Cándido Conde-Pumpido
| Cándido Conde-Pumpido Tourón | |
|---|---|
 Cándido Conde-Pumpido en setembro de 2012. | |
| Nacemento | 22 de setembro de 1949 (69 anos) |
A Coruña,  Galicia | |
| Nacionalidade | España |
| Educado en | Universidade de Santiago de Compostela |
| Ocupación | Xuíz |
| Premios | Oficial da Lexión de Honra e Legion of Honor |
| [ editar datos en Wikidata ] | |
Cándido Conde-Pumpido Tourón, nado na Coruña o 22 de setembro de 1949, é un xuíz galego.
Índice
Traxectoria[editar | editar a fonte]
Pasou a súa infancia en Pontevedra, onde o seu pai foi Fiscal da Audiencia, estudando no Colexio da Inmaculada. Licenciouse en Dereito e en Ciencias Económicas e empresariais pola Universidade de Compostela, onde foi fundador e dirixente do primeiro Sindicato Democrático de Estudantes da Universidade Galega, participando na loita polas liberdades e a democracia do ano 1968.
En 1974 iniciou a súa carreira profesional como Xuíz de Primeira Instancia e Instrución. Foi xuíz no Carballiño, Maxistrado da Audiencia Provincial de Guipúscoa e Presidente da Audiencia Provincial de Segovia. En 1995, os 45 anos, foi nomeado Maxistrado da Sala Segunda do Tribunal Supremo.
Durante o franquismo participou no movemento "Justicia Democrática", que agrupaba os xuíces que propugnaban unha reforma democrática do Réxime. Despois da aprobación da Constitución foi fundador e o primeiro portavoz de "Xuíces Pola Democracia".
No Tribunal Supremo foi poñente da sentenza ditada no caso Roldán (ex director xeral da Garda Civil). Participou no Tribunal que condenou, entre outros, ó ex-ministro de Interior José Barrionuevo polo caso Marey. Foi poñente das sentenzas que condenaron o presidente de Cantabria, Hormaechea e o presidente de Navarra, Gabriel Urralburu.
O 23 de abril de 2004 foi nomeado Fiscal Xeral do Estado, en substitución de Jesús Cardenal, cargo no que continuou ata comezos de 2012, cando foi substituído por Eduardo Torres Dulce. Durante o seu mandato modificouse o sistema de elección do Fiscal Xeral, dándolle un período fixo de mandato de catro anos, para reforzar a súa independencia. No final do seu mandato retornou como Maxistrado da Sala Segunda do Tribunal Supremo. Hoxe é Maxistrado do Tribunal Constitucional, dende marzo de 2017.
O Presidente da República Francesa concedeulle a Lexión de Honor en 2011[1].
Está casado e ten tres fillos, un deles Cándido Conde-Pumpido Varela, avogado.
Presidente da Asociacion Iberoamericana de Ministerios Públicos[editar | editar a fonte]
En outubro de 2007, na XV Asemblea celebrada en Madrid[2], Conde-Pumpido foi elixido por unanimidade para asumir a Presidencia da Asociación Iberoamericana de Ministerios Públicos (AIAMP), composta por 21 países e que ten como finalidade estreitar os vínculos de cooperación, solidariedade e enriquecimento profesional entre os Ministerios Públicos ibero-americanos. Os países da AIAMP son os seguintes: Arxentina, Bolivia, Brasil, Colombia, Costa Rica, Chile, Cuba, Ecuador, El Salvador, España, Guatemala, Honduras, Nicaragua, México, Panamá, Paraguai, Peru, Portugal, República Dominicana, Uruguai e Venezuela. O antecesor de Conde-Pumpido como Presidente foi Guillermo Piedrabuena Richard, Fiscal Nacional de Chile e o seu sucesor, en 2011, Roberto Gurgel, Procurador-Geral da República do Brasil.
