Bandeira de Myanmar

Bandeira de Myanmar
Características
Uso	...
Proporción	2:3
Adopción	21 de outubro de 2010
Cores	Amarelo     Branco     Verde     Vermello

A bandeira de Myanmar ou Birmania (en birmano: မြန်မာ နိုင်ငံတော်အလံ), foi adoptada o 21 de outubro de 2010 para substituír a antiga bandeira socialista en uso dende 1974. A nova bandeira foi introducida xunto coa implantación de cambios no nome do país, os cales foron establecidos na Constitución de 2008.

O deseño da bandeira ten tres franxas horizontais de cor amarela, verde e vermella, cunha estrela branca de cinco puntas no centro. As tres cores queren simbolizar a solidariedade, a paz, a tranquilidade, a coraxe e a decisión.

Historia

A bandeira ten a súa orixe na resistencia birmana á ocupación xaponesa da segunda guerra mundial. A bandeira orixinal mantívose de xeito oficial entre 1948 e 1974, cando, con motivo da proclamación da República Socialista en Birmania por Ne Win, foi adoptada unha nova o 3 de xaneiro de 1974. Dita bandeira non era totalmente diferente da anterior bandeira birmana: tiña campo vermello e un cantón azul na esquina superior sobre o lado do mastro. Con todo, as imaxes que había dentro do cantón si foron cambiadas a unha roda de dente cunha planta de arroz sobreposta sobre ela. Estes símbolos son socialistas e representan os obreiros e agricultores. Rodéanlle catorce estrelas de cinco puntas que representan as divisións administrativas e os estados de Myanmar. A cor branca representa a pureza, o azul a paz e a integridade, e o vermello a coraxe. Era moi semellante á bandeira da República da China (Taiwán).

Bandeira proposta en 2006.

O 10 de novembro de 2006, propúxose unha nova bandeira para a nación. Esta consistía en tres franxas horizontais iguais en verde, amarelo e vermello, cunha estrela branca na parte da hasta da franxa verde. O verde representaba a paz, a tranquilidade e a suntuosa e verde contorna do país; o amarelo representaba a solidariedade; mentres que o vermello representaba o valor e a decisión. A estrela representaba "a perpetua existencia da consolidada Unión". Finalmente, os delegados da Convención Nacional rexeitaron a adopción desta bandeira. En setembro de 2007 propúxose unha nova bandeira, cunha estrela branca de maior tamaño e coa orde das franxas alterado. A orde elixida era o mesmo que o da bandeira do Estado de Birmania, un Estado monicreque do Imperio do Xapón durante a segunda guerra mundial e que perdurou entre 1943 e 1945. Aquela bandeira presentaba un pavo real no centro. A nova versión da bandeira incluíuse na nova constitución, aprobada en referendo en 2008. A nova constitución, e con ela a nova bandeira, entraron en vigor coa primeira reunión do parlamento elixido nas eleccións xerais de 2010.

Bandeiras históricas

• 
  Terceiro Imperio Birmano
  (1752-1885)
• 
  Birmania Británica
  (1824-1939)
• 
  Birmania Británica
  (1939-1943)
• 
  Estado de Birmania
  (1943-1945)

• 
  Estado de Birmania
  (1945)
• 
  Birmania Británica
  (1945-1948)
• 
  Unión de Birmania
  (1948-1974)
• 
  R. Socialista de Birmania
  despois Myanmar
  (1943-1945)
• 
  Bandeira actual
  (dende 2010)

Véxase tamén

Ligazóns externas

• Myanmar en Flags of the World (en inglés)