Krugerrand

Krugerrand
A/: busto de Paul Kruger cara á esquerda. Lenda: SUID-AFRIKA * SOUTH AFRICA.	R/: gacela saltona cara á dereita, que divide a data a ambos os seus lados. Marca de gravador (CLS). Lendas: KRUGERRAND / FYNGOUD 1 OZ FINE GOLD.
Datas: desde 1967. Cecas e marcas: Casa da Moeda de Suráfrica. Deseño: Otto Schultz (A/) e Coert Steynberg (R/). Aliaxe: Ouro (91,67%) e cobre (8,33 %). Diámetro: 32,77 mm. Peso: 33,93 g. Grosor: 2,84 mm. Canto: estriado.

O krugerrand é unha moeda de ouro surafricana de investimento co peso dunha onza troy de ouro puro, cuñada por primeira vez o 3 de xullo de 1967 como vía para comercializar o ouro surafricano e producida pola Rand Refinery e a Casa da Moeda de Suráfrica.

O nome da moeda resulta dunha combinación do apelido do antigo presidente da República Surafricana Paul Kruger —representado no anverso—, e de rand, a unidade monetaria surafricana. No reverso do krugerrand aparece unha gacela saltona, o animal nacional de Suráfrica.

En 1980, o krugerrand representaba máis do 90 % do mercado mundial de moedas de ouro e era a primeira opción para os investidores que compraban este metal. No entanto, durante as décadas de 1980 e 1990, os krugerrand caeron en desgraza, xa que algúns países occidentais prohibiron a súa importación pola súa vinculación co Goberno surafricano do apartheid.

Aínda que os krugerrand carecen de valor nominal, teñen a consideración de moedas de curso legal en Suráfrica, en virtude da Lei do Banco da Reserva de Suráfrica (SARBA), de 1989.

En 2017, a Rand Refinery comezou a cuñar versións en prata, que teñen o mesmo deseño xeral que a moeda de ouro, aínda que cun diámetro superior.

Historia

O krugerrand introduciuse en 1967 como unha vía para a propiedade privada do ouro. Cuñouse nunha aliaxe o 91,67 % de ouro e o 8,33 % de cobre —máis duradeira que o ouro puro— e co contido en ouro dunha onza troy. En 1980, cando o krugerrand representaba o 90 % do mercado mundial de moedas de ouro, o Goberno surafricano introduciu tres moedas máis pequenas de carácter divisionario, que contiñan ½, ¼ e ⅒ onza troy (15,6; 7,8 e 3,1 g) de ouro, respectivamente.

Protesta contra a venda do krugerrand nos bancos en Ámsterdam, en outubro de 1984.

Por mor das sancións económicas contra Suráfrica pola súa política de apartheid, o krugerrand pasou a ser considerado como un obxecto de importación ilegal en moitos países occidentais durante as décadas de 1970 e 1980, e os Estados Unidos, que historicamente fora o maior mercado desa moeda, chegou a prohibir as importacións en 1985. O ano anterior comercializáranse nese país krugerrands por valor de máis de 600 millóns de dólares.

A maioría destas sancións elimináronse en 1991, logo de que o Goberno surafricano tomara medidas para pór fin ás súas políticas de apartheid.

En total vendéronse máis de 50 millóns de onzas en moedas de ouro krugerrand desde que comezou a súa produción en 1967.

Dimensións e contido en ouro do krugerrand

Moeda	Diámetro	Espesor	Peso	Pureza	Contido en ouro puro
					Gramos	Oz. Troy
1	32,77 mm	2,857 mm	33,9305	917 ‰	31,104	1,00
½	27,07 mm	2,20 mm	16,9653	917 ‰	15,552	0,50
¼	22,06 mm	1,83 mm	8,4826	917 ‰	7,776	0,25
⅒	16,55 mm	1,30 mm	3,3931	917 ‰	3,110	0,10

Deseño

Canto estriado dun krugerrand de 2016.

A moeda recibiu o nome de krugerrand porque no anverso, deseñado por Otto Schultz, aparece o rostro do estadista bóer Paul Kruger, presidente durante catro mandatos da antiga República Surafricana. A imaxe da gacela saltona do reverso foi deseñada por Coert Steynberg e utilizárase xa anteriormente no reverso das moedas surafricanas de cinco xilins (1947-1951 e 1953-1959) e de 50 centavos (1961-1964). A denominación do país e a alusión ao contido en ouro da moeda están inscritos tanto en afrikaans (SUID-AFRIKA) como en inglés (SOUTH AFRICA).

Emisións proof

A Casa da Moeda de Suráfrica produce edicións limitadas do krugerrand con acabamento proof —fondo espello e relevo mate— destinadas non tanto aos investidores en ouro senón aos coleccionistas numismáticos. Estas moedas teñen un prezo superior ao da emisión común. Ambas as emisións diferéncianse, á parte de polo seu acabamento, polo número de estrías do seu canto, que nas da versión proof son 220, en tanto que nas da versión estándar de investimento son 160.

50 aniversario do krugerrand

Detalle do logotipo do 50 aniversario gravado no reverso dun krugerrand de prata dunha onza en 2017.

En 2017 fixéronse 50 anos de primeira emisión do krugerrand e, para conmemorar o aniversario, a Casa da Moeda de Suráfrica produciu versións especiais en ouro, que a maiores da moeda dunha onza incluíron fraccións de ¹⁄₅₀ e de ¹⁄₂₀ hrugerrands, así como un múltiplo de 5 krugerrands. Por primeira vez, a emisión do krugerrand abriuse tamén a unha versión en prata e outra en platino, ambas de 999 milésimas. A versión de prata tivo continuidade nos anos seguintes, xa sen a marca do cincuentenario.

O límite de tiraxe destas moedas conmemorativas foi de 2.017 para a onza de platino, 5.000 para a de ouro e 1.000.000 para a de prata. As emisións conmemorativas distínguense pola inclusión dun emblema do 50 aniversario sobre o deseño da gacela no reverso das versións de platino e de prata, e á dereita do deseño da gacela nas emisións de ouro..

Moedas similares noutros países

Durante o mercado alcista do ouro da década de 1970, o krugerrand de ouro converteuse axiña na principal opción para os investidores en ouro de todo o mundo. Entre 1974 e 1985, calcúlase que só nos Estados Unidos se importaron 22 millóns de moedas de krugerrand de ouro. Este grande éxito do krugerrand animou outros países produtores de ouro a cuñaren e a emitiren as súas propias moedas de investimento neste metal, como a Maple Leaf ("folla de pradairo") canadense en 1979, a Nugget australiana en 1987, o "panda de ouro" chinés en 1982, a American Gold Eagle en 1986, e a Britannia británica en 1987.

Véxase tamén

Outros artigos

• Casa da Moeda de Suráfrica
• Economía de Suráfrica
• Rand surafricano

Ligazóns externas

• "Krugerrand: la primera moneda para invertir en oro" (Blognumismatico.com)