Wilhelm Kubitschek

Wilhelm Kubitschek

Lápida na tumba de Wilhelm Kubitschek no cemiterio central de Viena
Biografía
Nacemento	28 de xuño de 1858 Bratislava
Morte	2 de outubro de 1936 Viena Austria
Lugar de sepultura	Cemiterio central de Viena
Datos persoais
País de nacionalidade	Austríaca
Educación	Universidade de Viena
Actividade
Campo de traballo	Historia antiga, numismática e epigrafía.
Ocupación	historiador da arte , profesor universitario , arqueólogo , numismático
Empregador	Universidade de Viena Universidade de Graz
Membro de	Academia Austríaca de Ciencias Instituto Arqueolóxico Alemán
Influencias	Theodor Mommsen.
Lingua	Lingua alemá
Premios
- (1923): Medalla da RNS. - (1933): Medalla Huntington.

Wilhelm Kubitschek, nado o 28 de xuño de 1858 en Bratislava e finado o 2 de outubro de 1936 en Viena, foi un historiador clásico, epigrafista e numismático austríaco.

Traxectoria

Logo de concluír a súa educación secundaria no Akademisches Gymnasium de Viena, entre 1875 e 1879 estudou Historia Antiga, Epigrafía e Arqueoloxía na Nuniversidade de Viena, onde contou con profesores como Otto Hirschfeld e Otto Benndorf. Posteriormente, ampliou a súa formación pasando unha estadía dun semestre na Universidade Humboldt de Berlín, como alumno de Theodor Mommsen, e obtivo o seu doutoramento en 1881.

Entre 1881 e 1886 impartiu clases en institutos de secundaria de Hollabrunn, na Baixa Austria, e de Viena, e en 1887 acadou a habilitación como profesor universitario de Historia Antiga.

En 1896 obtivo unha praza como profesor asociado da Universidade de Graz e o ano seguinte regresou a Viena como conservador do Gabinete Numismático (Münzkabinett) do Museo de Historia da Arte (Kunsthistorisches Museum), posto que compaxinou coa docencia de Arqueoloxía Romana, Epigrafía e Numismática na Universidade de Viena. En 1916 converteuse no sucesor de Eugen Bormann como profesor titular de Arqueoloxía e Epigrafía Romanas.

En 1903 foi nomeado conservador da Comisión Central para o Estudo e a Conservación da Arte e os Monumentos Históricos (Zentralkommission für Erforschung und Erhaltung der Kunst- und historischen Denkmale), e o ano seguinte conservador xeral dos monumentos antigos de Austria.

Entre 1907 e 1913 foi o editor da publicación periódica Jahrbuch für Altertumskunde. Unha importante cantidade dos seus artigos foi publicada en Realencyclopädie der classischen Altertumswissenschaft.

Recoñecementos

• (1923): Medalla da Royal Numismatic Society, de Londres.
• (1933): Medalla Huntington, da American Numismatic Society, de Nova York.

Publicacións

Estes son algúns dos traballos monográficos máis representativos da traxectoria académica de Wilhelm Kubitschek.

• (1882). De Romanarum tribuum origine ac propagatione. Gerold, Viena.
• (1889). Imperium Romanum tributim discriptum. Tempsky, Praga
• (1896). Rundschau über ein Quinquennium der antiken Numismatik (1890-1894). Hölder, Viena.
• (1915). Die kalenderbücher von Florenz, Rom und Leyden. Hölder, Viena.
• (1916). Zur Geschichte von Städten des römischen Kaiserreiches, epigraphisch-numismatische Studien. Hölder, Viena.
• (1923). Führer durch Carnuntum. Österreichisches Archäologisches Institut, Viena.
• (1928). Grundriss der antiken Zeitrechnung. Beck, Múnic.
• (1929). Ältere Berichte über den römischen Limes in Pannonien / 1. Hölder-Pichler-Tempsky, Viena.
• (1932). Zur abfolge der prägungen der kaiser Marcus und Verus. Hölder-Pichler-Tempsky, Viena.
• (1934). Studien zur Geographie des Ptolemäus. Hölder-Pichler-Tempsky, Viena.

Véxase tamén

Bibliografía

• Betz. A. (1969). "Kubitschek, Wilhelm (1858-1936), Althistoriker, Epigraphiker und Numismatiker". En Österreichisches Biographisches Lexikon. Viena. Páxina 314.
• Winkler, G. (1982). "Kubitschek, Wilhelm". En Neue Deutsche Biographie (NDB). Volume 13. Duncker & Humblot, Berín. Páxina 160. ISBN 3-428-00194-X