Carlos I de Portugal

Carlos I de Portugal
Rei de Portugal
Reinado	19 de outubro de 1889 - 1 de febreiro de 1908
Nacemento	28 de setembro de 1863 Lisboa, Portugal
Falecemento	1 de febreiro de 1908 Lisboa, Portugal
Predecesor	Luís I de Portugal
Sucesor	Manuel II de Portugal
Cónxuxe/s	Amelia de Orleáns
Na rede

Carlos Fernando Luís Maria Victor Miguel Rafael Gabriel Gonzaga Xavier Francisco de Assis José Simão de Saxonia-Coburgo-Gotha e Bragança, coñecido como Carlos I de Portugal, alcumado o Martirizado ou o Mártir, nado en Lisboa o 28 de setembro de 1863 e falecido o 1 de febreiro de 1908, foi o penúltimo rei de Portugal.

Traxectoria

Era fillo do rei Luís Filipe e da princesa María Pía de Savoia, filla de Víctor Manuel II, rei de Italia.

Carlos converteuse en rei o 10 de outubro de 1889. Home intelixente pero propenso á extravagancia, as políticas, despilfarros e amoríos extramaritais de Carlos selaron o destino da monarquía portuguesa. Os tratados coloniais co Reino Unido (un asinado en agosto de 1890, que definiu as súas fronteiras africanas ao longo do Zambeze e o Congo, e outros asinados o 14 de outubro de 1899 que confirmaban os tratados coloniais do século XVII) estabilizaron a situación en África. En política interior, Portugal foi declarada en bancarrota dúas veces -o 14 de xuño de 1892, e novamente o 10 de maio de 1902 - causando disturbios industriais, antagonismo con socialistas e republicanos, e a crítica da prensa á monarquía. Carlos respondeu ao nomear a João Franco como primeiro ministro e subsecuentemente aceptando a disolución do Parlamento.

Retrato de D. Carlos I de Portugal

O 1 de febreiro de 1908, a familia real regresaba do palacio de Vila Viçosa a Lisboa. Viaxaban en coche cara a Almada, e logo tomaron un barco para cruzar o río Texo, e desembarcaron en Cais do Sodré, no centro de Lisboa. No seu camiño cara ao palacio real, a carruaxe con Carlos I e a súa familia pasou por Terreiro do Paço. Namentres cruzaban a praza, foron disparados varios tiros desde a multitude por polo menos dous homes: Alfredo Costa e Manuel Buiça. O rei morreu inmediatamente, o seu herdeiro Luís Filipe foi mortalmente ferido, e o príncipe Manuel foi alcanzado nun brazo. Os asasinos foron mortos a tiros no lugar polos escoltas e posteriormente recoñecidos como membros do Partido Republicano. Aproximadamente vinte minutos despois, o príncipe Luís Filipe morreu, e días máis tarde, Manuel foi proclamado rei de Portugal, o último da dinastía dos Bragança-Saxonia-Coburgo-Gotha (Bragança-Wettin).

Descendencia

Carlos casou coa princesa Amélie de Orleáns en 1886. Ela era filla de Philippe, Conde de Paris e de Marie Isabelle de Orleáns. Os seus fillos foron:

• Luís Filipe de Bragança, príncipe real de Portugal (1887 - 1908).
• María Anna de Bragança, infanta de Portugal (1887 - 1887).
• Manuel II, rei de Portugal entre 1908 e 1910 (1889 - 1932).

Con a nobre Maria Amélia Laredó e Murça:

• María Pía de Saxonia-Coburgo-Gotha e Bragança, infanta de Portugal (1907 - 1995).

Predecesor: Luís I

Rei de Portugal 1889 - 1908

Sucesor: Manuel II