Pedro III de Rusia

Na Galipedia, a Wikipedia en galego.
Pedro III de Rusia
Coronation portrait of Peter III of Russia -1761.JPG
Пётр III Фëдорович, Pyotr III Fyodorovitch
Datos persoais
Nacemento 1728
Lugar Kiel
Falecemento 1762
Lugar Ropsha

Pedro III de Rusia (en ruso Пётр III Фëдорович Pyotr III Fyodorovitch) (21 de febreiro de 1728 - 17 de xullo de 1762) Tsar do Imperio Ruso, fillo de Carlos Federico de Holstein-Gottorp e de Ana Petrovna, filla de Pedro o Grande.

Naceu en Kiel en 1728 e accedeu ao trono en 1762 ao falecer a emperatriz Sabela I. Militar formado en Prusia, desprezaba a cultura rusa. Por decisión da súa tía, casou coa princesa Sofía de Anhalt-Zerbst (1745), que se converteu á fe ortodoxa co nome de Catarina e que anos despois foi coñecida como Catarina II.

Deste matrimonio naceron dous fillos, o futuro Paulo I e a gran duquesa Ana Petrovna, que morreu na súa infancia. Especúlase, que os fillos tiveran outros pais biolóxicos, circunstancia que é case segura no caso da nena.

Profundo admirador de Federico II o Grande, entregou a Prusia os territorios conquistados por Rusia durante a Guerra dos Sete Anos e introduciu a militares prusianos no exército ruso, o que lle valeu o rexeitamento da Garda Imperial. Ademais planeaba xunto a Federico, unha guerra contra Dinamarca, para apoderarse do territorio que actualmente é Schleswig-Holsten, rexión de onde el proviña.

Unha conspiración encabezada polo amante da súa dona, que se convertería en Catarina II, obrigouno a abdicar aos seis meses de ser elixido Tsar. Poucos días despois foi asasinado en Ropscha, aínda que o suceso atribuíuse a causas naturais. Foi sepultado con deshonra, pero o seu fillo Paulo exhumou o cadáver e brindoulle cerimonia fúnebre con honores en 1796, tras a morte de Catalina.