Krist Novoselic

Na Galipedia, a Wikipedia en galego.
Krist Novoselic
Krist novoselic.jpg
Nome completo Krist Anthony Novoselic II
Naceu 16 de maio de 1965 (48 anos)
Orixe Compton, California Flag of the United States.svg
Ocupación (s) músico, político, compositor
Xénero rock alternativo, grunge, punk rock, hardcore punk
Instrumento(s) baixo, voz, guitarra, acordeón, farfisa
Relacionado con Nirvana, Sweet 75, Flipper
Tempo en activo 1987 - actualidade


Krist Anthony Novoselic, nado o 16 de maio de 1965, é un roqueiro estadounidense de orixe croata coñecido por ser o baixista de Nirvana. Despois da morte de Kurt Cobain e da disolución de Nirvana formou a banda Sweet 75 coa cantante Yva Las Vegas. Dende o mes de novembro de 2006 ata setembro do 2008 tocou coa banda Flipper.

Traxectoria[editar | editar a fonte]

Primeiros anos[editar | editar a fonte]

A súa familia estaba composta por Paulo e Misha Novoselic e o seu irmán Robert. Krist é un croata-estadounidense nado en Compton, California. El viviu alí durante un ano antes de que a familia se mudase a San Pedro, California, onde estivo gran parte da súa infancia. En 1979 a familia Novoselic mudouse novamente, desta vez a Aberdeen, Washington. En 1980, Novoselic asistiu a ximnasia en Zadar (Croacia) durante un ano, cando o país era parte de Iugoslavia. Alí, el tamén comezou a amosar interese pola música punk. Ao entrar en contacto con bandas como os Sex Pistols, The Ramones, así como varias bandas locais. De volta a casa, Novoselic graduouse na secundaria en 1983.

Un día, Robert, o irmán máis novo de Krist, chegou a casa co seu amigo Kurt Cobain e este escoitou música da parte de arriba da casa. Robert díxolle a Cobain que era o seu irmán máis vello que escoitaba punk rock. Cobain fíxose amigo de Novoselic e os dous descubriron ter gustos musicais semellantes, incluíndo a admiración pola banda local The Melvins. Tempo despois Cobain deulle unha cinta demo da súa banda Fecal Matter. Após varios meses de indecisión, Novoselic finalmente accedeu a formar unha banda con Kurt Cobain.

Nirvana[editar | editar a fonte]

A primeira banda de Cobain e Novoselic apenas durou unhas semanas antes de se desfacer. Porén o dúo descubriu que The Melvins pagaban 80 dólares por un concerto. Inspirados, Cobain e Novoselic crearon unha banda de versións de Creedence Clearwater Revival, na cal Cobain tocaba a batería e Novoselic cantaba e tocaba a guitarra. Esa banda tamén tivo unha vida moi curta. Meses despois coñeceron a Aaron Burckhard e crearon unha nova banda. Esta foi a primeira encarnación de Nirvana, aínda que nunca usaron este nome.

Burckhard estivo só uns meses con eles e o batería de The Melvins, Dale Crover, ocupou o seu lugar ata que Krist e Kurt coñeceron a Chad Channing. O trío gravou Bleach, o seu primeiro álbum, e editouno en 1989. Channing deixaría Nirvana en 1990 e foi substituído por moi pouco tempo por Crover e polo batería de Mudhoney, Dan Peters.

En 1990 o líder de The Melvins Buzz Osborne animou a Novoselic e a Cobain a veren a unha banda de punk chamada Scream. O dúo ficou abraiado co seu batería, Dave Grohl. Poucas semanas despois, Scream separouse, e Grohl chamou a Osborne para comunicarllo. Osborne deulle o teléfono de Novoselic, e este convidou a Grohl a ir a Seattle. Grohl fixo unha audición e uniuse a Nirvana. Poucos meses despois, na primavera de 1991, a banda gravou o seu segundo álbum, Nevermind, o cal lanzou o trío ao éxito mundial.

En 1992, a lexislatura do estado de Washington tentou adoptar un proxecto de lei chamado Erotic Music Law (lei da música erótica). A lei permitiría aos tribunais declararen certos álbums como eróticos polo seu contido, e faría ilegal a súa venda a menores de 18 anos. Un grupo de presión chamado Washington Music Industry Coalition formouse como resposta ao proxecto de lei. Novoselic e Nirvana fixeron unha campaña contra o proxecto e fixeron un concerto benéfico para apoiaren o grupo en setembro de 1992.

Durante a maior parte da súa vida Novoselic usara a forma occidentalizada do seu nome, Chris. Pero despois dunha viaxe a Croacia en 1993 Novoselic decidiu honrar a súa herdanza e volveu á ortografía orixinal do nome, Krist.

