Almería

Almería

Bandeira Brasón
Localización
36°50′30″N 2°27′50″O
Estado	España
Comunidade autónoma	Andalucía
Provincia	Provincia de Almería
Capital de	Provincia de Almería
Capital	Almería city (en)
Contén a división administrativa	Almería city (en)
Poboación
Poboación	202.675 (2024) (684,21 hab./km²)
Xeografía
Parte de	Distrito notarial de Almería Comarca Metropolitana de Almería
Superficie	296.216.940 m²
Bañado por	Mar Mediterráneo
Altitude	20 m
Comparte fronteira con	Benahadux Pechina Tabernas Turrillas Níjar Gádor Huércal de Almería Enix Viator
Datos históricos
Fundador	Abd al-Rahman III
Evento clave década de 1140 Siege of Almería (en) agosto de 1309 Cerco de Almeria (1309) (pt)
Organización política
• Alcalde	Ramón Fernández-Pacheco Monterreal (en) (2015–2022) María del Mar Vázquez Agüero (en) (2022–)
Identificador descritivo
Código postal	04001–04009
Fuso horario	UTC+01:00, horario estándar UTC+02:00, horario de verán
Código INE	04013
Outro
Irmandado con	O Aaiún Boulogne-Billancourt Orán Caspe Jaca Buenos Aires Neuwied Tadjoura Melilla Rastatt Ovalle (pt) Cochabamba San Juan del Sur
Sitio web	almeriaciudad.es

Almería é unha cidade costeira do sur de España, capital da provincia de Almería, en Andalucía. É considerada así mesmo capital da comarca metropolitana de Almería e da comarca turística denominada Costa de Almería.

A cidade sitúase no extremo sueste da Península Ibérica e está rodeada ao oeste pola serra de Gádor, ao norte pola serra Alhamilla e o leste polo val e delta do río Andarax. Ao sur atópase o mar Mediterráneo. Con 198.522 habitantes no ano 2019, Almería é unha cidade de crecente relevancia nos ámbitos económico, cultural e deportivo, e un importante nó de comunicacións grazas ao seu porto e aeroporto internacionais.

Historia

Fundada no 955 por Abderramán III nunha localización dominada anteriormente por outras urbes coma a ibera Ucri ou a romana Portus Magnus, Almería desenvolveu un importante papel durante o Califato de Córdoba, chegando a ser o porto máis importante do al-Ándalus dos omeias. Alcanzou o seu máximo esplendor durante a taifa, no século XI, converténdose baixo o reinado de Almotacín nun emporio comercial e cultural. Tras a incorporación á Coroa de Castela no 1489, deciman a poboación os piratas, pragas e terremotos. A recuperación non será visible ata finais do século XIX, co rexurdir da minería e a exportación da uva de mesa, e de novo a partir dos anos 1960 do século XX, grazas á explosión da agricultura intensiva, ó turismo, a construción e o mármore.

No ano 2005 foi a sede dos XV Xogos Mediterráneos.

Patrimonio histórico

Entre o seu patrimonio histórico-artístico, cabe destacar a alcazaba musulmá (séculos X a XV), a catedral-fortaleza (século XVI), o cargadoiro de mineral ou Cable Inglés (finais do século XIX), ou o Museo de Almería, inaugurado no 2006.

Símbolos populares

Indalo

O símbolo por excelencia de Almería e a súa provincia é o indalo, orixinalmente unha pintura rupestre neolítica descuberta na cova dos Letreros (no actual Parque Natural de Serra de María-Los Vélez) en 1868 que representa a un home cazando cun arco.

Nos anos 1940 do século XX, o Movimiento Indaliano idealizou o símbolo, querendo ver nel un home que sostiña o arco da vella. O seu nome foi dado en honor a San Indalecio e proviría en última instancia do ibero indal eccius, «mensaxeiro dos Deuses».

Trátase dun símbolo moi arraigado na sociedade almeriense e é frecuente velo por todos lados. Atopamos un, por exemplo, no escudo da Unión Deportiva Almería.

O sol de Portocarrero

Outro símbolo moi unido á cidade é o erroneamente chamado sol de Portocarrero, altorrelevo que presenta un radiante sol antropomorfo rodeado de grilandas e que aparece esculpido no testeiro da capela funeraria do bispo Diego Férnandez de Villalán, na catedral de Almería. Por unha confusión histórica, é relacionado tradicionalmente este símbolo con outro bispo da diocese almeriense, Juan del Castillo y Portocarrero, do que toma nome a pesar de ser o mandato deste moi posterior. O escudo da Universidade de Almería, por exemplo, baséase neste símbolo.

Patróns

A patroa da cidade é a Virxe do Mar, que celebra a súa festividade o sábado anterior ó último domingo do mes de agosto. A súa imaxe foi atopada na praia de Torregarcía, preto da capital, polo vixía da torre homónima, Andrés de Jaén, o 22 de decembro de 1502. A lenda di que a imaxe, románica, puido formar parte dos restos dun barco naufragado o ser un mascarón de proa que os fieis vestiron como Virxe. Moi preto da torre construíuse a Ermida de Torregarcía en torno a cal se celebra unha romaría a segunda fin de semana de cada xaneiro.

O patrón da cidade e diocese de Almería é santo Indalecio, fundador da diocese da antiga Urci no século I e un dos Sete Homes Apostólicos, primeiros evanxelizadores da Península Ibérica por encomenda de San Paulo. A súa festividade se celebra o 15 de maio.

Galería de Imaxes

• 
  Sol de Portocarrero.
• 
  Escultura dun indalo na praza Marqués de Heredia.
• 
  Alcazaba de Almería.
• 
  O Cable Inglés

Outras Almerías no mundo

• : Almería, provincia de Bilirán.
• : Almeria, unha comunidade no estado de Alabama.
• : Almeria, unha comunidade no estado de Nebrasca.

Véxase tamén

Ligazóns externas

• XV Xogos do Mediterráneo, páxina oficial