Simboloxía comunista

Na Galipedia, a Wikipedia en galego.
Saltar ata a navegación Saltar á procura
Estrela comunista.

O simbolismo comunista abrangue unha gran diversidade de temas, como poden ser a revolución, o proletariado, os campesiños, a agricultura ou a solidariedade internacional. Os estados, partidos e movementos comunistas utilizan estes símbolos para a súa identificación.

É moi común que estes símbolos, xunto co pentagrama (unha estrela de cinco puntas) que representa os cinco continentes habitados ou os cinco compoñentes da sociedade comunista (campesiños, obreiros, exército, intelectuais e mozos), aparezan en amarelo sobre un fondo vermello que representa a revolución socialista.[1] A bandeira da Unión Soviética incorporaba unha estrela vermella bordeada en amarelo xunto coa fouce e o martelo sobre o típico fondo vermello. As bandeiras de Vietnam, China, Corea do Norte, Angola e Mozambique incorporaron símbolos similares baixo os gobernos comunistas.

A fouce e o martelo tornáronse en símbolo do comunismo, e aparecen nas bandeiras da maioría dos partidos comunistas do mundo. Así e todo, a bandeira do Partido dos Traballadores de Corea incorpora un pincel que representa os intelectuais, a maiores do martelo que representa os obreiros industriais e a fouce que representa os traballadores agrícolas.

En Hungría, Lituania, Letonia, Polonia, Ucraína[2] e Indonesia está prohibido o uso de símbolos comunistas en público, e a súa exhibición con fins non educativos considérase unha infracción penal.

A fouce e o martelo[editar | editar a fonte]

Fouce e martelo.
Artigo principal: Fouce e martelo.

O martelo representa a clase obreira industrial e a fouce os traballadores agrícolas. Xuntos, simbolizan a unidade entre estes dous grupos sociais.

O emblema da fouce e o martelo utilizouse por primeira vez durante a revolución rusa de 1917, pero non se converteu no símbolo oficial da RSFS de Rusia até 1924. Dende a devandita revolución, este emblema pasou a ser o símbolo de varios países socialistas e partidos comunistas.

Estrela vermella[editar | editar a fonte]

Estrela vermella.
Artigo principal: Estrela vermella.

A estrela vermella de cinco puntas é un símbolo do comunismo e do socialismo en xeral. Foi un símbolo revolucionario tras a Revolución de Outubro e a subsecuente Guerra Civil. Foi longamente utilizada polos partidos da resistencia antifascista e as organizacións clandestinas de toda Europa antes e durante a segunda guerra mundial. Nesa época usouse sobre todo como símbolo do exército vermello dos obreiros e campesiños da Unión Soviética, que liberou o país das forzas invasoras da Alemaña nazi, axudou o resto da Europa do Leste a derrotar os exércitos fascistas e supuxo un dos maiores puntos de inflexión para a derrota do fascismo en Europa. No que despois se denominou Bloque do Leste, as ditaduras fascistas foron derrocadas polo exército vermello e substituídas por estados socialistas politicamente leais á Unión Soviética. Moitos destes países incorporaron a estrela vermella aos seus símbolos estatais para evidenciar a súa natureza socialista.

Aínda que non existe ningunha alegoría orixinal coñecida da estrela vermella máis aló de ser un símbolo político universal, na Unión Soviética asignóuselle un simbolismo máis preciso como representación do Partido Comunista, e a súa posición na bandeira, sobre a fouce e o martelo, simboliza o partido dirixindo o proletariado soviético na construción do estado comunista. Na actualidade, numerosos partidos socialistas e comunistas de todo o mundo usan a estrela vermella.

Bandeira vermella[editar | editar a fonte]

Bandeira vermella.
Artigo principal: Bandeira Vermella.

A bandeira vermella adóitase combinar con outros símbolos comunistas. Utilízase en concentracións e celebracións de ideoloxía socialista e comunista, como o 1 de maio.

A bandeira vermella tivo diversos significados ao longo da historia. Utilizouse por primeira vez como unha bandeira de desafío. O seu significado político na era moderna provén do seu uso na Comuna de París. Tras a Revolución de Outubro, o goberno soviético adoptou a bandeira vermella coa fouce e o martelo sobreimpresos como insignia nacional.

Bandeira vermella e negra[editar | editar a fonte]

Artigo principal: Símbolos anarquistas.
Bandeira vermella e negra.

A bandeira vermella e negra foi símbolo dos movementos comunistas de índole anarquista. Foi a bandeira que usaron os grupos anarcosindicalistas durante a guerra civil española. O negro representa o anarquismo, e o vermello, os ideais esquerdistas.[3] Ao longo de anos de historia, esta bandeira introduciuse en numerosos movementos estatistas de esquerda como a Fronte Sandinista ou o Movemento 26 de xullo (impulsor da Revolución Cubana), nos que as cores non están divididos en diagonal, senón horizontalmente. Algúns destes movementos adoptaron esta insignia debido ás súas raíces anarquistas.[4]

«A Internacional»[editar | editar a fonte]

Artigo principal: A Internacional.

A Internacional é o himno do movemento socialista. É unha das cancións máis universais do mundo e a súa letra foi traducida practicamente a todas as linguas do mundo. O seu refrán orixinal en francés di: « C'est a lutte finale / Groupons-nous et demain / L'Internationale / Sera le genre humain» (en galego: ‘É a loita final / Agrupémonos todos e mañá / A Internacional / Será o xénero humano’). Con frecuencia cántase co puño no alto.

