Pasa

Na Galipedia, a Wikipedia en galego.
Pasas xa preparadas.

Unha pasa ou uva pasa[1] é unha uva secada ao sol ou por métodos artificiais, parcialmente deshidratada[2]. Soen comerse en cru, cociñadas ou coma condimento noutros pratos gastronómicos. Son moi doces pola alta concentración de azucres e se se almacenan durante bastante tempo o azucre cristaliza dentro da froita.

As pasas forman parte da gastronomíadas zonas vitivinícolas de Galiza.

Etimoloxía[editar | editar a fonte]

O termo galego "pasa" (en portugués passa, en catalán pansa) vén do latín uva passa, derivado de pandĕre deitar, extender; neste caso deitar ao sol[3].

Produción[editar | editar a fonte]

As pasas son bagos de uva de tamaño medio e de cor dourada, con ou sen carabuñas, que se delouran (secar coa luz do sol). Unha excepción é a variedade da uva cultivada especialmente en Corinto (Grecia) que dá un tipo máis escuro e miúdo que dá orixe a outras pasas sen carabuñas, as pasas corintias.

A pansificación é a técnica para secar a uva e outros froitos, e é coñecida dende a Antigüidade. A humidade, e tamén a choiva, constitúen o principal risco para a elaboración da pasa. Son un perigo constante que ameaza de estragar toda a produción e que o labrego sempre soubo valorar: unha campaña chuviosa ou excesivamente húmida ha minguar a produción polo efecto da podremia, mentres que un bo tempo ha permitir asollar a froita. O bago cómpre de sol e ar para poder se transformar en pasa, e a auga é un elemento daniño neste proceso.

As pasas en Galiza[editar | editar a fonte]

É crenza popular en Galiza, especialmente nas comarcas vitícolas, que as pasas avivan a memoria do que as come; e en sentido irónico atribúeselles comunmente esta propiedade aos rabos; e así soe dicirse ao desmemoriado: Tés que comer rabos de pasas[4].

Valor nutricional[editar | editar a fonte]

Uvas en proceso de deshidratación.

Nunha porción de 1/4 de cunca de pasas de California (uns 40 gramos), hai xeralmente bastante azucre (28-32 gramos), que xeran unhas aproximadamente 110-140 calorías. Tamén, soen ter uns gramos de fibra, tamén cantidades moi pequenas de proteínas (a miúdo 1 gramo), de sodio (xeralmente arredor 10 miligramos), de calcio, e de ferro. As pasas son altas en potasio, con 310 miligramos (preto de 9% do valor diario).

Pasas e carie[editar | editar a fonte]

Os dentistas soen recomendar non comer pasas pola forte combinación de azucres e que a súa propia viscosidade fomenta a aparición de caries e outras doenzas bucais. Porén, diversos estudos científicos poñen en dúbida que a viscosidade realmente prexudique de xeito decisivo, ademais de que se teñen atopado algúns compostos químicos que poden axudar a combater algunhas bacterias orais. Nun laboratorio, os extractos das pasas consiguiron retardar o desenvolvemento do estreptococo, unha das principais bacterias que orixinan a carie. Cinco produtos químicos nas pasas - ácido oleanólico, aldehído oleanólico, betulín, ácido betulínico, e 5-(hydroximetil)-2-furfural - semellan ser responsábeis de retardar estas bacterias. Ademais, o ácido oleanólico evita que algunhas bacterias se instalen no esmalte do dente.

Notas[editar | editar a fonte]

  1. Nome dado ao alimento n'"Os cultivos agrícolas" en Vocabulario do medio agrícola, Santiago de Compostela, Dirección Xeral de Política Lingüística, 1988
  2. Definición en Portal das Palabras da RAG - http://portaldaspalabras.org/buscador?palabra=paso&sinom=0&homonimo=2
  3. A partir do Dicionario da Real Academia Española, http://lema.rae.es/drae/?val=pasa
  4. Eladio Rodríguez González (1958-1961): Diccionario enciclopédico gallego-castellano, Galaxia, Vigo

Véxase tamén[editar | editar a fonte]

Outros artigos[editar | editar a fonte]

Ligazóns externas[editar | editar a fonte]

Commons
Commons ten máis contidos multimedia sobre: Pasa