Corvus

Para outras páxinas con títulos homónimos véxase: Corvo (homónimos).

Corvus
Nome Latino	Corvus
Abreviatura	Crv
Xenitivo	Corvi
Simboloxía	O Corvo
Ascensión Recta	12 h
Declinación	−20°
Área	184 graos cadrados Rango 70º
Número de estrelas (magnitude < 3)	2
Estrela máis brillante	γ Crv (Gienah) (magnitude ap. 2.59)
Choiva de meteoros	Corvidas (26 de xuño)
Constelacións lindeiras	Virgo Crater Hydra
Visible en latitudes entre +60° e −90° Mellor visibilidade ás 21:00 (9 p.m.) durante o mes de Maio

Corvus ou Corvo (o Corvo en latín) é unha constelación austral menor, con só 11 estrelas visibles ó ollo humano, situada entre Virgo e Crater, e por riba de Hidra. Para formar o nome das súas estrelas úsase o xentitivo, Corvi. Exemplo: γ Corvi é a estrela gamma do Corvo.

As súas estrelas γ Corvi (Gienah Gurab, en árabe) e δ Corvi (Algorab), serven de indicadoras para atopar a Espiga (Spica ou α Virginis). Mentres que δ, γ, ε, e β forman o asterismo da vela (por recordar unha vela cadrada (en realidade trapezoidal) antiga.

Observación das súas estrelas

Localización da constelación

Aínda que a constelación é pequena, é bastante visible, e a súa forma é moi característica, que recorda unha antiga vela cadrada. Pódese reparar facilmente nela, ao sur de α Virginis (ou Spica, a Espiga).

Estrelas principais

• α Corvi (Alchiba), con magnitude 4,02 é só a quinta máis brillante da constelación.
• β Corvi (Kraz), a segunda máis brillante con magnitude 2,65, unha estrela xigante amarela.
• γ Corvi (Gienah Gurab), a máis brillante con magnitude 2,58, unha estrela branco-azulada. Pertence ó grupo das estrelas de mercurio-manganeso e atopase a 165 anos luz.
• δ Corvi (Algorab), de magnitude 2,94 é unha estrela dobre fácil de observar. A compoñente máis feble é unha estrela moi nova, con só 110 millóns de anos de idade.
• ε Corvi (Minkar), estrela xigante laranxa de magnitude 3,02.
• ζ Corvi, estrela Be de magnitude 5,20; forma unha binaria óptica con outra estrela situada a 11,2 segundos de arco.
• η Corvi, estrela de magnitude 4,31 cun disco circumestelar ó redor semellante ó de Vega (α Lyrae).
• 3 Corvi, estrela branca de magnitude 5,46.
• R Corvi, estrela variable tipo Mira, cun brillo que oscila entre magnitude 6,7 e 14,4 nun período duns dez meses.
• VV Corvi, estrela cuádrupla, variable eclípsante semellante a Algol (β Persei).

Obxectos Notables do espazo profundo

• NGC 4038 e NGC 4039, dúas galaxias en interacción coñecidas coma Galaxias Antennae. Situadas ó oeste da constelación, 4º ó sueste de Gienah Gurab (γ Corvi).
• NGC 4361, nebulosa planetaria dunha lixeira cor azulada.

Mitoloxía

Na mitoloxía grega, o corvo foi enviado por Apolo a buscar auga na súa copa (Crater), pero o corvo tardou en voltar porque estivera esperando a que madurara un figo cerca da fonte. Trouxo a copa (Crater) e unha serpe de auga entre as súas poutas e díxolle a Apolo que se atrasara porque a serpe lle tiña atacado. Apolo, sabedor de que o corvo mentía, puxo ós tres no ceo: condenou ó corvo a estar sedento para sempre, pois aínda que a copa está preto, a serpe non lle permite beber.

Ligazóns externas

• The Deep Photographic Guide to the Constellations: Corvus (en inglés)
• Star Tales – Corvus and Crater (en inglés)