Byung-Chul Han

Na Galipedia, a Wikipedia en galego.
Saltar ata a navegación Saltar á procura
Byung-Chul Han
Nacemento1959
 Seúl
NacionalidadeCorea do Sur
Alma máterUniversidade da Coreia e Universidade de Friburgo
Ocupaciónescritor, filósofo e catedrático de universidade
editar datos en Wikidata ]

Byung-Chul Han (en coreano: 한병철), nado en Seúl en 1959,[1][2] é un filósofo e ensaísta surcoreano experto en estudos culturais e profesor da Universidade das Artes de Berlín. Escribe en lingua alemá e está considerado como un dos filósofos máis salientables do pensamento contemporáneo pola súa crítica ó capitalismo, a sociedade do traballo, a tecnoloxía e a hipertransparencia.[3]

Biografía[editar | editar a fonte]

Byung-Chul Han naceu en Seúl. Nunha entrevista no semanario Die Zeit contou que, aínda que crítico coa tecnoloxía, esta interésalle especialmente, e que cando era neno xogaba sempre con radios e aparellos eléctricos, pero ao final decantouse por estudar metalurxia na Universidade de Corea. Abandonou a carreira tras provocar unha explosión na súa casa mentres traballaba con produtos químicos. Chegou a Alemaña con 26 anos sen saber o idioma e sen ler case nada de filosofía.

Estudou filosofía na Universidade de Friburgo e literatura alemá e teoloxía na Universidade de Múnic. En 1994, doutorouse en Friburgo cunha disertación sobre Martin Heidegger. En 2000, incorporouse ó Departamento de Filosofía da Universidade de Basilea, onde completou a súa habilitación. En 2010, converteuse en membro da facultade Staatliche Hochschule für Gestaltung Karlsruhe, onde as súas áreas de interese foron a filosofía dos séculos XVIII, XIX e XX, a ética, a filosofía social, a fenomenoloxía, a antropoloxía cultural, a estética, a relixión, a teoría dos medios, e a filosofía intercultural. Dende 2012, é profesor de estudos de filosofía e estudos culturais na Universidade das Artes de Berlín (UdK), onde dirixe o Studium Generale, ou programa de estudos xerais, de recente creación.[4]

Han é autor de dezaseis libros, dos cales os máis recentes son tratados acerca do que el denomina a "sociedade do cansazo" (Müdigkeitsgesellschaft), e a "sociedade da transparencia" (Transparenzgesellschaft), e sobre o seu concepto de Shanzai, neoloxismo que busca identificar os modos da deconstrución nas prácticas contemporáneas do capitalismo chinés.

O traballo actual de Han céntrase na "transparencia" como norma cultural creada polas forzas do mercado neoliberal, que el entende como o insaciable impulso cara á divulgación voluntaria de todo tipo de información que raia no pornográfico. Segundo Han, os ditados da transparencia impoñen un sistema totalitario de apertura a expensas doutros valores sociais como a vergoña, o segredo e a confidencialidade.[5]

Até hai pouco, Han negábase a dar entrevistas de radio e televisión e raramente divulga en público os seus detalles biográficos ou persoais, incluíndo a súa data de nacemento.[6]

Notas[editar | editar a fonte]

  1. Werner Stegmaier (Hrsg.): Europa-Philosophie. De Gruyter, Berlin/New York 2000, ISBN 3-11-016900-2], S. 191 (en liña).
  2. Musik & Ästhetik, Band 1, 1997, ISSN 1432-9425
  3. "Por favor, cierra los ojos. A la búsqueda de otro tiempo diferente". Miradas. La Vanguardia. 9 de xullo de 2016. 
  4. "Studium Generale". 
  5. "Klarheit schaffen". 
  6. "Play more and work less: A visit with Byung-Chul Han in Karlsruhe".