Tribunal Superior de Xustiza de Galicia

Na Galipedia, a Wikipedia en galego.
Entrada principal do Tribunal Superior de Xustiza de Galicia.

O Tribunal Superior de Xustiza de Galicia é o órgano que culmina a estrutura da Administración de Xustiza na Comunidade Autónoma. Con sede na cidade da Coruña, exerce xurisdición a través de tres salas: Sala do Civil e Penal, Sala do Contencioso-Administrativo e Sala do Social. Ademais, a súa Sala de Goberno desempeña funcións gobernativas sobre a xudicatura galega.

Nos supostos admitidos polo ordenamento xurídico este tribunal resolve recursos contra as setenzas das audiencias provinciais, os xulgados do contencioso-administrativo e os xulgados do social. Xulga en única instancia determinadas demandas en procesos civís, contencioso-administrativos e laborais, e instrúe e xulga causas criminais contra autoridades aforadas. O recurso de casación fundado na infracción de normas do dereito propio de Galicia é tamén competencia do Tribunal Superior de Xustiza, mentres que nos demais casos está atribuído ao Tribunal Supremo.

O presidente do Tribunal Superior de Xustiza, con categoría de maxistrado do Tribunal Supremo, exerce a representación do poder xudicial en Galicia.

O seu actual presidente é Miguel Ángel Cadenas Sobreira.

Lista de presidentes[editar | editar a fonte]

Planta do Tribunal Superior de Xustiza[editar | editar a fonte]

Sala do Civil e Penal: un presidente e cinco maxistrados. Sala do Contencioso-Administrativo: un presidente e dezaoito maxistrados (véxase BOE do 10/06/2010, inclúense as dúas prazas creadas polo Real decreto 819/2010,que serán efectivas cando o determine o Ministerio de Justicia). Sala do Social: un presidente e dezasete maxistrados. O presidente do Tribunal o é tamén da Sala do Civil e Penal. A Sala do Contencioso-Administratrivo está organizada actualmente en catro seccións; tamén está organizada en catro seccións a Sala do Social.

Sede[editar | editar a fonte]

Vista xeral do Pazo de Xustiza da cidade da Coruña, onde está instalado o Tribunal Superior de Xustiza de Galicia.

O Tribunal Superior de Xustiza de Galicia está instalado no Pazo de Xustiza da Coruña, na Praza de Galicia. O edificio, de estilo modernista con influencia neoclásica foi construido entre os anos 1926 e 1929 seguindo planos do arquitecto Antonio Palacios[1].

Notas[editar | editar a fonte]

  1. O Tribunal Superior de Xustiza de Galicia Páxina web da Xunta de Galicia. Recuperado o 30 de xullo de 2015.