Elasmobranquios

Un tiburón (Carcharhinus melanopterus)

Os elasmobranquios (Elasmobranchii) conforman unha subclase dentro dos peixes cartilaxinosos ou condrictios (clase Chondrichthyes). Comprende, por un lado, a superorde Selacimorfos (os tiburóns) e a superorde Batoideos (as raias).

Descrición

Presentan un esqueleto formado por cartilaxe. A pel está recuberta de escamas placoides (dentículos dérmicos) que lle dan un tacto moi áspero (utilizouse como papel de lixa) ou pode estar núa.

Posúen de 5 a 7 arcos branquiais con cadansúa abertura a cada lado do corpo; as branquias non están protexidas por opérculo. Os dentes son numerosos e dispostos en fieiras. Carecen tamén de vexiga natatoria.

Normalmente, os machos presentan uns órganos copuladores derivados das aletas pélvicas.

Clasificación

Colas heterocercas dos tiburóns

Comprende dúas superordes que se distinguen pola súa forma básica, ben diferente entre si:

• Superorde Batoideos (Batoidea ou Rajimorphii): de corpo basicamente aplanado e coas aberturas branquiais na cara ventral do corpo (hipotremos).
  • Orde Rajiformes (raias verdadeiras)
  • Orde Myliobatiformes (raias, ouxa, chucho)
  • Orde Pristiformes (peixes serra)
  • Orde Torpediformes (estrugas)
• Superorde Selacimorfos (Selachimorpha): de corpo xeralmente fusiforme e coas aberturas branquiais nos lados do corpo (pleurotremos).
  • Orde Hexanchiformes (tiburóns primitivos)
  • Orde Squaliformes (melga)
  • Orde Pristiophoriformes (tiburóns serra)
  • Orde Squantina (peixe anxo)
  • Orde Heterodontiformes (tiburón cornudo)
  • Orde Orectolobiformes (tiburón balea)
  • Orde Carcharhiniformes (tiburóns)