Microstomus kitt

Microstomus kitt é un peixe teleósteo da orde dos pleuronectiformes, familia dos pleuronéctidos e subfamilia dos pleuronectinos, unha das catro que integran o xénero Microstomus, e que é coñecida en galego como mendo, e tamén como mendo limón.

Trátase como todos os peixes da familia dos pleuronéctidos ten o corpo aplanado, asimétrico, e cos dous ollos situados no lado pigmentado do corpo. dun peixe mariño, demersal, oceanódromo, de grande importancia económica, que pode alcanzar até os 65 cm de lonxitude e os 3 kg de peso, que habita en augas pouco profundas dos mares do noroeste de Europa, en fondos pedregosos de até profundidades duns 200 m, e que se distribúe desde o mar Cantábrico e o golfo de Biscaia, polo sur, até os mares de Barents e Branco, polo norte, incluíndo tamén as costas de Islandia.

Taxonomía

A especie foi descrita en 1792 polo médico, naturalista e taxónomo alemán Johann Julius Walbaum, que lle adxudicou o nome de Pleuronectes kitt.

Sinónimos

Ademais de polo nome orixinario e polo actualmente válido, a especie coñeceuse tamén polos sinónimos:

• Microstomus latidens Gottsche, 1835
• Platessa pola Cuvier, 1829
• Pleuronectes gilli Steindachner, 1868
• Pleuronectes laevis Shaw, 1803
• Pleuronectes microcephalus Donovan, 1803

Nota sobre os nomes vulgares galegos

A bibliografía galega dispoñíbel pode dar lugar a confusións os nomes desta especie e de Glyptocephalus cynoglossus.
Como vimos, Rodríguez Solórzano el at. denominan a Microstomus kitt como mendo, e Lahuerta e Vázquez, como mendo limón.
Porén, estes últimos autores dan o sinónimo mendo a Glyptocephalus cynoglossus, mentres que ámbalas autoridades designan a esta especie como coreano,
Por outra parte cómpre dicir que no Gran dicionario Xerais da lingua, na súa edición de 2009, define MENDO² como "peixe pleuronectiforme (Glyptocephalus cynoglossus) de corpo longo, con pintas circulares máis pardas có resto da pel polo lombo e a aleta pectoral negra"; e o Diccionario Cumio da lingia galega, de 1999, tamén define mendo, na súa 2ª acepción, como "peixe mariño malacopterixio (Glyptocephalus cynoglossus) de forma plana semellante ao linguado", definición que se repite no Gran dicionario Cumio da lingua galega, de 2004, e máis no Gran dicionario século 21 da lingua galega, de 2006, coediteado este último con Galaxia.
Ningún dos dicionarios destas editoriais define coreano co significado de peixe.

Características

As principais características de Microstomus kitt son as seguintes:

• Corpo ovalado, bastante máis ancho que o doutros peixes planos, de até 65 cm e 3 kg de peso (aínda que os espécimes capturados raramente superan os 40 cm).
• Cabeza pequena, coa boca así mesmo pequena.
• Pel e tacto áspero. A coloración do lado pigmentado ou superior é acastañada, con manchas máis escuras, e a do lado cego é abrancazada.
• Liña lateral case recta, con tan só unha lixeira curva por riba da aleta pectoral.

Bioloxía

Hábitat e distribución

Hábitat

É un peixe mariño, demersal, oceanódromo, que vive en augas pouco profundas dos mares do noroeste de Europa, sobre todo en fondos pedregosos a profundidades de entre os 10 e os 200 m (usualmente, de 10 a 150 m).

Distribución

Encóntrase entre os 72° N e os 43° N, e entre os 26° W e os 45° E, desde o mar Cantábrico e o golfo de Biscaia, polo sur, até os mares de Barents e Branco, polo norte, incluíndo tamén as costas de Islandia.

Nota: Ver mapa de distribución en AquaMaps for Microstomus kitt (Native range) Arquivado 07 de marzo de 2016 en Wayback Machine., na EOL.

Nutrición

Aliméntase de pequenos organismos bentónicos: crustáceos, vermes poliquetos, ofiúras e moluscos (quitóns e bivalvos), dos que semella que os poliquetos constitúen a base da súa dieta. Segundo parece, non se alimentan en inverno.

Reprodución

Microstomus kitt alcanza a madurez sexual (os machos primeiro) cando mide entre os 23 e os 30 cm, cando ten de 3 a 6 anos de idade. A desova prodúcese en zonas abrigadas, a profundidades de entre 50 e 150 m na maior parte da súa área de distribución. Os ovos son peláxicos, e miden de 1 a 1,5 mm de diámetro. Cando eclosionan dan lugar a larvas, así mesmo peláxiicas, de 4,5 a 5,5 mm de lonxitude. As larvas permanecen en mar aberto até que sofren a metamorfose que as transforma en peixes planos cando alcanzan entre 15 e 20 mm de lonxitude. Daquela, baixan cara ao fondo en augas relativamente profundas.

Pesca e usos

Pesca

Microstomus kitt péscase principalmente en inverno, mediante artes de arrastre, sendo unha valiosa captura adicional neste tipo de pesca.

As capturas desta especie rondaban, nos anos 1990, as 10.000 t. En 2007 a cota total de captura da Unión Europea (TAC) para Microstomus kitt e Glyptocephalus cynoglossus foi de 6.175 t, das cales foron apañadas 3.716 t, na súa maioría por pescadores do Reino Unido. No ano 2008 a TAC foi de 6.793 t e, en 2009, de 6.793 t.

Usos

Comercialízase en fresco ou conservado en xeo.

Véxase tamén

Bibliografía

• Barratt & Irwin (2008): United Kingdom Sea Fishing Statistics 2007, Londres: Marine and Fisheries Agency, 49. ISBN 0-85521-181-3.
• Cooper, J. A. & F. Chapleau (1998): "Monophyly and intrarelationships of the family Pleuronectidae (Pleuronectiformes), with a revised classification". Fish. Bull. 96 (4): 686-726.
• Muus, Bent J.; Jørgen G. Nielsen; Preben Dahlstrøm e Bente O. Nyström (1998): Peces de mar del Atlántico y del Mediterráneo. Barcelona: Ediciones Omega. ISBN 84-282-1161-2.
• Nelson, Joseph S. (2006): Fishes of the World. Nova York: John Wiley & Sons, Inc. ISBN 0-471-25031-7.

Outros artigos

• Pleuronectiformes
• Pleuronéctidos
• Pleuronectinos
• Microstomus

Ligazóns externas

• Microstomus kitt Arquivado 07 de marzo de 2016 en Wayback Machine. na EOL. Abundante información, imaxes, mapas de distibución e referencias (en inglés)
• Microstomus kitt na ADW.