Leif Segerstam

Na Galipedia, a Wikipedia en galego.
Leif Segerstam
Leif Segerstam.jpg
Leif Segerstam en 2011.
Nome completo Leif Selim Segerstam
Naceu 2 de marzo de 1944 (70 anos)
Orixe Vaasa, Finlandia Finlandia
Ocupación (s) Compositor e director
Relacionado con Turun Filharmoninen Orkesteri

Leif Selim Segerstam, nado o 2 de marzo de 1944 en Vaasa, é un compositor e director de orquestra finlandés. Dende xaneiro de 2012 e o director titular da Turun Filharmoninen Orkesteri,[1] posto que compaxina co de profesor de dirección na Sibelius-Akatemia de Helsinki.

Traxectoria[editar | editar a fonte]

Segerstam estudou violín, piano e dirección orquestral na Sibelius-Akatemia de Helsinki e dirección na Juilliard School de Nova York con Jean Morel entre 1963 e 1965.

Deuse a coñecer como director operístico a finais dos anos '60 (Helsinki, Estocolmo e Berlín Oeste). Ten dirixido na Metropolitan Opera, no Covent Garden, no Teatro alla Scala, no Treatro Colón, na Wiener Staatsoper e no Festival de Salzburgo. Acompañou a personaxes como Montserrat Caballé, Birgit Nilsson, Henryk Szeryng, David Oïstrakh, Emil Gilels e Arthur Rubinstein. A partir de 1975 comezou a destacar como director sinfónico, sendo director principal da Radio-Symphonieorchester Wien dende ese ano ata 1982, a Radion sinfoniaorkesteri entre 1977 e 1987, ou da Helsingin kaupunginorkesteri entre 1995 e 2007, orquestra da que lle foi concedido o título de Direcotr Emérito. Ten sido o director musical de diversas orquestras, entre as cales figuran a Deutsche Staatsphilharmonie Rheinland-Pfalz (1983-1990) ou a DR SymfoniOrkestret (1988-1995), sendo nomeado director honorífico das dúas formacións. Foi tamén director principal e musical da Kungliga Operan (Estocolmo) entre 1995 e 2000. Ten sido invitado a dirixir numerosas orquestras en todo o mundo, entre as que destacan Chicago Symphony Orchestra, Los Angeles Philharmonic, London Symphony Orchestra, Toronto Symphony ou a Orquestra Sinfônica do Estado de São Paulo.

É frecuentemente invitado a dirixir os festivais de Helsinki e Savonlinna. A súa gravación de Luonnotar e outras cancións orquestrais de Sibelius xunto a Soile Isokoski, foi nomeada disco do ano en 2007 polo "BBC music magazine".

Segerstam compaxina o seu traballo como director co de profesor de dirección na Sibelius-Akatemia de Helsinki. Entre os seus alumnos salientan Susanna Mälkki, Mikk Murdvee, Sasha Mäkilä e Markku Laakso.

Vida persoal[editar | editar a fonte]

O pai de Leif Segerstam era o defunto Selim Segerstam, que elaborou numerosos cancioneiros.

Estivo casado coa violinista Hannele Segerstam (concertino da Radion sinfoniaorkesteri), coa que tivo dous fillos, Jan e Pia; Pia é concertista de violonchelo.

Logo do divorcio de Leif Segerstam e Hannele Segerstam, casou coa arpista da Helsingin kaupunginorkesteri Minnaleena Segerstam, coa que tivo tres fillos.

Obra[editar | editar a fonte]

Segerstam é un compositor extremádamente prolífico, sendo especialmente coñecido polas súas numerosas sinfonías (261 en 2012[2]), das cales en torno a un centenar teñen sido interpretadas.

É igualmente coñecido polas súas series de "Orchestral Diary Sheets", moitas delas concibidas para ser interpretadas sen director. Segerstam desenvolveu un enfoque persoal da composición aleatoria a través dun estilo que denominou "pulsación libre", na que os motivos musicais interactúan con flexibilidade no tempo.

  • 261 sinfonías (en 2012)
  • 30 cuartetos de corda
  • 13 concertos para violín
  • 8 concertos para violonchelo
  • 4 concertos para viola
  • 4 concertos para piano

Premios[editar | editar a fonte]

Gravacións[editar | editar a fonte]

Leif Segerstam é tamén ámplamente coñecido polas súas gravacións discográficas, que inclúen as integrais das sinfonías de Jean Sibelius, Carl Nielsen e Gustav Mahler, así como moitas outras obras de compositores contemporáneos coma o compositor finlandés Einojuhani Rautavaara e os compositores americanos John Corigliano e Christopher Rouse.

Notas[editar | editar a fonte]

  1. Introducing the Turku Philharmonic Orchestra
  2. Fimic - Suomalaisen musiikin tiedotuskeskus [1]

Véxase tamén[editar | editar a fonte]

Ligazóns externas[editar | editar a fonte]