
| Especialidade | Numismática |
| Fundación | 1960. |
| Fundador | J. Oliver Amos. |
| Primeira edición | Marzo de 1960 (Vol.1. Nº0). |
| Última edición | Vixente. |
| Desenvolvemento | |
| Editor | William Gibbs. |
| Publicador | Amos Hobby Publishing. |
| Circulación | |
| Frecuencia | Semanal e mensual. |
| ISSN | 0010-0447 |
| Na rede | |
| http://www.coinworld.com/ e http://www.coinworldonline.com | |
    | |
| [ editar datos en Wikidata ] | |
Coin World é unha revista numismática estadounidense de periodicidade semanal e mensual.[1] Trátase dunha das revistas non académicas máis populares entre os coleccionistas de moedas dos Estados Unidos e abrangue todos os campos da numismática, entre eles as moedas, os billetes, as fichas comerciais e as medallas.
Historia
[editar | editar a fonte]Fundación e primeira época (1960-1962)
[editar | editar a fonte]Coin World foi fundada como unha revista de periodicidade semanal en 1960 por J. Oliver Amos, un profesional pertencente á terceira xeración de editores de xornais.[2][3] Amos levou ao mundo da numismática a súa experiencia como editor do The Sidney Daily News un xornal local da localidade de Sidney, en Ohio, e aplicou ó que aprendera coa edición da revista filatélica Linn's Stamp News. En 1960, o concepto dunha publicación semanal era anovador; no 25º aniversario de Coin World en 1985, Amos indicou que el vira "todas as oportunidades que se poderían desenvolver a partir dunha aparición semanal: reunións de clubs por todo o país, personalidades e moitas outras ideas aprendidas coa publicación de The Sidney Daily News como un xornal comunitario".[4]
Coa colaboración de James F. Kelly, de Ohio, concibiuse a idea de incluír unha sección semanal de tendencias que reflectise os cambios no valor das moedas no mercado.[5] Kelly foi contratado para ser o editor inaugural de Coin World Trends, e D. Wayne Johnson, de Kansas, foi o escollido para ser o editor xefe inaugural.[6]
A edición de mostra de Coin World (volume 1, número 0) imprimiuse en marzo de 1960, e as súas oito páxinas deseñáronse para lles amosar aos potenciais subscritores e anunciantes o aspecto da nova publicación. O primeiro número de tiraxe regular saíu á rúa o 21 de abril dese mesmo ano. Un ano despois, a publicación tiña xa 53.000 subscritores de pagamento.[7]
Etapa de Margo Russell (1962-1985)
[editar | editar a fonte]- Artigo principal: Margo Russell.
Margo Russell converteuse en editora de Coin World en 1962.[8] Russell comezara a súa traxectoria xornalística no The Sidney Daily News e inicialmente unírase ao quipo de Coin World staff como investigadora histórica.[9] Logo da súa xubilación como editora o 28 de febreiro de 1985, logo de 23 anos no posto, moitos numismáticos considerábana unha das persoas máis influentes no terreo numismático estadounidense e coñecíana como a "primeira dama da numismática”.[10] En 1975, Russell recibiu o premio Farran Zerbe Memorial, o máis alto recoñecemento da American Numismatic Association, e en 1986 foi incluída no Salón da Fama desta entidade.[11][12][13]
No período de Russell, a publicación xogou un papel relevante na promoción do coñecemento da numismática como afección, ao manter estreitas relacións coa Casa da Moeda dos Estados Unidos. Russell soubo asumir os desexos e as inquedanzas dos coleccionistas numismáticos.[14]
Etapa de Beth Deisher (1985-2012)
[editar | editar a fonte]- Artigo principal: Beth Deisher.
Logo do retiro de Margo Russell en 1985, foi sucedida por Beth Deisher como editora da revista, posto no que permaneceu ata 2012.[15]
Na etapa de Deisher como editora a revista foi testemuña, en 1995, do nacemento do programa de cuñaxe das 50 moedas de medio dólar conmemorativas de cada estado dos EEUU.[16]
Durante este mandato comezou a editarse un suplemento da revista titulado Coin World's Coin Values, que se publicou ata 2012.[17]
Etapa de Steve Roach (2012-2015)
[editar | editar a fonte]Steve Roach, que ata a data fora editor asociado, asumiu o cargo de editor xefe do Coin World o 30 de abril de 2012.[15]
Nesta época a revista amplía a súa cobertura ás noticias dun ámbito numismático máis global, como é o caso da gran cantidade de falsificacións chinesas de moedas que inundou o mercado.[18]
Etapa de William T. Gibbs (desde 2015)
[editar | editar a fonte]William T. Gibbs incorporouse á redacción de Coin World como editor axudante en 1976 e foi nomeado editor xefe o 1 de maio de 2015, logo de pasar por outros postos. Desde a súa posición actual, dirixe todas as publicacións de Coin World, tanto impresas como en liña, o que inclúe tamén a edición de libros.[19]
En marzo de 2019, Coin World lanzou un potcast semanal presentado polos editores asociados Chris Bulfinch e Jeff Starck.[20] En marzo de 2021 editouse un libro a modo de suplemento en conmemoración do 60º aniversario de Coin World, titulado Coin World Celebrating 60: The Most Influential People in Numismatics 1960-2020. Este volume foilles enviado aos subscritores conxuntamente co número de marzo de 2021, e nel faise unha listaxe das persoas máis influentes na numismática estadounidense durante esas seis décadas, como resultado dunha votación dos seus lectores.[21][22]
Contidos
[editar | editar a fonte]En cada número, a revista presenta unha serie de seccións fixas, ademais do noticias de actualidade:
- News and Analysis: sección centrada na actualidade do ámbito numismático, como as poxas de moedas, achados, convencións comerciais, etc.