O Fiscal Xeral español Cándido Conde-Pumpido Tourón, que ocupou a presidencia por catro anos, iniciou proxectos importantes de cooperación internacional [3] como as Guías de Santiago de tutela as vítimas e testemuñas, a guía de combate ao tráfico de drogas e as fichas AIAMP para compartir informacións dos Ministerios Públicos ibero-americanos.
En elección durante a 19ª Asemblea Xeral Ordinaria da AIAMP, o 7 de decembro de 2011 en Brasilia [4], o Procurador-Geral da República, Roberto Gurgel, foi elixido por unanimidade entre os membros para asumir a presidencia da asociacion no bienio 2012-2014. “Acredito que o señor Gurgel, ao que temos todos un grande aprecio, é a persoa máis indicada para levar adiante esta asociación”, declarou Conde-Pumpido ao deixar a presidencia[5].
En Brasilia, o 6 de decembro de 2011, durante o Seminario Ibero-americano sobre Novas Formas de Criminalidade, o Fiscal Xeral de España e presidente da AIAMP, Conde-Pumpido, resaltou o combate contra a corrupción, citou a experiencia do seu país coa creación dunha Fiscalia especializada neste tipo de crime e resaltou que a sociedade exixe do Ministerio Público "comportamentos estritos e rigorosos[6] ."
Do 23 a 25 de marzo de 2011, Conde-Pumpido inaugurou e participou en Fortaleza, Brasil na IV Conferencia Regional para a América Latina da International Association of Prosecutors, sobre "O papel do Ministéeio Público no combate contra a corrupción"[7].
Presidente da Conferencia de Fiscais Xerais da Unión Europea[editar | editar a fonte]
En maio de 2009 Conde Pumpido foi nomeado para a presidencia da Conferencia de Fiscais Xerais da Unión Europea (UE), que foi ocupada polo Fiscal Xeral do Estado español. O acordo foi asinado por representantes dos 25 ministerios públicos da Unión.
Esta rede ten como misión o intercambio de experiencias e pronunciarse sobre o desenvolvemento do Dereito europeo, da maxistratura e dos tribunais comunitarios. Conde Pumpido manifestou a necesidade de dar un impulso a unha Fiscalia europea, prevista no Tratado de Lisboa, unha das prioridades do primeiro semestre de 2010, cando España estivo á fronte do Consello Europeo. O Fiscal español explicou que as Fiscalías Xerais europeas precisan deste modelo de coordinación que lles permita aproximar posicións e asistir ás axencias da Unión Europea encargadas de definir as políticas de Xustiza. Madrid foi en 2010 a sede da Conferencia de Fiscais Xerais e Presidentes de Tribunais Supremos da UE[8].
Notas[editar | editar a fonte]
- ↑ Europa Press, 24 de enero de 2012, Francia concede la legión de honor a Conde-Pumpido (en castelán)
- ↑ [1] Arquivado 26 de abril de 2014 en Wayback Machine. Cumbres Iberoamericanas (en castelán)
- ↑ [2] El Pais, 2010. (en castelán)
- ↑ [3] Ministerio público de Brasil, (en portugués)
- ↑ PGR é o novo presidente da AIAMP.7/12/2011. [4](en portugués)
- ↑ UNODC e Ministérios Públicos Ibero-americanos discutem Corrupção. 6 de dezembro de 2011. [5](en portugués)
- ↑ IV Conferência Regional para a América Latina da International Association of Prosecutors."O papel do Ministério Público no combate à corrupção". Fortaleza, 23 a 25 de março de 2011. Páxina webb IAP. [6][Ligazón morta](en portugués)
- ↑ Lopes da Mota mantém-se no Eurojust. Público. 29.05.2009 - 21:46 [7][Ligazón morta](en portugués)
| Predecesor: Jesús Cardenal |
Fiscal Xeral do Estado 2004 - 2011 |
Sucesor: Eduardo Torres Dulce |
