Jacob R. Eckfeldt

Na Galipedia, a Wikipedia en galego.
Infotaula de personaJacob R. Eckfeldt
Biografía
NacementoMarzo de 1803.
Filadelfia, Pensilvania.
Morte9 de agosto de 1872 (68/69 anos)
Filadelfia, Pensilvania.
Datos persoais
País de nacionalidade Estadounidense.
RelixiónLuteranismo.
Actividade
OcupaciónEnsaiador da Casa da Moeda de Filadelfia
EmpregadorCasa da Moeda dos Estados Unidos Editar o valor em Wikidata
Familia
CónxuxeEmily M. Levering (1835).
FillosFrederick Eckfeldt.
Jacob Bausch Eckfeldt.
John Wiegand Eckfeldt.
PaiAdam Eckfeldt Editar o valor em Wikidata


Jacob Reese Eckfeldt, nado en Filadelfia en marzo de 1803 e finado na mesma cidade o 9 de agosto de 1872, foi ensaiador de metais na Ceca de Filadelfia, da Casa da Moeda dos Estados Unidos.

Traxectoria[editar | editar a fonte]

Primeiros anos e formación[editar | editar a fonte]

Nado en Filadelfia en marzo de 1803, Jacob R. Eckfeldt era o fillo maior de Margaretta e Adam Eckfeldt (1769-1852), cuñador xefe da Casa da Moeda dos Estados Unidos en Filadelfia.[1][2][3][4]

Desde rapaz destacou o seu interese polo coñecemento da física e a mecánica, e recibiu a súa educación prinicpalmente na academia clásica do Dr. Wylie e o Sr. Engles, de moita sona naquel tempo.[2][3]

Carreira profesional[editar | editar a fonte]

O seu primeiro traballo foi na administración dunha fábrica de algodón en Trenton, na que permaneceu varios anos, e posteriormente seguiu o seu pai na súa dedicación ao servizo do Goberno e ingresou na Casa da Moeda de Filadelfia, na sala de separación de metais, ás ordes do daquela refinador e fundidor Joseph Cloud.[2] Ao longo da súa traxectoria na institución foi ascendendo ata que o presidente de Andrew Jackson lle encomendou o cargo de ensaiador xefe,[1] o 30 de abril de 1832,[5] en substitución do anterior titular, John Richardson, que chegaba á súa idade de xubilación.[3] Eckfeldt exerceu este cargo durante catro décadas, ata a súa morte.[2]

No exercicio do seu cargo, Eckfeldt beneficiouse das innovacións que outro funcionario da Casa da Moeda, Franklin Peale, levara a Filadelfia logo da súa viaxe a Europa en 1833 para visitar, entre outras, a Monnaie de Paris e a Royal Mint de Londres, e tamén das balanzas e outros instrumentos de precisión creados por Saxton.[6]

A partir do éxito das minas de ouro nos estados sureños e do aumento do comercio en Nova Orleáns, o Congreso aprobou en 1835 a creación de tres sucursais da Casa da Moeda dos estados Unidos no sur —a Ceca de Charlotte (Carolina do Norte), a Ceca de Dahlonega (Xeorxia) e a Ceca de Nova Orleáns (Luisiana)—[7] o que obrigou a Eckfeldt a impartir formación a tres ensaiadores que foron designados para eses lugares.[6]

Durante o seu mandato, Jacob R. Eckfeldt informou de problemas con certos lotes de soberanos británicos que foran enviados á Casa da Moeda para a súa recuñaxe, e sinalou que eses lotes en particular estaban por baixo dos estándares da Casa da Moeda. As autoridades inglesas negárono por "imposible", xa que a Royal Mint de Londres "non comete erros", mais a investigación resultante confirmou as conclusións ás que chegara Eckfeldt. En resposta, o Parlamento británico ordenou un exame minucioso do peso e a lei das moedas de todo o mundo, que determinou que as moedas producidas nos Estados Unidos eran máis uniformes que as doutras nacións, achado que enxalzou a reputación mundial de Eckfeldt como ensaiador.[1]

