Megalópteros
| Megalópteros Rango fósil: Permiano-Holoceno | |||||||||||
|---|---|---|---|---|---|---|---|---|---|---|---|
 Exemplar do xénero Sialis | |||||||||||
| Clasificación científica | |||||||||||
| |||||||||||
| Familias | |||||||||||
|
Corydalidae | |||||||||||
A dos megalópteros (Megaloptera) é unha orde de insectos da que se coñecen unhas 300 especies.
O nome procede do grego μέγα-, mega, 'grande' e πτέρυξ, pterix, 'á', en referencia ás súas ás grandes e burdas. Os megalópteros son insectos relativaemnte descoñecidos en gran parte da súa área de distribución, debido á curta vida dos adultos, a frecuentemente alta tolerancia das larvas acuáticas á polución (polo que son difíciles de atopar por bañistas), e os seus hábitos xeralmente crepusculares ou nocturnos. Porén, en América os da subfamilia Corydalinae son ben coñecidos polas mandíbulas parecidas a defensas de elefante dos machos. Estas teñen unha aparencia formidable, pero son relativamente inofensivas para os humanos e outros animais; a súa función é impresionar as femias e suxeitalas durante o apareamento, e algúns machos pelexan entre eles en exhibicións de cortexo. As larvas destas especies adoitan usarse como isco para a pesca con anzó en Norteamérica.
Anteriormete os Megaloptera eran considerados parte dun grupo denominado Neuroptera, no que se incluían outros grupos, que son agora considerados xeralmente ordes separadas, e os Neuroptera comprenden agora só eses outros grupos (que antes se chamaban Planipennia). Todos os anteriores Neuroptera están, non obstante, moi estreitamente relacionados entre si e o novo nome para este grupo conxunto que inclúe a todos eles é Neuropterida.[1] Este é situado ou ben como un superorde, cos Endopterygota (dos cales forman parte) constituíndo un clado sen categoría taxonómica sobre el, ou ben os Endopterygota son mantidos como superorde, e os Neuropterida, sen categoría, formarían parte deles. Dentro dos endopterigotos, os parentes vivos máis próximos do clado dos neuroptéridos son os escaravellos.
O Corydalinae asiático Acanthacorydalis fruhstorferi pode ter unha envergadura alar de ata 21,6 cm, o que o fai o insecto acuático de maior envergadura alar do mundo.[2][3]
Anatomía e ciclo vital
[editar | editar a fonte]Os megalópteros adultos lembran moito a neurópteros, excepto pola presenza dunha rexión prateada nas ás traseiras, que lle axuda a dobralas sobre o abdome. Teñen fortes mandíbulas e pezas bucais aparentemente adaptadas para mastigar, aínda que moitas especies non comen cando son adultos. Teñen grandes ollos compostos, e nalgunhas especies tamén ocelos. As ás son grandes e subiguais.[4]
As femias poñen ata 3 000 ovos nunha masa conxunta, que depositan sobre vexetación que colga sobre a superficie da auga. Sofren a forma máis rudimentaria de metamorfose completa entre os insectos. Presentan menos diferenzas entre as formas larvarias e as adultas que calquera outra orde de insectos holometábolos, e as súas larvas acuáticas viven en auga doce, arredor da cal viven tamén os adultos. As larvas son carnívoras, e comen pequenos invertebrados, como crustáceos, ameixas, vermes e outros insectos. Posúen fortes mandíbulas que usan para capturar as súas presas. Teñen grandes cabezas e corpos alongados. O abdome leva varios filamentos táctiles finos, que nalgunhas especies poden incluír branquias. O segmento final do abdome leva un par de propatas, ou un só apéndice parecido a unha cola.[4]
As larvas crecen lentamente e tardan de 1 a 5 anos en chegar ao último estado larvario. Cando chegan á madurez, as larvas arrástranse desde a auga a terra e pupan no solo húmido ou baixo troncos. Algo pouco común é que a pupa é completamente móbil e ten grandes mandíbulas que usa para defenderse dos seus predadores. Os adultos de vida curta emerxen da pupa para aparearse, e moitas especies nunca se alimentan como adultos e viven só unhas poucas horas ou días.[4]
Evolución
[editar | editar a fonte]Ademais das dúas familias vivas, hai algúns taxons prehistóricos de Megaloptera, coñecidos polos seus fósiles. Algúns destes ocupan unha posición máis basal:[5]
- Xénero Corydasialis (ás veces considerado como a familia monotípica Corydasialidae[6])
- Familia Parasialidae (probablemente parafilética)
- Familia Euchauliodidae
- Familia Nanosialidae[7]
Os Megaloptera son monofiléticos e un clado irmán de Neuroptera.[8] Dentro de Megaloptera, Corydalinae e Chauliodinae son clados irmáns. A estimación do tempo de diverxencia suxire que a liñaxe troncal de Neuropterida e Coleoptera separouse no Permiano temperán.
Notas
[editar | editar a fonte]- ↑ Tamén chamados "Neuropteroidea", aínda que a terminación "-oidea" é a que normalmente se usa para as superfamilias. Ver referencias en Haaramo (2008).
- ↑ "Largest aquatic insect (by wingspan)". Guinness World Records. Consultado o 4 April 2018.
- ↑ Jonathan O'Callaghan (24 July 2014). "The stuff of nightmares! New species of insect discovered in China - and it has a wingspan of more than EIGHT INCHES". Daily Mail. Consultado o 26 July 2014.
- ↑ 4,0 4,1 4,2 Hoell, H.V., Doyen, J.T. & Purcell, A.H. (1998). Introduction to Insect Biology and Diversity, 2nd ed. Oxford University Press. pp. 441–443. ISBN 0-19-510033-6.
- ↑ Ver referencias en Haaramo (2008)
- ↑ Engel & Grimaldi (2007)
- ↑ Shcherbakov DE (2013) Permian ancestors of Hymenoptera and Raphidioptera. ZooKeys 358: 45–67. doi: 10.3897/zookeys.358.6289
- ↑ Wang Y, Liu X, Winterton SL, Yang D (2012) The first mitochondrial genome for the fishfly subfamily Chauliodinae and implications for the higher phylogeny of Megaloptera. PLoS One 7(10):e47302. doi: 10.1371/journal.pone.0047302
Véxase tamén
[editar | editar a fonte]Bibliografía
[editar | editar a fonte]- Grimaldi, David & Engel, Michael S. (2005): Evolution of the Insects. Cambridge University Press. ISBN 0-521-82149-5
- Engel, Michael S. & Grimaldi, David A. (2007): The neuropterid fauna of Dominican and Mexican amber (Neuropterida, Megaloptera, Neuroptera). American Museum Novitates 3587: 1-58. PDF fulltext Arquivado 17 de decembro de 2008 en Wayback Machine.
- Haaramo, Mikko (2008): Mikko's Phylogeny Archive: Neuropterida. Version of 2008-MAR-11. Consultado o 5 de maio de 2008.
| |||||||||||||||||||||||||||||||||||||||||||||||||||||||||||||||
| |||||||||||||||||||||||||||||||||||||||||||||||||||||||||||||||