Esta música foi utilizada por comunistas de todo o mundo dende que foi composta no século XIX e adoptada como himno oficial da Segunda Internacional. No 1918 converteuse no himno da Rusia soviética e da Unión Soviética en 1922, aínda que foi substituída en 1944 polo himno da Unión Soviética, que incide máis no patriotismo. Tamén se cantou como desafío ante gobernos socialistas autoproclamados, como sucedeu en 1989 na República Democrática Alemá, antes da reunificación ou na China ese mesmo ano, durante protestas da praza de Tiananmén.

Arado ou arado estrelado[editar | editar a fonte]

Starry Plough flag (1914).svg

Aínda que non é un símbolo exclusivamente comunista, é o emblema do socialismo irlandés, e probablemente ten as mesmas raíces que o martelo e o arado orixinal que foi substituído pola fouce e o martelo. A insignia simbolizaba a vontade de que unha República Obreira de Irlanda libre controlase o seu propio destino dende o arado até as estrelas, e a espada unida ao arado significaba a redundancia da guerra tras o establecemento dunha Internacional Socialista. A bandeira representa o Carro, parte da constelación da Osa Maior, que se coñece como «o arado» en Irlanda e Gran Bretaña. O arado é un dos entes máis visibles do ceo irlandés durante todo o ano.

Este emblema, presentado no 1914, foi utilizado pola Milicia de Obreiros Socialistas, o Exército Cidadán Irlandés, durante o Alzamento de Pascua de 1916.

Unknown Chinese Communist Flag (1920s?).png

Na China, a bandeira do arado (犁头旗 en chinés simplificado), unha bandeira vermella cun arado amarelo, foi moi empregada durante o período da Primeira Guerra Civil Revolucionaria como insignia das asociacións chinesas de campesiños, organizacións lideradas polo Partido Comunista da China.[5][6]

Crese que o primeiro usuario foi o activista Peng Pai en 1923, na asociación de campesiños do sóviet de Hailufeng.[7] A bandeira do arado ten numerosas versións distintas, algunhas combinadas coa bandeira do ceo azul, o sol branco ou o campo vermello, e outras con arados de distintas formas.[8][9][10]

Heráldica socialista[editar | editar a fonte]

Artigo principal: Heráldica socialista.
Os líderes soviéticos procuraban distinguir as súas insignias dos emblemas utilizados polo emperador e a aristocracia rusa. Así, substituíron e omitieron os elementos heráldicos tradicionais, cambiando os emblemas que non satisfacían as prácticas europeas tradicionais.

Moitos gobernos comunistas distanciáronse á mantenta das formas tradicionais da heráldica europea co fin de marcar diferenzas coas monarquías que a maioría substituíron, e que adoitaban ter escudos de armas como símbolos. No seu lugar, seguiron o patrón dos emblemas nacionais adoptados entre as décadas de 1910 e 1920 na Rusia Soviética e a Unión Soviética.

A denominación de heráldica socialista ou heráldica comunista é un nome coloquial para os deseños habituais dos emblemas nacionais adoptados polos estados comunistas. Aínda que se adoitan chamar escudos, moitos destes elementos non o son no sentido estrito da heráldica, pero os patróns recoñecibles conduciron ao uso dese termo oficioso.

Outros símbolos comunistas[editar | editar a fonte]

Os elementos gráficos seguintes, aínda que non necesariamente comunistas, utilizáronse con frecuencia en bandeiras, selos e propaganda dos movementos e países comunistas.

Dous importantes exemplos de estados comunistas que non utilizan imaxinaría comunista nas súas bandeiras, emblemas ou outras representacións gráficas son Cuba e a antiga República Popular de Polonia.

Galería[editar | editar a fonte]

A fouce e o martelo en bandeiras e logotipos[editar | editar a fonte]

Estrela vermella en bandeiras[editar | editar a fonte]

Bandeira vermella e negra[editar | editar a fonte]

Outros símbolos[editar | editar a fonte]

Un tableau vivant nunha concentración comunista en Kerala (India), con dous agricultores formando a fouce e o martelo.

Notas[editar | editar a fonte]

  1. "El nacimiento de la URSS (1922). Himno y bandera". 29 de marzo de 2016. Consultado o 11 de novembro de 2017. 
  2. Rodríguez Rodríguez, Jorge (11 de xaneiro de 2014). "La prohibición de la simbología comunista y nazi en Europa". Arquivado dende o orixinal o 01 de decembro de 2017. Consultado o 11 de novembro de 2017. 
  3. "An Anarchist FAQ: The Symbols of Anarchy; infoshop.org.". Arquivado dende o orixinal o 1 de setembro de 2015. Consultado o 21 de novembro de 2017. 
  4. "El socialismo libertario de". Centro Para la Promoción, la Investigación y el Desarrollo Rural y Social. Arquivado dende o orixinal o 28 de setembro de 2007. Consultado o 15 de novembro de 2009. 
  5. "002这是好的很 毛泽东发表《湖南农民运动考察报告》发表四十四周年_shkjyh_新浪博客". blog.sina.com.cn. Consultado o 2021-08-19. 
  6. "Copia arquivada". Arquivado dende o orixinal o 26 de setembro de 2017. Consultado o 19 de agosto de 2021. 
  7. "彭湃与陆丰农民运动 – 陆丰宣传文化网". www.lfxcw.gov.cn. Consultado o 2021-08-19. 
  8. "Copia archivada". Arquivado dende o orixinal o 25 de outubro de 2016. Consultado o 21 de novembro de 2017. 
  9. [1]
  10. "【网络媒体走转改】湖北红安这条古街记录过革命时期的壮怀激烈,更见证了新中国的巨大变迁 - 中国日报网". cn.chinadaily.com.cn. Consultado o 2021-08-19. 

Véxase tamén[editar | editar a fonte]

Símbolos nacionais[editar | editar a fonte]