Couso, A Estrada

Para outras páxinas con títulos homónimos véxase: Couso.

Couso
Igrexa de Santa María de Couso.
Concello	A Estrada
Provincia	Pontevedra
Coordenadas	42°45′17″N 8°33′17″O
Área	1,8 km²
Poboación	228 hab. (2011)
Densidade	126,67 hab./km²
Entidades de poboación	7
[ editar datos en Wikidata ]

Santa María de Couso é unha parroquia que se localiza no concello da Estrada. Segundo o IGE en 2011 tiña 228 habitantes (121 mulleres e 107 homes), distribuídos en 7 entidades de poboación, o que supón unha diminución respecto de 1986 cando tiña 254 habitantes. En 1842 tiña unha poboación de feito de 196 persoas.

Xeografía

Esténdese ao norte do concello da Estrada, a carón da estrada C-541 e remata na Ponte Vea, camiño da cidade de Santiago de Compostela. Forma parte do Camiño Real que chegaba pola beira esquerda do río Ulla dende Pontecesures por Bumio, e da ruta francesa do camiño de Santiago, que dende as terras de Cuntis se dirixía a Santiago de Compostela. Ten 1,8 km².

Patrimonio

A ponte románica de Pontevea sobre o río Ulla (antigo paso da estrada C-541), de seis arcos, está representada no escudo do concello da Estrada. Une A Estrada e o val de Vea con Santiago de Compostela. Ao seu lado construíuse unha nova ponte para dar facilidade ao tráfico até a vila, xa que a antiga só mide 2,5 m de ancho.

A Igrexa parroquial ten unha mestura de estilos arquitectónicos. Na parroquia hai dous cruceiros con figura, un en Sequeiró e outro en Maíndo.

A Casa forte de Maíndo (século XVI), foi residencia do Conde de Ximonde, Pedro de Cisneros. O Condado de Ximonde foi dono dunhas importantes pesqueiras de salmón. Atópase moi ben conservada, e na actualidade é propiedade da familia Lissarrague.

O couto salmoneiro de Couso, máis coñecido como Xirimbao, pertence ao río Ulla. Conta cunha pasarela peonil de arame (recentemente restaurada) que une os concellos de A Estrada e Teo e dende a que se pode observar todo o couto e unha gran parte da aldea de Maíndo.

Lendas e tradicións

Cóntase que nesta parroquia naceu en 1835 Pepa a Loba, figura lendaria do bandoleirismo galego do século XIX.

Os entroidos dos Xenerais do Ulla están documentados dende 1780, coa mascarada da parroquia de Oca, dos que falaba o escritor Alfredo Vicenti. Seguiu esa tradición a través dos tempos, agás no período da guerra civil española. Durante a segunda metade do século XX celebrouse un entroido conxunto de varias das parroquias do Val de Vea (Couso, Santa Cristina de Vea e San Xurxo de Vea), celebrándose na actualidade por separado.

En Couso celébrase anualmente, normalmente o 14 de agosto, desde 1995, a festa de música folk As nosas músicas. Tamén se celebra a festa do escalo o primeiro domingo de agosto. Na mesma organízase un concurso de pesca do mencionado peixe, así como a posterior degustación do mesmo e doutros produtos típicos da zona.

Galería de imaxes

• 
  Pontevea.
• 
  Pombal.

Lugares e parroquias

Lugares de Couso

Lugares da parroquia de Couso no concello da Estrada (Pontevedra)
Barco | O Castro | Couso | Fontenlo | Maíndo | Sequeiró | A Veiga

Véxase tamén

Bibliografía

• Cabeza Quiles, Fernando (2019). Toponimia da Estrada (PDF). RAG - Asociación Galega de Onomástica. ISBN 978-84-947823-6-7. Arquivado dende o orixinal (PDF) o 12 de abril de 2019. Consultado o 14 de abril de 2019. 

Outros artigos

• Lugares da Estrada