- Readers Ask: os propios lectores son parte fundamental desta sección de preguntas e respostas.
- Editorial Opinion: o editor xefe comenta a actualidade do sector desde a súa perspectiva.
- Coin Values Spotlight: un seguimento en profundidade das apreciacións e as depreciacións de moedas concretas ao longo do tempo.
- Coin Values Market Analysis: esta sección céntrase nos prezos alcanzados por moedas destacadas nas poxas máis recentes.
- Coin Shop Lottery: Thomas Cohn comenta as súas adquisicións máis recentes
- About VAMs: Sección dedicada aos "dólares Morgan" e as súas variedades, da man do especialista John Roberts.
- The Joys Of Collecting: sección a cargo de Q. David Bowers.
- Collecting Paper: dedicada ao papel moeda.
- Collectors' Clearinghouse: Errors and Varieties: o experto Mike Diamond conduce esta sección de erros e variantes, a partir de casos enviados polos lectores.
Notas
[editar | editar a fonte]- ↑ "Dick Johnson on Numismatic Periodical Publishing". En The E-Sylum. Vol. 20. Nº 3. Xaneiro de 2017.
- ↑ "Amos Family". EPNNES & Washington University in St. Louis.
- ↑ Bulfinsh, C. "Coin World Marketplace launches". En Coin World. 11 de outubro de 2018.
- ↑ "Coin World's first issue a reader find: Readers Ask". En Coin World. 19 de xuño de 2015.
- ↑ "James F. Kelly. Biography". EPNNES & Washington University in St. Louis.
- ↑ "Numismatics: The Art of Coins and Medals". Belskie Museum of Art & Science.
- ↑ "Coin World’s first issue a reader find: Readers Ask". En Coin World. 19 de xuño de 2015.
- ↑ "Kolbe & Fanning to offer Margo Russell Library". En Coin Week. 2 de xullo de 2015.
- ↑ Orzano, M. (2015). "Former Coin World Editor Margo Russell dies". En Coin World. 27 de xaneiro.
- ↑ "At NLG Bash, Margo Russell Remembered; CoinWeek Takes 6 Numismatic Literary Guild Awards Arquivado 02 de xuño de 2021 en Wayback Machine.". En Coin Week. 16 de agosto de 2015.
- ↑ "Margo Russell: We Remember a numismatic legend and her legacy". En Coin World.
- ↑ "Farran Zerbe Memorial Award Arquivado 03 de xuño de 2021 en Wayback Machine.". American Numismatic Association.
- ↑ "Numismatic Hall of Fame". American Numismatic Association.
- ↑ "Margo Russell 1919-2015". En The E-Sylum. Vol. 18. Nº 5. 1 de febreiro de 2015.
- ↑ 15,0 15,1 "Deisher Retire as Editor of Coin World". En E-Sylum. Vol. 15. Nº 18. 29 de abril de 2012.
- ↑ "Testimony of Beth Deisher, Editor, Coin Worldbefore the House Financial Services Subcommittee on Domestic and International Monetary Policy, Trade and Technology". U.S. House Committee on Financial Services.
- ↑ "Coin World's Coin Values". EPNNES & Washington University in St. Louis.
- ↑ "Detecting Counterfeits: Fake coin surprises ANACS staff". En Coin World. 2 de outubro de 2013.
- ↑ "Editorial Staff. William T. Gibbs - Managing Editor". Coin World.
- ↑ "Coin World Podcast". En Coin World. 25 de marzo de 2019.
- ↑ Coin World: Celebrating 60-The Most Influential People in Numismatics 1960-2020. Amos Media. (2021).
- ↑ Gibbs, W. (2020). "Monday Morning Brief for Oct. 26, 2020: Hobby's most influential people". En Coin World. 26 de outubro.