A principios do verán de 1870 Eckfeldt sufriu unha grave doenza que lle xerou unha afección cardíaca. Dado o seu estado de saúde, o 26 de abril de 1872 acudiu por derradeira vez ao seu posto de traballo na Casa da Moeda de Filadelfia.[8]

Vida persoal e familiar[editar | editar a fonte]

Jacob Eckfeldt foi bautizado e confirmado na igrexa luterana e posteriormente uniuse á presbiteriana. Ademais, participaba asiduamente na Sociedade Bíblica e en diversas actividades de beneficencia.[9]

O 19 de outubro de 1835 casou con Emily M. Levering (1810-1895),[5] con quen tivo tres fillos: Frederick, John Wiegand e Jacob Bausch.[5] Este último traballou na Ceca de Filadelfia ás ordes do seu pai en 1865.[3][4]

Eckfeldt finou en Filadelfia, vítima da doenza que padedcía os últimos anos, o 9 de agosto de 1872.[1][3][5] O seu corpo foi soterrado no cemiterio luterano de Saint Paul, en Ardmore, condado de Montgomery, Pensilvania.[10]

Honras[editar | editar a fonte]

Medalla da Comisión de Ensaios dos Estados Unidos de 1873, que dedica o seu reverso á memoria de Jacob Eckfeldt.[11]

Foi elixido membro da Sociedade Filosófica Americana en xaneiro de 1843.[1][9]

O día seguinte do seu pasamento, a Ceca de Filadelfia organizou un acto de homenaxe no que participaron entre outros, o director da US Mint James Pollock, e o daquela cuñador xefe da Ceca de Filadelfia, Archibald Loudon Snowden.[12]

A figura de Jacob R. Eckfeldt foi honrada tamén coa dedicatoria do reverso da medalla emitida en 1873 pola Comisión de Ensaios dos Estados Unidos, creada por William Barber.[5]

Publicacións[editar | editar a fonte]

Ao longo da súa traxectoria, Eckfeldt foi autor de dous traballos monográficos relacionados co seu ámbito profesional:[3][5][13][14]

Notas[editar | editar a fonte]

  1. ↑ 1,0 1,1 1,2 1,3 1,4 Wilson, J. G.; Fiske, J. (eds). (1900).
  2. ↑ 2,0 2,1 2,2 2,3 Du Bois, W. (1873). Páxina 547.
  3. ↑ 3,0 3,1 3,2 3,3 3,4 3,5 "Assayers: Jacob R. Eckfeldt". EarlyUnitedStatesCoins.com
  4. ↑ 4,0 4,1 "Eckfeldt Family Tree (U.S. Mint-Related)". Expo.whitman.com
  5. ↑ 5,0 5,1 5,2 5,3 5,4 5,5 Smith, P. (2020).
  6. ↑ 6,0 6,1 Du Bois, W. (1873). Páxina 548.
  7. ↑ Lange, D. W. (2006). History of the United States Mint and its Coinage. Whitman Pub., Atlanta. Páxina 50. ISBN 978-0-7948-1972-9
  8. ↑ Du Bois, W. (1873). Páxina 549.
  9. ↑ 9,0 9,1 Du Bois, W. (1873). Páxina 551.
  10. ↑ "Jacob Reese Eckfeldt". Findagrave.com
  11. ↑ "1873 Assay Commission Medal". Heritage Auctions. 16 de setembro de 2006.
  12. ↑ "In Memoria: the late Professor Eckfeldt". En The Philadelphia Inquirer. 13 de agosto de 1872. Páxina 8.
  13. ↑ "Jacob R. Eckfeldt". The Online Books Page.
  14. ↑ "Jacob R. Eckfeldt". Entities.oclc.org

Véxase tamén[editar | editar a fonte]

Bibliografía[editar | editar a fonte]

Outros artigos[editar | editar a fonte]

Traído desde «https://gl.wikipedia.org/w/index.php?title=Jacob_R._Eckfeldt&oldid=6655336»