Novoselic era tamén coñecido por facer bromas e ter conversas cómicas con Grohl no medio das cancións durante os seus concertos, sobre todo despois de 1991.

Nirvana rematou fortuitamente en abril de 1994 despois da morte de Kurt Cobain. Durante a maior parte dese ano, Novoselic estivo retirado da vida pública. Unha das súas poucas aparicións foi en setembro durante a entrega dos MTV Video Music Awards, onde o vídeo de Nirvana "Heart-Shaped Box" foi premiado por mellor vídeo alternativo.

Equipo[editar | editar a fonte]

Mentres que Kurt Cobain era coñecido por usar guitarras Fender, Novoselic usaba principalmente baixos Gibson, aínda que durante no álbum Bleach el usou un Fender Jazz Bass e un Ibanez Black Eagle. El usou un baixo Gibson Ripper para as gravacións de Nevermind e In Utero. Entre os seus baixos para os directos estaban os RD Artist e os Thunderbirds. Novoselic usou o seu Ripper no vídeo de "Come as You Are" e un RD no de "Heart-Shaped Box" e un Thunderbird non inverso no vídeo de "Smells Like Teen Spirit". No vídeo musical de "In Bloom" Krist usa un Ampeg AEB-1.

Despois de Nirvana[editar | editar a fonte]

O seguinte ano, a Erotic Music Law foi reintroducida pola lexislatura como Matters Harmful to Minors bill (proxecto de lei de asuntos dañinos a menores). Notando que a industria da música en Seattle era algo serio após o éxito da escena local, Novoselic propuxo crear un comité político, que foi chamado JAMPAC (Joint Artists and Musicians Political Action Committee). Durante os seguintes anos JAMPAC loitou por varias cuestións, incluíndo a Teen Dance Ordinance, unha lei de 1985 que limitaba bastante a posiblilidade dos menores de asistiren a concertos. Coa JAMPAC, Novoselic comezou a traballar máis profundamente na política.

Asemade, Novoselic continuou traballando en proxectos musicais. El rexeitou unha oferta de Dave Grohl para unirse á súa nova banda Foo Fighters porque estaba preocupado pola xente que pensaba que Foo Fighters sería unha copia de Nirvana. Novoselic, así e todo, formou a banda Sweet 75 en 1995, editando un álbum autotitulado. En 1999 uniuse a Jello Biafra e ao guitarrista de Soundgarden Kim Thayil no No WTO Combo. Posteriormente uniuse ao líder de Meat Puppets Curt Kirkwood e ao batería de Sublime Bud Gaugh para formaren Eyes Adrift, que se separou en 2003. Despois de Eyes Adrift, Novoselic anunciou que deixaría o negocio da música, xa que non lle gustaba a excesiva promoción dos novos lanzamentos. Porén, recentemente, Novoselic traballou ocasionalmente para a edición dun posible álbum en solitario.

Novoselic continuou activo na política, facendo aparicións para pedir reformas electorais e creando a web fixour.us. Chegou a considerar presentarse en 2004 para Tenente Gobernador do estado de Washington (como demócrata, e desafiando a un candidato do mesmo partido), pero finalmente non o fixo. O seu primeiro libro, Of Grunge and Government: Let's Fix This Broken Democracy, foi publicado en outubro do 2004. Vive actualmente na illada comunidade de Deep River, no Wahkiakum County, Washington.

Novoselic actualmente ten un programa na radio comunitaria KMUN de Astoria, Oregón. O seu nome de DJ é "DJ K-No".

En novembro do 2006, anunciouse que Novoselic se uniría a Flipper, substituíndo a Bruno DeSmartass no baixo, para unha xira polo Reino Unido e Irlanda. O 22 de setembro do 2008, debido ás súas responsabilidades no fogar, Novoselic anunciou a súa saída da banda.

Curiosidades[editar | editar a fonte]

  • Krist mide 2,01 m de altura.
  • O primeiro instrumento que aprendeu a tocar foi o acordeón.
  • Tocou o saxofón barítono no instituto.
  • Durante a actuación de Nirvana do MTV Unplugged, Krist tocou o acordeón na canción "Jesus Doesn't Want Me for a Sunbeam", mentres Dave Grohl tocaba o baixo.
  • Na versión de Nirvana de "Seasons in the Sun", Krist tocaba a guitarra, Kurt a batería, e Dave o baixo. Pode verse no DVD de With the Lights Out.

Véxase tamén[editar | editar a fonte]

Ligazóns externas[editar | editar a fonte]