Mojácar

Na Galipedia, a Wikipedia en galego.

Coordenadas: 37°08′00″N 01°51′00″W / 37.13333°N 1.85000°W / 37.13333; -1.85000

Vista de Mojácar Playa dende os muros dunha rúa do núcleo principal do concello.

Mojácar é un concello andaluz, na costa leste da provincia de Almería. Cunha extensión de 72 km² e con 6.092 habitantes, é un concello eminentemente turístico, cun núcleo tradicional no interior e un gran conxunto de instalacións hoteleiras ao longo da praia.

Demografía[editar | editar a fonte]

Mojácar é un concello que está a experimentar un rápido aumento de poboación nos últimos anos. Dos 4.615 habitantes de 1999 pasou aos 6.092 de 2005, o que supón un medre dun 32% en só seis anos. Iso débese fundamentalmente á inmigración, fundamentalmente de cidadáns británicos e, en menor medida, alemáns. De feito, a sinalización municipal preséntase xeralmente en español e inglés.

A densidade de poboación é de 84.6/km².

Xeografía[editar | editar a fonte]

Localización de Mojácar na provincia de Almería.

O territorio do concello de Mojácar é unha estreita franxa costeira (duns 5 kms de largo máximo) situada no leste da provincia de Almería. Báñao ao leste o mar Mediterráneo, e líndano ao norte os concellos de Garrucha e Vera, ao leste o de Turre e ao sur o de Carboneras.

A costa é suave e de praia en toda a súa extensión, o que favoreceu a implantación de numerosas instalacións turísticas ao longo do litoral, ata conformar un novo núcleo de poboación con numerosos hoteis, restaurantes, discotecas e un parador de turismo chamado Mojácar Playa. O núcleo principal sitúase no interior, a algo máis dun quilómetro da costa, e nas abas da Sierra Cabrera, un pequeno conxunto montañoso de ata 960 m de altura. Porén, as alturas de Mojácar non son demasiado altas, e a media sitúase nos 152 m sobre o nivel do mar.

Mojácar ten 3.000 horas de sol ao ano, cunha temperatura media de 20 °C.

Historia[editar | editar a fonte]

Rúa encalada do núcleo principal de Mojácar

Mojácar debeu estar habitado dende a antigüidade. Sospéitase de poboamentos da Idade do Bronce, así como fenicios e cartaxineses, e téñense probas de asentamentos gregos co nome de Murgis-Acra, que sería latinizado en Moxacar (e de aí o español actual Mojácar).

Mojácar, pertencente á provincia árabe de Almería, quedou no século VIII baixo o dominio do califato de Damasco e logo baixo o de Córdoba, co que Mojácar experimentou un forte desenvolvemento. Coa coroación de Mohamed I de Córdoba no reino de Granada Mojácar foi incorporado ao sultanato de Nasrid, e converteuse nunha das prazas fortes na defensa do reino árabe fronte aos ataques dos cristiáns do norte. Estes combates produciron un masacre na poboación civil en 1435 e a derrota e rendición final o 10 de xuño de 1488. O pacto de convivencia entre mouriscos, xudeus e cristiáns produciu un novo desenvolvemento da poboación, que chegou a ter uns 10.000 habitantes no século XVIII.

A seca e a emigración provocaron un retroceso económico e demográfico no século XIX, do que só se recuperou a poboación coa chegada de turistas e residentes europeos na segunda metade do século XX, pero particularmente a partir dos anos oitenta. En Mojácar está a sede da Fundación Valparaíso, un centro para a creación e a difusión de arte, onde se reúnen distintos artistas europeos.

Economía[editar | editar a fonte]

As dúas principais fontes de riqueza de Mojácar son o turismo (hostalaría, restauración, servizos de lecer) e a construción.

Festas[editar | editar a fonte]

Curiosidades[editar | editar a fonte]

  • O Indalo, unha figura antropomórfica atopada nunhas pinturas prehistóricas en Vélez-Blanco, e que agora se coñece como símbolo de toda a provincia almeriense, foi popularizado polos artistas e turistas británicos de Mojácar como símbolo de paz e contra o mal de ollo.
  • Durante un tempo, pensouse que Walt Disney nacera en Mojácar en 1905. Distintas fontes biográficas parecen confirmar que o lugar de nacemento do debuxante foi Chicago en 1901.

Véxase tamén[editar | editar a fonte]

Ligazóns externas[editar | editar a fonte]